Read Chang Naga JOB 15 Bible Online

JOB 15 - Chang Naga bible

JOB 15

¹Kheijinei Teman bou Elifasei jongaikei:

²Songbüdobü cheei amlangbü songeidoei jongailep lo? Ayingsi haoeibü shimung chaangbou yeiei soptilep lo?

³Ku akibü ngüh yoa, ayingsi ai akümenlabü ngüh joyobü yoa, haoei lemenlep lo?

⁴Haü, ngei Mühghaü to hatbü tekan apda, hoba Mühghaü thedanga ngühüangko lembü ange angeko mautida.

⁵Aieilausi haibü shabüei kaibü sembung leiyeida, hoba nyi khüpbülangbüeibü lishang pienda.

⁶Ngei aying, kaibü sembungei no lolo yuktida; hoba kaibü sembung khopei ka khulimbo aukabü kuda.

⁷Pendou to no shaang bukkei sai? Ayingsi shongh shuong ayaüjinei no yeikei sai?

⁸Mühghaüeibü chemphang thangyena no yoan chühkei sai? Hobaje hapbüngebü songsido ka shangabü ong yeikei sai?

⁹Nyi ngebü künei ange sai? Nyi ai ditenkei kho küneije aditenda sai?

¹⁰Kün yoa kabou tokei khuthubükei yoakei.

¹¹Mühghaüei solotibü hoba ka to ngüh inyaitham joyolabü kho ka shanga hansepbei sai?

¹²Aila kaibü maangpon athepetda? hoba aila kaibü nyek shemeida?

¹³Aila kaibü soushouei Mühghaü khulimbo loda, hoba ho tegübü ngüh kaibü sembung ka lidida?

¹⁴Hao hinseian kilabü lele müt kho ai? hoba yaksaei bukbü lai saopoan kienkei?

¹⁵Chühashi haoeibü Saopobü shuong to maang alemda; haü, hao thea müh shuongkei asaopo.

¹⁶Kholonga mangsenlabü hoba ahinseibü, hoba shabü dei tegü jenbü müt latetche hanan jungeila?

¹⁷Ngei lenkho, nyi ditashi hoba ngei hapbo loukei kho lenkho.

¹⁸Laobou songbüdobü shuongei jembü bousi shuong ka huan aphoko tetenkei.

¹⁹Aoyou la ong kao kho kukei, hoba aoyou yoa yenbou aokei akitei.

²⁰Salang sünga, khei shieikoebü shanga po lujuche takletan ki, khülokche kho amaibou kho khonsakei khonkuda.

²¹Haoeibü noukhüna hatbü kia! Naangmaijinei soshausoyungbü shuong hao jungto loulabü.

²²Hao nakthühshang ka longeilabü dogo haoei maialemda; hoba hao shanga in lamleakei.

²³Haoei shausiyung lambo paida hoba lauda, “Kho lanei ki?” hao shanga nakthühbü chalou hao thea kia.

²⁴Khonku khonsakei hao hattida; Choba che lason haula lamlebü tegü, haoenei hao thükda.

²⁵Aieilausi haoei Mühghaü khulimbo ik shingkei, hoba pendou Thükenbou khulimbo lilikei.

²⁶Aih shangbü thongan, haoei maanga yaman hao thükto tomatlangda.

²⁷Aieilausi haoeibü thenyek haabüei naanglepakei, hoba küksiho nethemtham yeitia.

²⁸Hobaje hao apsanga kida, khünei chema ao akida hoba kho laangshang la yeida.

²⁹Hao akeida, haoeibü nyaksinam thonlabü, ayingsi haoeibü youman angüpda.

³⁰Hao nakthühshang ka abanglabü, wanlongei haoeibü bhek maklabü, hoba Mühghaüeibü sembungei hao metan aplabü.

³¹Hao lolo honettiko haoei amlanga maang telemti; Aieilausi haoeibü ku kho kongkong yeilabü.

³²Moko haoeibü bhek wapan aplabü, hoba haoeibü bhek shaangshou akilabü.

³³Semlüh tegü haoei semlüh hek asembü nyakan attilabü, hoba oliv bulong tegü haoeibü pon elettilabü.

³⁴Aieilausi Mühghaü to ühütbü shuong dan angkong aptilabü, hoba besa anyem shaubüeibü neichem wanei longshemlabü.

³⁵Haoenei shia amaibü künda hoba shabü bukkuda; hoba haoeneibü shimungei himou sungbada.