Read Chang Naga JOB 31 Bible Online

JOB 31 - Chang Naga bible

JOB 31

¹Ngei ngeibü nyekei yaksa to ladangkei achühla theyolanyokei.

²Aieilausi thükaeka Mühghaüei janletkubü ngeibü phejan kho ai?

³Asaopobü shuong la thushed ühaüthük si, hoba shedbü kümbü shuong la leilubü kuda aying lo?

⁴Haoei ngo haushang ühüpda lo? hoba ngeibü youmo pendou phanenan aki lo?

⁵Ngo amlangbüa paian kialonga, Ngeibü youei panteiko khüpettila hauan kialonga.

⁶Seret tükdebüa ngo yaüan chühashi, hoba Mühghaüei ngo tüktea loan kiasi aki chühashi.

⁷Ngeibü youyaü yoongan kialonga, hoba ngeibü thea maibü aeto ngeibü maangpon paian kialonga hoba ngeibü ika denche nali ongkei kialonga.

⁸Kholonga ngei youli jinkho hoba lubü la shautishi, hoba küneibü sek ka longbü pheian apshi.

⁹Yaksa che la ngeibü maang sulettian kialonga, hoba ngeibü lepboueibü koukhüna ngo thoan kialonga.

¹⁰Kholonga kü yak müeibü aaola yeitiashi, hoba lubü che to khüpettiashi.

¹¹Aieilausi kho matyaang, hoba songdakbü shuongei shieikoelabü shabü kümsilei ki.

¹²Aieilausi kho Abaddon sühko wanei juoklabü ki, hoba ngeibü langle pendou juokan aplabü ki.

¹³Ngeibü sambü ayingsi sambüsaoei matlaujinei ngei haoeneibü ngüh aditkuko apyokua longa.

¹⁴Mühghaü matjemla meimeijinei ngei ai kümla? hoba hao phela loujinei ngei ai jongaila?

¹⁵Aoei künyueibü shia ngo kümbei haoei haokei aküm lo? hoba müt cheei ong künyueibü shia aküm lo?

¹⁶Shalebüei mangsühbü ngei denche ongkei senetan kialonga, ayingsi latnyuei dambo haiteibü akuko kialonga.

¹⁷Ayingsi kü phejan ngei ong shauan kialonga, hoba shoujit shuongei kho ashauouko kialonga.

¹⁸Nashoudang ka thama nyueibouei tegü haoei ngo samenkei, hoba künyueibü shimung ka haoei ngo leiyenkei.

¹⁹Neisimei akibü haangjung müt at haida dogo, hoba shalebü neisimei aki dogo ngei hapan.

²⁰Haoeibü shenjangei kü la haülabü akuko kialonga, hoba ngeibü sanlon wiei alematiko kialonga.

²¹Tip koukhüna kü to thuibü kia dogo ngean ngei shoujit khulimbo ik tuokan kialonga.

²²Khei yingan kialonga phakshok ka ngeibü phak khelettiashi, hoba ngeibü phemlo shukthettiashi.

²³Aieilausi Mühghaü ka loubü thushed kho kho kü shanga hatlamoklabü kikei, hoba haoeibü soumoei ngei ai akümen.

²⁴Ngei hon kho ngeibü maanglem yeitian kialonga, hoba hon lanbü to, “Ngei ka to maanglemda,” dogo ongkei lauan kialonga.

²⁵Ngeibü nyaksinam yaangsi hoba kü ikei juong sungbasi ngo olinan kialonga.

²⁶Ngei chanyu haujinei, ayingsi litcha ngesaktham haujinei kho hapan lemalonga.

²⁷Ngeibü maangphanga sujung satan kialonga, hoba ngeibü sembungei ngeibü ik to shepalonga.

²⁸Khokei matjembü shuongei namshaulabü lele shedbü kümsilei che ki. aieilausi kho tegü yingalonga thükkaboua kibou Mühghaü atheletda.

²⁹Ngei mangsenbü thushed hapjinei ngo olinan kialonga; hoba shabüei hao sühjinei ngo tomjung angko olina longa.

³⁰Haü, haoei langkei to khüka uokashi dogo ngeibü sembungei lauko ngei shed shonalonga.

³¹Haoeibü pheei aoei maangamaiko ashau dogo ngeibü neichema kibü shuongei alaulonga.

³²Chale yen khongnyua aot; lausikei yensiau shanga ngei ngeibü chem ipbei.

³³Adamei tegü, ngei khukua ngeibü shabü huan, ngei ngühkhüm leilubü küplepan kialonga.

³⁴Aieilausi ngei shuong yaangbü kho to hatkei, hoba chungsiphangei mangsenbü shuongei ngo moktikei hibü ngüh üang hoba khongto üang.

³⁵Oh, atei ongkei kü to ditkua tegüje, chühashi, hanei ngeibü shensinge kia; pendou Thükenbouei kü to jongaiashi, hoba ngeibü dangbouei no khulimbo dobü le kho kia tegüje!

³⁶Maimaitham kho ngei ngeibü phaka pelabü; khun che tegü ngei kho kaijembo phenetlabü.

³⁷Ngeibü youyaü webü ngei lenlabü, Choba che tegü ngei kho kukhoulabü.

³⁸küneibü kaoei ngo khulimbo ngekalonga, hoba sek laüan kibü kaoei liko haapalonga.

³⁹Khünei longbü ngei mu akuko shaualonga, hoba kao bunyu shuong haitialonga.

⁴⁰Youshou jeila sang longtiashi, hoba barli youshou jeiko lümhibü sang longtiashi, Jobeibü ngüh thonbü.