Read Chang Naga JOB 1 Bible Online

JOB 1 - Chang Naga bible

JOB 1

¹Uz kaodaka müt che Job nyenbü kikei, kho müt janbümubü hoba tangbü, hoba haoei Mühghaü to hatkei hoba amaibü to mangsenkei.

²Hobaje hao la bousushou nyet hoba yaksa shou sem bukkukei.

³Haoei nyaksinamkei sanlon hajar nyet, ut hajar sem, sekmoubü masu pongsu tang saongao ngao, gadu saoen saongao ngao, hoba sambü juong kikei; khoei chaangbou aenei kibü mütshuong to kho müt kho yaangboutham kikei.

⁴Hobaje haoeibü shousi shuong haoen chem wekoa lulu la benbü chaloua lem kikei, hoba haoen yoa shaula yungla shanga haoeneibü nasi yaksa sem kho ngako lekei.

⁵Hobaje ladang ong haoeneibü lem thonkei Jobei haoen ngaan saüenkukei, hoba ngeyang enyu pian haoen pendou shanga juokbü lembü che bang kukei; aieilausi Jobei laukei, “Aingenyu kü shousi shuongei shabü shona yingkei, hoba haoeneibü maangpona Mühg- haü to khükauokka yingkei.” Kho tegü Jobei athakko kümbei.

⁶Nyetche chalou, Mühghaüeibü shousi shuong BUNYUBOU jungto haüyola loukei, hoba haoen yoa Satan kei loukei.

⁷Hobaje BUNYUBOUei Satan to laukei, “No laka loukei?” Kheijinei Satanei BUNYUBOU to jongaikei, “Kaodaka hau loungei dogo hoba khünei ang louyan dogo ka.”

⁸Hobaje BUNYUBOUei Satan to laukei, “Ngeibü khangenbou Job to nyi chühasai? Aieilausi kaodaka janbümubü hoba tangsheibü müt, Mühghü to hatbü hoba amaibü to mangsenbü hao tegübü ao aki.”

⁹Kheijinei Satanei BUNYUBOU to jongaiko laukei, “Jobei ai lejim akibüa Mühghaü to hatda si?

¹⁰Hao kaijembo, haoeibü chem kaijembo, hoba haoei kibü pendou kaijembo, pendou aenei nyi ba alelo? Nyi haoeibü ikküm iklei haükua hoba kaonyua haoeibü nyaksinam haada.

¹¹Lausikei tou kaibü ik shingan haoei kibü pendou to meitishima, haoei kathedanga ka to khüklaoklabü!”

¹²Hobaje BUNYUBOUei Satan to laukei, “Chühashi, haoei kibü pendou kaibü haua kia; lausikei hao müt to ikjishouei ongkei temeiti.”

¹³Nyetche chalou ladang haoeibü shousi bousu yaksa shousi shuong haoeneibü jai jaishoubou chema shauko yungko hoba ih yungyoko kikei, kheijinei Job jungto ngühlang künbou che louan laukei.

¹⁴“Masu pongsu shuong sekshapbo kikei, hoba khübü nyangko gadu shuong lamshauko kikei,

¹⁵hoba Sabeanbüei shikei hoba khübü kho langa, haü, haoenei sambü shuong haitia hoba ka la ngühlang lenla ngo ong satenkei.”

¹⁶Haoei lenko kitoua toukei lubü che louan laukei, “Müh ka Mühghaü wan lotan sanlon si sanshuong juokeda; hoba ka la lenla ngo kü mütpem satenkei.”

¹⁷Haoei lenko kitoua toukei lubü che louan laukei. “Khaldibü tan sem küman louan ut shuong to hatyolang kei hoba khübü kho langa, inhei sambü shuong waphetia; hoba ka la lenla ngo kü mütpem satenkei.”

¹⁸Haoei lenko kitoua toukei lubü che louan laukei, “Kaibü shousi bousu yaksa shuong haoeneibü jai jaishou bou chema shauko hoba ih yungko kikei,

¹⁹hoba chühashi, yamlamang ka yei yaangbü che longkei hoba chema chemnyek lei pendou to soukei hoba khübü mütao shuong thükto nopjung koukei hoba haoen haia, hoba ka la lenla ngo boushou satenkei.”

²⁰Kheijinei Job meimeikei hoba haoeibü mangyuk jitthetkei, hoba haoeibü khu kütan apbei, hoba kao to lekjung atkei hoba lembei.

²¹Hobaje haoei laukei, “Kü nyueibü shimung ka mütkong longkei hoba thito ngo mütkong haulabü; BUNYUBOUei kukei hoba BUNYUBOUei sunglangkei; BUNYUBOU nyen haübou yingshi.”

²²Habü haüthükbü pendoua Jobei mangthem BUNYUBOU la nyeikuko shabü ashon.