Read Chang Naga JOB 12 Bible Online

JOB 12 - Chang Naga bible

JOB 12

¹Kheijinei Jobei jongaikei:

²Tükte kan ong hapbü ngebü yingshi, hoba kan yoa songsidokei hailabü.

³lausikei ngeikei kan hima ditenda; ngo kan to phanga aying. Haü, habü angebü ao aki?

⁴Ngoje lepbü sangmangei nyikubü ong yeia. Khei ngei Mühghaü to welaukei hoba haoei jongaikei. Ngo shed akibou hoba janbou mubou!

⁵Ao senyühshembo ki haoeibü maangpona thu amaibü mangsenda! Tuongetla kümbo kibou shanga kho lamlekuakei.

⁶Kokbü yepeibüeibü neichem naangmaida. Hobaje aoyouei Mühghaü khauangtida haoen ai ayingda. Haoenei lulueibü seisihau Mühghaü hima damda!

⁷Lausikei tou yamkabü meisiau to pheashi, hoba haoenei ka la lenlabü; hoba mühkabü aushuong to pheashi, hoba haoenei ka la lenlabü.

⁸Ayingsi kaoa paibü shuong to pheashi, hoba haoenei ka la lenlabü. Hobaje yungnyu kabü ngau shuongei ka la ngekkulabü.

⁹Khübü pendou danko BUNYUBOUeibü ikei ho kümbei, dogo aoei alauen?

¹⁰Langkei kibü pendou soushou, hoba khunakshousi pendoueibü hak haoeibü ika kia.

¹¹Lishangei shik jepan chühbü tegü, nouei ngüh ditan achühda lo?

¹²Kanei lauda, jaishou shuong la songsido kia, hoba baushi shuong la ditenbü kia.

¹³Hao yoa Mühghaü ngebü songsido hoba hau kia; Hao to songlen maibü hoba maangashokbü kia.

¹⁴Chühashi, haoei leiluda, hoba kho nyibou akümetenda; haoei müt che khinda, hoba hao longshang aki.

¹⁵Chühashi, haoei dei shuong hatlepda hoba khübü ulangtham apda; tokei haoei khübü kho litida, hoba khübüei kaodak khüpeilangeitida.

¹⁶Hao to hau hoba songsihon maibü kia; khüpettibü hoba khüpettibou ham haoeibü ika kia.

¹⁷Haoei songdakbü shuongeibü huonsiyou leilutikuda, hoba matjembü shuong ngoubüla yeitida.

¹⁸Haoei Choba shuongeibü ngühkhüm hangangtham apikuda; hoba haoeneibü shenjanga shembe kaikuda.

¹⁹Haoei ungshedbou shuong khühlangda. Hobaje aoyou sekoktham ki haoen pekan apda.

²⁰Haoei khusabü shuongeibü ngüh aleda, hoba baushi shuongeibü dambü apbuda.

²¹Haoei Choba shuong himou bautida, hoba hauki yaangkibü shuongeibü phekhon sengkuda.

²²Haoei nakthühphang ka haübüa kibü peisilei shuong sungenda, hoba taomaophang kho ngesakbü to sungenda.

²³Haoei phangshuong haatida, hoba khübü kho leilutida. Haoei phangshuong pindida, hoba khei apyoda.

²⁴Kaodaka leiyeibü shuongeibü dambü ngoutida, hoba lamnyu akishang sangliphanga shoongaitida.

²⁵Wanthung akiko haoen nakthühphanga shoongaida, hoba ihei jakbü tegü shishilele aptida.