Read Chang Naga JOB 29 Bible Online

JOB 29 - Chang Naga bible

JOB 29

¹Toukei Jobei nyibou ngühsongwanyo athakko laukei:

²Oh, ngo tanbü chasilit shuonga kikei tegüje, khei Mühghüei ngo lombo kikei tegüje.

³Ladang wanthung ngeibü khuaenei haukukei, hoba haoeibü ngesakbüei nakthühshang danko ngo paikei.

⁴Ngo sekok chaloua tegü laobou chaloua Mühghaüei küneibü neichem kaplepan kikei.

⁵Ladang pendou Thükenbou tokei kü yoa kikei, hoba ngeibü shousi shuong ngo kaijembo kikei.

⁶Ladang sendeiei ngeibü koukhün sakkei, hoba laang khoei kü la onang shumang la yeiko koutikukei!

⁷Ladang ngo sangnyua bakhün khüto haukei, hoba ladang pühthea ngo setkei.

⁸Kheijinei ngo hapan hukoshepbo kikei, hoba baushi shuongei loenan souhat kuko kikei.

⁹Songdakbü shuongei ngüh ajoyo, hoba haoen sembung küpbei.

¹⁰Yaangenbü shuongei ngüh üang, hoba haoeneibü lishang atopei.

¹¹Aishanga kü shanga ditbü shuongei ngo haükukei; hoba ngo hapbü shuongei kü la ngühchung kukei.

¹²Aieilausi thuibü hibü shalebü, Tokei shoujit, hoba thuibü akibü ngei khümenkei.

¹³Maulabü lele ong kibü ka haülabü kho kü jungto loukei, hoba latnyueibü maangpona ngei olinbü chia lautikei.

¹⁴Ngei ngo lolo saopobü neisimei lekei, hoba khoei ngo homlepbei. Ngeibü ngühmai matjem kho ngeibü mangyuk hoba khun kikei.

¹⁵Nyekthubüeibü nyek kho ngo kikei, hoba sokeboueibü you kho ngo kikei.

¹⁶Akialebü to ngo bou tegü kikei, ngei yenma aoma lamenkei.

¹⁷Asaopobü shuongeibü hauh kho ngei kühan apbukei, hoba haoei mü ka soan anan kibü kho ngei soan apbukei.

¹⁸Kheijinei ngei laukei, “Ngo ngeibü hapmaanga hailabü, hoba chalou shuong kho phetsen tegü kilabü.”

¹⁹Ngeibü li deia yanda, hoba langyang pendou ngeibü pheka nin monglabü.

²⁰Ngeibü soneikangbü kü yoa hansang kia, hoba ngeibü ika lao kho asinlabü.

²¹Mütshuongei kü to nou haangkei hoba haiteikei, hoba ngeibü chemphang songlen ditla alemen.

²²Ngei laukhüman phaia haoenei ngüh üang, hoba ngeibü ngühhaoeneibü nouanepbo atkei.

²³Lang loubü haiyeibü tegü haoenei ngo haiyeikei, hoba youshap langlou haiyeibü tegü haoenei haa yaang koukei.

²⁴Haoenei ngeibü ngüh maialemjinei ngei haoen la nyikuko lekei, hoba ngeibü thenyek ngesakbü haoenei anakthühti.

²⁵Ngei haoeneibü lamnyu shean lenkei, hoba konglebou tegü setkei, hoba sepai san thüka Choba tegü ngo kikei, khei manghaapbü shuong maangsubü che phatko.