Read Chang Naga JOB 19 Bible Online

JOB 19 - Chang Naga bible

JOB 19

¹Kheijinei Jobei jongaikei:

²Kanei ngeibü soushou lalokche naangjamtila hoba ngühei ngo neneila?

³Annebenko kanei ngo nyikua; ngo khulimbo amaibü kümbü ho kan hikei ahimouda lo?

⁴Hobaje maimaitham ngo ong shedkei yingalonga, ngeibü shedbü kho kü to yinglabü.

⁵Maimaitham kanei ngo khulimbo shanglimalonga, hoba ngo khonsakbü khulimbo ngüh laualonga.

⁶Kholonga ho ngeashi, khei Mühghaüei kü ngüh khüpeinyu apbua.

⁷Chühashi, kü to ik atbü khulimbo ngei ngekda, lausikei kü to ajongaida; ngei thuibü ngada, lausikei janthetkubü aki.

⁸Ngei atanenlabü lele haoei ngeibü lam lothetkua, hoba ngo haushang haoei nakthühtikua.

⁹Ngeibü soneikangbü haoei kü ka yukan sunga, hoba ngeibü khu ka khun kho sunglanga.

¹⁰Pendou aenei haoei ngo leilutia hoba ngo touje aki. hoba ngeibü maanglem kho bulong che tegü pheiena.

¹¹Tokei haoei ngo khulimbo maangpokda, hoba ngo kho haoeibü dangbou yoa che dogo weeida.

¹²Haoeibü sepai pendou liko louda, hoba ngo khulimbo lamnyu thangetda; hoba ngeibü neichem kaijembo haoeneibü setshang imenda.

¹³Haoei ngeibü jaisinasi shuong kü ka saabü to sattikuda, hoba kü thangbou shuong kü to lepde dangbou la yeia.

¹⁴Ngeibü chempenei ngo khei apyoa, hoba ngeibü lamshok thangbouei ngo maa.

¹⁵Kün chema kibü shuong hoba ngeibü sambü shuongei ngo yenbou dogo damda; Haoen thea ngo küksithang che la yeia.

¹⁶Ngei ngeibü sambü ngada, lausikei haoenei ajongaida; Ngeibü sembungei ngei hao to sulajalabü ong.

¹⁷Ngeibü yakei ngo mangsenda, hoba künyuei bukbü shousi shuongei ngo amangsühko apa.

¹⁸Nashou hanbü shuongeikei kü la nyikuda; ngo loalonga haoenei ngo khulimbo laueida.

¹⁹Ngei maanglemenbü thangbou pendouei ngo mangsenda; hoba aoyou ngei sanouda, haoenei kü khulimbo loda.

²⁰Ngeibü lo khonei ong yuklepan kia, hoba ushaleko ong ngo satenakei.

²¹Oh, kan kü thangbou shuong kü to onoukai, kü to onoukai, Aieilausi Mühghaüei kü to meitia.

²²Mühghaüei shieikoebü tegü aila kanei ngo shieikoeda, hoba aila ngeibü pheei kan maanga amaida?

²³Oh, ngeibü ngüh ho doan phoa ma! Oh, ngüh kho le chenei doa ma!

²⁴Nameibü kolem hoba pensilei, Laanga ponpen shanga doa ma!

²⁵Lausikei ngo khümenbou langkei kia dogo ngei kaangko ngekei; hoba ho phaia nyetche chalou kaodaka haoei kü shanga lokulabü.

²⁶Hobaje ngeibü mang nyaületan phaia, phea ayingsikei ngei Mühghaü hapbhang.

²⁷Hao kü aenei kia dogo ngei ngelabü. Hao yenbou che aying dogo ngeibü nyekei haplabü. Ngeibü maanga waangbüei ailai akida.

²⁸Hao to shedbü li hapabü, senei hao lai khonkutila dogo kanei laualonga.

²⁹Kanei in to hatashi; aishanga kanei matjem che kia dogo ngelabü lele khauangei inlou shieikoe shonbada.