Read Chang Naga JOB 3 Bible Online

JOB 3 - Chang Naga bible

JOB 3

¹Kho phaia, Jobei haoeibü sembung ipan hao bukbü chalou to khükkei.

²Hobaje Jobei laukei.

³“Ngo bukbü chalou hoba khüyou laobouei bousu shou che bukakei, dogo laukei kho mauashi.”

⁴Kho chalou nakthühbü kishi; Thükae ka kho Mühghaüei telam, ayingsi khünei ngesakbü tehauku.

⁵Nakthüh hoba metuphang haoeneibü la yeiko kho shoulepshi; kho thüka sangmei shangan kitishi. Aiei ong chalou kho nakthühtida khoei hattishi.

⁶Khüyou hai yingtishi, nakthüh shangbüei kho yukleptishi; poeibü chalou bakbüa kho teyoti. Lit webüa kho pakan tejin.

⁷Chühashi, nangnak kho angkong kitishi, Olinbü ngühlang khüto telouti.

⁸Aoyouei chalou to khükda uokda, hoba aoyouei Molojisang pitida.

⁹Langesaoko kijinei hapbü khanshoulitshou nakthühtiashi; ngesakbü haiyeiko dambo kitishi lausikei teluongti; Ngeiyangbü khanyang tehüpti.

¹⁰Aieilausi kho chalouei künyuseibü nyusem akhinku. Ayingsi kü thüka khonsak huan aphoku.

¹¹Aila ngo shia ühaima lo? Aila ngo buksilengko ühaima lo?

¹²Aila youkükei ngo sungletkeima? Ayingsi aila ngei yunglabü lele sen kikeima lo?

¹³Aieilausi tou haijineije ngo lengan, sangsembo kikhoulabü. Ngo haikei laubü tegüje, haijineije ngo haksoko yepan kikhoulabü.

¹⁴Coba si songdakbü shuong apyouei jembü shanga laangchem yaang dangkei haoen tegü kikhoulabü.

¹⁵Ayingsi hon kibü Choba shuong aoyouei jembü chem chandinamei shenko yoshaikei haoen yoa ngo kikhoulepnyu.

¹⁶Ayingsi litei abenko kukan huan phobü tegü, khei nasakei ladangkei ngesakbü ühüpbü hima yingkhoulabü.

¹⁷Khüneije amaibü shuongei touje amangpokda; hoba khünei hübümangbü shuong solo kia.

¹⁸Khünei thüngdanga kibü shuong lulu maang leda; haoenei bunyueibü ngüh aditda.

¹⁹Khünei hanbü si yaangbü ham kia; Hobaje bunyu sambü to ai alauda.

²⁰Aila khonsaka kibü la ngesakbü kula? Hobaje soushou khüjin khaujinbü la aila langkei kula?

²¹Haoenei haibü haiyeida lausikei kho alouda. Hobaje khünan phobü nyaksinam to khaibou kho thuko lamda.

²²Haoenei ladang hee haplaje, haoen aeibou olinda hoba lemlemda.

²³Aila lamnyu ühüpbo kibü mütla, hoba Mühghaüei baei lelepan kibü la ngesakbü kudama lo?

²⁴Nyak mühkhoulabü jeiko ngo ngühda, hoba dei koubü tegü ngo ngühda.

²⁵Aieilausi laobou ngei hatjihatko ki khoei kü to sühda; hoba ngei ai hatko ki kho kü jungto louda.

²⁶Ngo senyühshembü aki, sangsembü che akienda, ayingsi ngo hakso aki, lausikei khonsak loudang leda.