Read Chang Naga JOB 11 Bible Online

JOB 11 - Chang Naga bible

JOB 11

¹Kheijinei Namat bou Zofarei jongaikei:

²Ngüh hajuche ajongaiko phoyolep lo? Müt che ngüh laudang lebüei hao mat mailepsai?

³Nyi yonglambo lausi mü sangsembo kilepsai? Hobaje ladang nyi nyikulaje, aoeikei no ahimoutilepsai?

⁴Aieilausi nyi lauda, “Ngeibü mailem lenbü saopoakei, hoba ka thedanga ngo saopoan kia.”

⁵Lausikei O, Mühghaüei joyoa tegüje.

⁶Hobaje haoei hapbü ngebü chemphang ngüh, khei khoei lai maangpanglabü kümda, kho lena tegüje! Hibü Mühghaüei kaibü shedbü thüng aying khei hanbou khangda dogo ngeashi.

⁷Nyi khei ong lambüei Mühghaü haplep lo? Pendou thükenbou shanga nyi pendou benkosouko haplep lo?

⁸Kho müh to suokbou; nyi ai kümenkei? Sheol to kei haübou; nyi ai ngela thükkei?

⁹Kho kaodak takbüsanbü tokei loubou; hoba yungnyu tokei yaangbou.

¹⁰Haoei no leithetjung hauan thüngdanga jinalonga, hoba matjemla thangyen ngaletalonga aoei hao thangetla thükkei?

¹¹Aieilausi haoei amlangbü müt ngeda; Haoei shedbü chühenda hoba nyek hautida.

¹²Hibü ladang ong yamkabü gadu shoushou mütla yeilaje, kheijinei ong lemshanga mütei songsido haplabü.

¹³Nyi kaibü maangpon tükde leiyeia longa; hoba hao ae ik sengalonga.

¹⁴Kaibü ika shabü kialonga, kho saabü to tekan apashi. Hobaje kaibü neichema asaopobü tethüngti.

¹⁵Maimaitham kheijineije nali atheko nyi kaibü the lenlabü. Haü, no kaangkhühtham kilabü hoba ühütlabü.

¹⁶Aieilausi no khonkubü nyi amalabü. Dei kouan apbü tegü nyi kho damenlabü.

¹⁷Hobaje kaibü langkei chalou toje ngesakbou yeilabü. Tou nakthühan kiasikei, kho ngeyang tegü yeilabü.

¹⁸Hobaje no khümenan kilabü, aieilausi maanglem kia. Haü, nyi kaijembo sepeisai chühda. Satenshanga no haksolabü.

¹⁹Aoeikei no ühüt amoktiko yeplabü, Haü, juongei ka to thangbou lammangsühlabü.

²⁰Lausikei amaiboueibü nyek akiko aplabü; hoba haoen satshang lam akilabü, hoba hak hin thonbü kho ong haoeneibü maanglem yinglabü.