Read Chang Naga JOB 28 Bible Online

JOB 28 - Chang Naga bible

JOB 28

¹Maimaitham chandinam thushang che kia, hoba hon lemshang kaoen che kia.

²Kao ka namkung sungenda, hoba laang ka chinam tühenda.

³Mütei nakthühbü haübou sühko lamda, hoba yongko nakbü laang nongbüa sühko kuko lamda.

⁴Thükaenei müt kishang ka bangjung hauan haoei kao thuyetjung atda; youei paibü shuongei maang aenei kibü shuong kho kiasi aki angekei. Müt ka lounyu bangjung yanan haoen lüha saüan soueida.

⁵Kaonyudak ka shausiyung longda, lausikei kaonyu maangaje wanei juoketla tegü.

⁶Yanan laangshuong kho ka Safair namseklaang longda, hoba khünei hon inyaibü kia.

⁷Ho lamnyu au yaangbü aieikei angekei, ayingsi aulu hamshangeibü nyekeikei ho ühüpbei.

⁸Lilisese meisiaueikei thito paian achühkei; ayingsi sekbülakbü molosaonyueikei thito danan achüh.

⁹Haoei laang kaangbou kho thuyetjung tanda, li ka haoei shongh kho khüpeitida.

¹⁰Laangkoklok jakyetan haoei lam kümda, hoba haoeibü nyekei namsek peisilei pendou hapda.

¹¹Dei nujung alotlabü lele haoei shumang shuong sakthetda; hoba ai peisilei huan ki kho tangto longtida.

¹²Lausikei songsido lanei hapla? hoba ditenbü lanei ki?

¹³Mütei khüto haulabü lamnyu angekei; ayingsi khunakshousi kishang kho hapbei ühüpda.

¹⁴Haübouei lauda, kho kü to aki; hoba yungnyuei lauda, kho kü yoa aki.

¹⁵Shanenbü honei kho jekla athet, ayingsi haoeibü mu shanga chandinam atakenen.

¹⁶Ofireibü hon, oniks namseklaang, ayingsi Safairei khoeibü mu ajektheten.

¹⁷Hon si ainaei kho to namton jetei aying; ayingsi lanbü hon peisilei to kho takteiyolabü aying.

¹⁸Koral ayingsi Kristal kho weeilabükei aying; Haü, namseklaang tokei songsido haplabü kho sekbou.

¹⁹Ethiopiabü topazei kho to takteiyola athük, ayingsi shanenbü hon tokei namtet alongen.

²⁰Kholonga songsido kho laka louda? Hobaje ditenbü kishang kho lanei ki?

²¹Aishanga langkeibü pendoueibü nyek ka kho huakei; hoba mühkabü au shuong ka ho huletakei.

²²Abaddon hoba haibüei lauda, küneibü nouei ho shanga ngühphakphak ong ditkei.

²³Thito haulabü lamnyu Mühghaüei ong ngeakei, hoba kho kishang kho haoei ngeakei.

²⁴Aieilausi kaodak thonbü pendou aeto haoei chühda; hoba müh pendou phanga haoei chühda.

²⁵Ladang haoei yei seret hauan chühkei, hoba yungnyu shuong kho süngsikhaang takan chühkei;

²⁶Ladang haoei lang shanga ngühkhüm kümbei; hoba langmak langpon shanga lam kümbei.

²⁷Kheijinei haoei kho hapbei hoba thanan phokei, haoei kho lamlekei, haü, haoei kho lamenkei.

²⁸Hobaje haoei müt kho to laukei, “Chühashi, BUNYUBOU to souhatbü kho hapbü ngebü songsido ki; hoba amaibü ka bangalonga kho ditenbü ki.”