Read Chang Naga JOB 20 Bible Online

JOB 20 - Chang Naga bible

JOB 20

¹Kheijinei Namat bou Zofarei jongaiko laukei:

²Khei yingbü khoei ngo maangmauda, hoba khoei ngeibü maangpona ho phenyemda.

³Ngo himou baulabü lele hakbü kho ngei tida. hoba ngei ditenbü ka ngeibü soushouei kü to jongaida.

⁴Shangied ka kaodaka müt apyosi lengko ka.

⁵Amaibouei thükbou kho süng ashonda, hoba Mühghaü to maialembü olinbü kho longche ong dogo nyi ngekeilao?

⁶Müh sühko hao yonglamsi dogokei, hoba sangmei sühko haoeibü khu angsikei.

⁷Hao jembü phet tegü ponpen shanga mauda; Aoyouei hao hapjung loukei haoenei lauda, Hao lala lato haukei?

⁸Mangalibü che tegü hao seengjung satlabü, nangnak mangshetbü che tegü hao shian sattida.

⁹Laobou nyekei hao hapbei, touje hao ühüplabü, ayingsi hao kishangeikei touje hao angelabü.

¹⁰Haoeibü shousi shuongei shalebü ka sanou lamlabü, hoba haoeibü ikei haoeibü nyaksinam kungailabü.

¹¹Haoeibü lo toukei heshouabü hau tegü ong; lausikei thama hao yoa yeplabü.

¹²Haoeibü sembunga amaibü kho teikua tegükei, hoba haoeibü lishangei kho huan phoasikei.

¹³Haoei kho alitiko hatlepsi dogokei, hoba haoeibü sembunga tokei kho phoasikei;

¹⁴khei yingasikei haoeibü shaueiyungei haoeibü shimung shatda, hoba haoeibü kom hao to ki.

¹⁵Haoei nyaksinam suida, hoba nyibou khingaida; Haoeibü shimung ka Mühghaüei khübü kho tekan apbuda.

¹⁶Pinyueibü lüh haoei shepda, jembü lishangei hao haitida.

¹⁷Onang longbü shumang, hoba naodei si sendei koubü shumang shuong haoei ühüplabü.

¹⁸Haoei küten ongenbü kungaiko, haoei kho ashauoulabü; Namyaknamsei ka pailetbü thüng hao aolinlabü.

¹⁹Aieilausi haoei shalebü khonkutikei hoba khoyam apyokei. Haoei adangbü chem che to hao ik atan soan sungkei.

²⁰Haoeibü shi ladangkei ashenshije, Haoei maanglembü nyaksinam haoei hansho ongkei athanenlabü.

²¹Haoei aeilam aeiphop akümbü ai aki; hibü haoeibü maangdüh thonshang akida.

²²Hao ajanjan pendouei benasouan kiasikei, hao kongda kaangda; khonsakbü weko hao khulimbo ki.

²³Mühghaüei hao khulimbo khauangbü, hoba hao shauji yungjinei khauangbü, lang tegü yantibü khoei ong hao shi shenan kishi.

²⁴Hao nameibü insiaubu ka satenlabü, hoba chinam lao cheei hao paiko kiplabü.

²⁵Haoei kho senenda hoba kho shenjang aeka longda, hoba lailaibü laujin kho haoeibü khauekbü ka setenda. Hao to hatlamoklabüei sühda.

²⁶Haoeibü nyaksinam kho pendou amlang ong; Mütei ametbü wanei hao juokshemda. Haoeibü neichema joubü peialeia kho longda.

²⁷Mühei haoeibü shed shangashattida, hoba kaodakei hao khulimbo loda.

²⁸Mühghaü khauangbü chaloua, yeiei peisilei soujung satbü tegü, haoeibü chema küten ongenbü mü kaodak to langda.

²⁹Mühghaü ka müt amaibü che shangabü phejan ho, hoba Mühghaüei janletkubü phet kho ho.