Read Chang Naga JOB 30 Bible Online

JOB 30 - Chang Naga bible

JOB 30

¹Lausikei touje kü to nashou shuongei ngo awealauda, aoyoueibü bousi shuong ngeibü shatsinam tan shuong lombü, kei shuong hima ngei jungeikei.

²Haü, haoeneibü ika hau kibü kho kü shanga jim aki, haoen hau ka ngaia.

³Ai akibü hoba mühbü ka haoen kopda; haoenei kaolin shauda, laobou sangliphang küpsheta nangnak yepda.

⁴Haoenei yam ka pikyik shakda; hoba haoenei aikei mei akibü haoeneibü li to liko shaukei.

⁵Shuong yoka haoen shian sattida; kokbü shibü tegü haoen kho ngühüangko shikei.

⁶Shukok yungkok, püngkhüna, hoba laangpoba haoen kida.

⁷Hamlong phanga haoen gadu tegü wida; hoba ushiphanga liko kamshaida.

⁸Haoen ngoubüeibü shousi haü, khongshou shuong, haoen kaonyek ka shian apa.

⁹Lausikei touje ngo haoeneibü ngühtet la yeia, ngo ai aying lausikei haoen ekyola ong yeia.

¹⁰Haoenei kü to mangsenda, haoen kü ka kukjung satda, onou akiko kü thea eok thokkuda.

¹¹Aieilausi haoei ngeibü laopük sengkua hoba ngo himou bautia, hoba haoenei ngeibü thenyek ka ngeibü nisan apbua.

¹²Ngo khulimbo ngeibü maeaenei haoeneibü amaibü dan meimeida, hoba haoeneibü leilubü kümsileiei kükhu limbo yoshaida.

¹³Haoenei ngeibü lamnyu leilutikuda, Ngo tegü thuilabü akibü che haoenei thushedei sühtikuda.

¹⁴Su khu thangyetjung koubü dei tegü haoen loukouda, Leilubü kho danko haoenei ngo danglepda.

¹⁵Hatlamoklabü shuong kü jungto louda; haoenei ngeibü nyen maibü yeiei tegü soulangda; hoba sangmei tegü ngeibü nyaksinam laangjung satda.

¹⁶Lausikei tou ngeibü soushou deila yeia, khonsak khonku chalouei kü to sühda.

¹⁷Nangnak ngeibü lo ka phe jitjung satda, hoba ngo shat longbü kho thaklo athakda.

¹⁸Shatsinyat shalümei ngeibü neisimei totjinda; khoei ngeibü mangyukei khühbü tegü khühda.

¹⁹Mühghaüei ngo thim to jangan jinda, hoba ngo thamngu tap tegü yeia.

²⁰Ngei ka to ngekda hoba nyi ajongaida; ngo loda hoba nyi kü to achühda.

²¹Nyi kü to asanouko apa, kaibü ik atsheibüei ngo shieikoeda.

²²Nyi ngo tonenkuda hoba yeia settida, hoba nyi ngo yeinaka mautida.

²³Aieilausi nyi ngo haitilabü; hoba langkeibü pendou shanga takletkubü yoshaishang to leilabü dogo ngei maisho ngeakei.

²⁴Khei yingsikei tuongko kibouei ik ashinglep lo? ayingsi thushed chaloua müt cheei thuibü ahilep lo?

²⁵Khonsaka kibü shanga ngo ühaap lo? shalebü shanga ngeibü soushou maangto ashat lo?

²⁶Lausikei ngei maibü damsi amaibü loukei; hoba ngei ngesakbü haiyeisi nakthühbü loukei.

²⁷Ngeibü sensimaang netla yeida hoba lai akida;

²⁸Ngo manghaapbo neinak neian tangto angda; ngo thangyen püh thea loan thuibü hida.

²⁹Ngo selong to jenabou, hoba Ostrich ngeibü thangbou.

³⁰Ngeibü khon nakda hoba kho khokletda, hoba shat longbüei ngeibü lo aujiauda.

³¹Hibü ngeibü kongkinei manghaap chia lauda, hoba ngeibü pithung kho haapyobü ngühlang tegü metda.