Read Chang Naga LEIYENBÜ 9 Bible Online

LEIYENBÜ 9 - Chang Naga bible

LEIYENBÜ 9

¹Kheijinei BUNYUBOUei Mosa to laukei, “Farao jungto hauan hao to lenshi, Ibri Mühghaü, BUNYUBOUei hai lauda: ‘Haoenei kü to lemtila ngeibü mütshuong hautiashi.

²Nyi haoen ohautiko toukei senetnyu phoalonga,

³chühashi, khongthua ngei samkeisamuk, shatsinam, koli, gadu, ut, masu shuong hoba sanshuong thükto lim aeibou kaangbü longtiko BUNYUBOUei ik atlabü.

⁴Lausikei Israelbü samkeisamuk si Ijepbü samkeisamuk kanglanga BUNYUBOUei janyinkulabü; hoba Israel shousi shuongeibüje aikei ühailabü.’ ”

⁵Hobaje BUNYUBOUei jih che takletan laukei, “Ngiet kaonyeka ngei habü ho kümlabü.”

⁶Nyibounyet BUNYUBOUei ho kümbei, hoba Ijepbüeibü samkeisamuk, shatsinam pendou haikukei, lausikei Israel shousi shuongeibü shatsinam hoba samkeisamukje che ongkei ühai.

⁷Faraoei mütshuong pheila hautisi Israelbüeibü samkeisamukje che ongkei ühaiko kikei. Lausikei Faraoeibü maangpon anyaakeiko kikei, hoba haoei mütshuong ohauti.

⁸Kheijinei BUNYUBOUei Mosa si Aron to laukei, “Hokjung ka tap ikmok che sungan Farao thedanga Mosaei kuito phinan angtiashi.

⁹Hobaje khoei Ijep kaodaka thamngu hanbüla yeilabü.”

¹⁰Hibü haosiei hokjung ka tap mokjung louan Farao thedanga lokei, hoba Mosaei kho kuito phinan angtikei; hoba khoei müt si meisiau la bokla yeikei.

¹¹Hobaje takshou mouei huonseibü shuong Mosa thedanga aloen.

¹²Lausikei BUNYUBOUei Faraoeibü maangpon kaangtikei, hoba BUNYUBOUei lenbü tegütham haoei Mosa si Aron to ngüha aleku.

¹³Kheijinei BUNYUBOUei Mosa to laushi, “Ngeyang enyu pian Farao thedanga loan hao to laushi: Ibri Mühghaü BUNYUBOUei hai lauda, ‘Haoenei kü to lemtila kü mütshuong hautiashi.

¹⁴Aishanga kao thea ngo tegübü ao aki dogo nyi ngela shanga ngeibü shieikoe pendou ka thükto hoba kaibü yaangenbü shuong thükto, hoba ka mütshuong thükto ngei hautilabü.

¹⁵Aieilausi haijih dangaje ngei no hoba ka mütshuong shatsinyatei khonkutiko no kao ka wapan apan kikhoulabü.

¹⁶Lausikei ka la ngeibü hau lenla hoba ngeibü nyen kaonyudak pendoua phinthonla shanga nyekchüh phoan ngei ka langkei phokukei.

¹⁷Lankei tou sühko nyi haoen tohautikho dogo kü mütshuong khulimbo no lolo yaangenda.

¹⁸Chühashi, ngiet haijinei Ijep sang lebü chalou ka tat sühko ladangkei lotan achühbü senlaang aeibou kaangko ngei yantikulabü.

¹⁹Hibü tou kaibü samkeisamuk shatsinam shuong hoba khongthua kibü pendou leishaila hautiashi; aieilausi khongthua kibü müt hoba shatsinam weko chem to aleibabü thükto senlaang lotlabü hoba haoen hailabü.’ ”

²⁰Farao khangenbü yaangbü shuong aoyouei BUNYUBOU ngüh to hatkei haoenei haoeneibü sambü shuong si samkeisamuk hoba shatsinam chemmanga leiyetnyu phokei.

²¹Lausikei aoyouei BUNYUBOU ngüha ale, haoenei lulueibü sambü shuong si shatsinam khongthua apyokei.

²²Kheijinei BUNYUBOUei Mosa to laukei, “Ijep kaodak pendoua müt, meisiau, shatsinam hoba kesiong pendou thükto senlaang attila shanga müh to kaibü ik shingashi.”

²³Hobaje Mosaei haoeibü ik mühae shingkei, hoba BUNYUBOUei langmak si senlaang yantikei, hoba kao to langponei phaükei. Hibü BUNYUBOUei Ijep kaodak to senlaang yantikukei;

²⁴hoba senlaang si langpon sepeisai yantikei. Ijep kaodak phangche yeian ladangkei haüthükan achühbü amaiboutham ho kikei.

²⁵Ijep khümboa, khongthua kibü pendou, müt si meisiau, shatsinam pendou to senlaangei tetkei, hoba senlaang khoei seka kesiong hoba yama bulong pendou tetngokkukei.

²⁶Israel shousi kishang Goshen kaodaka ong senlaang üat.

²⁷Faraoei Mosa si Aron to laukei, “Toubüa ngei shabü shona; BUNYUBOU kho ngühmai, ngo hoba kü mütshuong shedbü.

²⁸BUNYUBOU to sukujakushi; aieilausi kün langmak si senlaang habü hoei soua. Ngei kan hautilabü hoba touje kan lounyu tethüng.”

²⁹Mosaei hao to laukei, “Ngo sangnyu ka satbüyam ngeibü ik shingan BUNYUBOU to sulajalabü. Hobaje kaodak ho BUNYUBOUeibü dogo ngelabü lele langmak thaklabü, hoba senlaang touje akilabü.

³⁰Lausikei ngei ngeakei no hoba kaibü khangenbü shuongei toukei BUNYUBOU Mühghaü to ühütda.”

³¹(Phemba si barli youshou leilukhümbei; aieilausi barli youshou nyenan kikei, hoba phemba tongko kikei.

³²Lausikei whet youshou aleilu; aieilausi khübü kho mo anyenko kikei.)

³³Hobaje Mosaei sangnyu apyojung satkei. Haoei ik tuokan BUNYUBOU to sukeijakei; hoba langmak makbü si senlaang atbü thakkei, hoba touje kaodaka lang alou.

³⁴Lausikei ladang Faraoei lang, senlaang hoba langmak thakbü hapbei haoei toukei shabü shonkei. Hao hoba hao khangenbü shuong maangpon kaangngaikei.

³⁵Hobaje Mosa danko BUNYUBOUei joyobü tegü Farao maangpon kaangngaikei hoba haoei Israel shousi shuong ohauti.