Read Chang Naga LEIYENBÜ 8 Bible Online

LEIYENBÜ 8 - Chang Naga bible

LEIYENBÜ 8

¹Kheijinei BUNYUBOUei Mosa to laukei, “Farao jungto hauan hai laushi: BUNYUBOUei hai lauda, ‘Haoenei kü to lemlabü lele kü mütshuong hautishi.

²Nyi ohautilonga, ngei kaibü kaonyek khümboa yuk pühtilabü.

³Hobaje shumanga yuk shoonglabü. Haoen shoongbü ka kaibü chobachem to longlabü hoba yepshangpob to lotlabü, hoba kaibü yepshang thükto hoba kaibü khangenbü shuong chem to hoba eikshuong thükto hoba wentek phau maangto, hoba wentek nyatbü phau maangto lotlabü.

⁴Yuk shuong ka thükto, kaibü eikshuong hoba no khangenbü shuong thükto pükjung longlabü.’”

⁵Hobaje BUNYUBOUei Mosa to laukei, “Aron to lenashi, shumang shuong hoba shushou shuonga hoba thimdeia ka ika kibü ju kho jungan ik shingashi, hoba Ijep kaodaka yuk paktiashi.”

⁶Hibü Aronei Ijep kaodak kabü dei thüka haoeibü ik shingkei hoba yuk pakan Ijep kaodak shenkei.

⁷Lausikei huonseibü shuongeikei thapboseiko kho tegü kümbei hoba Ijep kaodaka yuk pakktikei.

⁹Hobaje Mosaei Farao to laukei, “Sanoudambo nyi lenshi, no hoba kaneibü chem ka yuk shuong mautikuan Nail shumanga ong kishi dogo ka shanga hoba kaibü khangenbü shuong shanga hoba kaibü eikshuong shanga ladang sukujakula?”

¹⁰Faraoei laukei, “Ngiet sukujakushi.” Mosaei jongaikei, “BUNYUBOU küneibü Mühghaü tegü lubü aki dogo ngela shanga kaibü ngüh tegü yingshi.

¹¹Ka ka, ka chem ka, hoba no khangenbü, hoba kaibü eikshuong ka, yuk satkulabü; haoen Nail shumanga ong kilabü.”

¹²Kheijinei Mosa si Aronei Farao apyokei, hoba Farao khulimbo yuk pühtibü shanga Mosaei BUNYUBOU to welaukei.

¹³Hobaje BUNYUBOUei Mosaei phebü tegü kümbei; hoba chem ka, sek ka hoba khong ka, yuk shuong kho shemtikei.

¹⁴Hobaje haoenei kho shaang shaanga yoshaikei hoba kaonyeka nyaülüm hikei.

¹⁵Lausikei ladang Faraoei jemmailangbü hapbei, BUNYUBOUei joyobü tegü haoeibü maangpon kaangngaikei, hoba haosi to ngüha ale.

¹⁶BUNYUBOUei Mosa to laukei, “Aron to haoeibü juei kao to ngümshi laushi; kheijinei Ijep kaodak pendoua haatsihek paklabü.”

¹⁷Haosiei kho tegü kümbei, hoba Aronei ju jungan haoeibü ik shingan kaoa thamngu to ngümsi müt si meisiau to haatsihek pakkei. Kaoa thamngu pendouei Ijep kaoa haatsihek la yeikei.

¹⁸Hobaje huonseibü shuongeikei thapboseiko haatsihek paktila haujembei lausikei athük. Hobaje müt si meisiau to haatsihek kikei.

¹⁹Kheijinei huonseibü shuongei Farao to laukei, “Ho Mühghaüeibü ikjishou ki!” Lausikei BUNYUBOUei laubü tegü Faraoeibü maangpon kaangngaikei, hoba haoei haosi to ngüha ale.

²⁰BUNYUBOUei Mosa to laukei, “Ngeyang enyu pian Farao haiyeiko kishi, hoba hao dei to haujinei hao to lenshi: BUNYUBOUei hai lauda: ‘Haoenei kü to lemtila shanga kü mütshuong hautiashi.

²¹Nyi kü mütshuong ohautilonga ka thükto, kaibü khangenbü shuong thükto, ka mütli thükto hoba ka chemto meishou shuong hautilabü. Ijepbü chem hoba haoen kishang meishouei shentilabü.

²²Lausikei kaodaka ngo BUNYUBOU dogo nyi ngela shanga ngei khünyetje kü mütshuong kishang Goshen kao jaletan pholabü, hoba khonei meishou akilabü.

²³Ngei kü mütshuong si ka mütshuong kanglanga janyinan pholabü. Ho seikümseilei ngiet loushedlabü.’ ”

²⁴BUNYUBOUei kho tegü kümbei, hoba meishou shuong Farao Chobachem to hoba hao khangenbü shuong chem to lotkei; hoba Ijep kaodak pendoua leilukukei.

²⁵Kheijinei Faraoei Mosa si Aron ngaan laukei, “Kan hauan ho kaonyeka kaneibü Mühghaü lemashi.”

²⁶Lausikei Mosaei laukei, “Khei kümjan aying. Aishanga Ijepbüei mangsenbü BUNYUBOU küneibü Mühghaü to lemlabü ki. Künei Ijepbüei mangsenbü haoen thedanga lemsi haoenei kün to laangei atetlepsi?

²⁷Haoei kün la sakkubü tegü chalou semnyet lam to kouan BUNYUBOU küneibü Mühghaü to lemjan.”

²⁸Faraoei laukei, “Yama BUNYUBOU kaneibü Mühghaü to lemla shanga ngei kan hautikho, lausikei kan ong saako asatjan. Kü shanga sukujakuashi.”

²⁹Mosaei laukei, “Ngo ka jungka satbüyam Farao ka, hao khangenbü ka hoba hao mütshuong ka ngiet meishou shuong sattikula ngei BUNYUBOU to sulajalabü. BUNYUBOU to lemla shanga mütshuong ohautilabü dogo lauko Farao ong teyepeima.”

³⁰Mosa Farao jungka hauan BUNYUBOU to sukeijakei;

³¹hoba BUNYUBOUei Mosaei phebü küm bei. Farao ka, hao khangenbü ka, hoba haoeibü eikshuong ka mei shou kuktikukei; hoba che ongkei ajou.

³²Lausikei toukei Faraoeibü maangpon kaangngaikei hoba haoei mütshuong ohauti.