Read Chang Naga JOB 14 Bible Online

JOB 14 - Chang Naga bible

JOB 14

¹Yaksaei bükbü müt salang tuisho, hoba khonsakei shenan kia.

²Chipen che tegü bungda hoba yuian apda; tokei mangshoubü che tegü satda, hoba akiko apda.

³Hobaje khübü che to nyi nyek pükda lo? hoba ka yoa ngeibü matjemda lo?

⁴Aoei asaopobü ka saopobü peisilei longtienkei? Aokei aki.

⁵Haoeibü chalou takletan kialonga, hao lit lajuche kila nyi ngean kialonga, hoba haoei danjung ohauenlabü lele nyi haoeibü lei kümbuan kialonga.

⁶Chalemu lambüei jembü chalou thonan maangamaiko solobü phatko, hao haksola shanga nyi hao ka kaibü nyekei tangküng to chühashi.

⁷Aieilausi bulong che shanga maanglem kia; kho akalonga toukei nyemshaang longlabü hoba nyem kho athonlabü.

⁸Haoeibü li sinsikei, hoba kaoa haoeibü buchung haiasikei.

⁹Khüneikei kaodei takbüei kho sem tokngailabü, hoba bushang haanbü tegü bhek hakyo hakyo koulabü.

¹⁰Lausikei mütje haian apda, hoba mauan apda; haü, müt haida hoba hao lanei ki?

¹¹Yungnyu dei hapan apbü tegü, hoba shunyu che mauan apbo ulangtham hapbü hima.

¹²Kho tegü müt leketda hoba alaksepda. Müh amaushongko haoen apingailabü, ayingsi haoen yepbü ka alakseplabü.

¹³Oh, nyi ngo Sheola huan phokubü yingma; no khauang longbü akoushongko, nyi ngo huan phokukei yingma; hoba kü shanga jih che janenkuan ngo damenkei yingma!

¹⁴Müt che haisi hao tokei langngailep lo? Ngo aliti shongko ngeibü langkei lason chalou pendou onko ngei haiyeilabü.

¹⁵Nyi ngaalonga ngei jongailabü! Hobaje kaibü ikei kümbü che shanga nyi haiyeiko kikhoulabü.

¹⁶Lausikei tou nyi ngeibü youyaü weenakei; nyi ngeibü shedbü khei ong aphokuda.

¹⁷Ngei dobü ngühkhüm lulimbü neimok chenei khuilepbuakei. Hobaje nyi ngeibü shedbü küplepbulabü.

¹⁸Hobaje maimaitham shongh limjung lotan netla yeida, hoba laang kho jembü kishang ka linda.

¹⁹deiei laang shuong haulangda; hoba kho sopbo koubüei kaodak ka thamngu kulangda! Hobaje kho tegü nyi müteibü maanglem leilukuda.

²⁰Nyi hao khulimbo ponpen shanga thükda, hoba hao satan apda; Nyi hao thenyek jeileikuda hoba hao sattian apda.

²¹Haoeibü shousi shuong nyensang hapda hoba haoei angeda; hoba haoen yantida, lausikei haoei khübü ashenda.

²²Haoei haoeibü phemanga shatbü ngeda, hoba haoeibü soushou haoeibü maanga mang haapda.