Read Chang Naga JOB 16 Bible Online

JOB 16 - Chang Naga bible

JOB 16

¹Kheijinei Jobei jongaikei:

²Kho tegübü ngüh juong ngeitida; kan pendou khonku aei kubü haksotibü ong.

³Jim akibü ngüh thonlep lo? Ayingsi kanei jongailabü lele aiei kan maangpok longtida?

⁴Kanei tegü ngeikei lauenakei; kaneibü soushou kho kü soushou to jeiyoa tegüje, kan khulimbo ngei wapyokhoulabü, hoba kan to ngeibü khu ngombhoulabü.

⁵Ngeibü sembungei kan hau kitikhoulabü, hoba ngeibü sembung khopei kan maangshat sotikhoulabü.

⁶Ngei lauasikei ngeibü maangshat hakasoda; hoba ngei natsühsikei kho latetche satda?

⁷Lausikei tou haoei ngo damena; haoei kü thangbou pendou sattikua;

⁸Haoei ngo mengshattida; hoba ngo linokbü ho ngo khulimbo aukabü che tegü ki.

⁹Haoeibü khauang maangpokei ngo jitnyinkua, hoba mangsenbüei ngo shieia; haoei ngo khulimbo hauh uyoa; ngeibü dangbouei kü to nyekjokphanga semlidia.

¹⁰Haoenei kükhu limbo haa yaang koua; haoenei nyikuko ngeibü oma ipa; haoen kükhu limbo chela lapbuda.

¹¹Mühghaüei asaopobü shuong la ngo kua, hoba amaiboueibü ik to haangkusuko tekan jinda.

¹²Kü maangleko kikei, hoba haoei ngo penyila yeiko pakngokkei; haü, haoei ngüma nyatan netla yeiko phetnyintia; Tokei haoei kipla shanga chühan phoakei.

¹³Haoeibü lau jungbü shuongei ngo kailepda; onou akakko haoei ngeibü kelang thotetkuda. Haoei ngeibü khauekbüei kao nyaktida.

¹⁴Haoei kü la nali thetidang leda, hoba lakbühongbü lakoubü che tegü kü thükto tomjung lotda.

¹⁵Ngei ngeibü manga senounei thipa, hoba ngeibü laang thama khoneia.

¹⁶Ngei ngeibü ikei aikei amaibü akümsikei, hoba ngeibü welau hinseian kiasikei.

¹⁷Haapbüei ngeibü thenyek saklangda, hoba ngeibü nyekkhop nakkhühtham kia.

¹⁸Oh kaonyudak, ngeibü sii nyi teküplet, hoba ngo haapbü tethakti.

¹⁹Tokei chühashi, ngeibü aukabü khuthüka kia, hoba aoei kü ngüha thipda hao thükaenei kia.

²⁰Ngeibü thangbou shuongei kü la nyikuda; Mühghaü jungto ngeibü nyeksi kouda.

²¹Khei Mühghaü yoa müt che lemaia jungeilabü, hoba müt cheeibü shou lepbü sangmang yoa hangalama kiyola shanga.

²²Aieilausi po shisho kian phaiaje, ladangkei alongeilabü kaodak to haulabü.