Read Chang Naga JOB 2 Bible Online

JOB 2 - Chang Naga bible

JOB 2

¹Tokei nyetche chalou Mühg- haüeibü shousi shuong BUNYUBOU jungto haüyola loukei, hoba haoen yoa Satan kei loukei.

²Hobaje Jobei jongaikei; Hobaje BUNYUBOUei Satan to laukei, “No laka loukei?” Satanei BUNYUBOU to laukei, “kaodaka hauloungai dogo hoba khünei ang louyan dogo ka.”

³Kheijinei BUNYUBOUei Satan to laukei, “Ngeibü khangenbou Job to nyi nyek litia sai? Aieilausi kaodaka janbümubü hoba tangsheibü müt, Mühghaü to hatbü hoba amaibü to mangsenbü hao tegübü ao aki; hoba ai ngenyu hao leilutila hao khulimbo nyi ngo suletan tou sühko haoei tükdebüa hatlepan kia.”

⁴Hobaje Satanei BUNYUBOU to laukei, “Khon jeila khon haü, langkei senetla shanga mütei haoei kibü pendou kulabü.

⁵Lausikei tou kaibü ik shingan haoeibü lo si phejak to meitishima, haoei ka to ka thedanga khükla uoklabü.”

⁶Hobaje BUNYUBOUei Satan to laukei, “Chühashi, hao ka ika kia, lausikei langkei ong temauti.”

⁷Hobaje Satan BUNYUBOU jungka bangjung satkei, hoba younyek ka khunuyou sühko mou yaangbüei Job khonkukei.

⁸Hobaje haoei lolo nyikngaila chak- phei che sungbakei hoba hao tap thüka setkei.

⁹Kheijinei haoeibü yakei laukei, “No toukei tükdebüa hatlepan kida lo? Mühghaü khükei uokeian haian apashi.”

¹⁰Lausikei haoei sao to laukei, “Nyi ngoubüloubü che tegü lauda; seneije hai, Mühghaüeibü ik ka maibü ong sungletan, amaibüje asungletlep sai?” Ho pendoua Jobei haoeibü sembungei shabü ashon.

¹¹Tou hao to thushed ho pendou loubü Jobeibü thangbou semei ditan, haoen lulu kishang ka loukei, Temanbü Elifaz, Shuhaibü Bildad, hoba Namatbü Zofar, hoba hao to mao laula hoba hao maangsula shanga haoenei liko jih che janthetkei.

¹²Hobaje ladang saabü ka hao hapbei hoba hao ashen hoba haoen ngüh longko haapbei, hoba haoen müt- pem wekoei mangyuk jitnyinkei, hoba thükaeto tap phinan angtikei hoba khuto mokan jinkei.

¹³Kho tegü chalou nyet, langyang nyet haoen hao yoa kaoa setkei, hoba aoeikei hao to ngüh che ongkei ajoyo; aieilausi haoeibü khonku yongko yaangkei dogo haoenei chühenkei.