Read Chang Naga JOB 33 Bible Online

JOB 33 - Chang Naga bible

JOB 33

¹Hobaje tou, Job, aiyinglaje yingsikei nyi sanoudambo ngei laubü ditshi, hoba ngeibü ngüh khümbo ditshi.

²Tou chühashi, ngei kü sembung ipa; ngeibü lishangei laua.

³Ngeibü maangpon tangbü shanga ngei laulabü, hoba ai ngühmai kho laulabü.

⁴Mühghaü soushouei ngo küma, hoba pendou Thükenbou soushouei kü la langkei kuda.

⁵Nyi thükalonga kü to jongaishi, kaibü ngüh linkeilinko lamleashi hoba kaishima.

⁶Chühashi, Mühghaü thedanga no tegü ngokei kia, ngokei shungkung thamei kümbei.

⁷Chühashi, no kü to yonganje tehüt, ayingsi ka to ngeibü ik yonganje ashatlabü.

⁸Maimaitham nyi ngeibü nouei ditko laua, hoba nyi khei lauko ngei tida.

⁹“Ngo hinseiakei, ngühkhüm aleilu, kü to shedbü aki, kü to shabü aki.

¹⁰Chühashi, haoei kükhu limbo shabü shona, haoei ngo dangbou dogo weeida.

¹¹Haoei ngeibü youa lühmong jinkuda.”

¹²Chühashi, ngei ka to lauda, no shedakei, aieilausi Mühghaü kho müt toje yaangbou.

¹³Ailaibü nyi hao to tokyoko hai lauda, haoei ngeibü ngüh che ongkei ajongaida?

¹⁴Aieilausi Mühghaüei che ninei joyoda, lausikei mütei kho aditenda.

¹⁵Manga mangnak mangsanga nyeket louko yepjinei müt shena lengjinei.

¹⁶Kheijinei haoenei müteibü nou ipbuda, hoba maangsangtila hatlenda.

¹⁷Khei khunakshousi shedbü kümsilei ka kukenla shanga, hoba müt ka lilisese sungan apla shanga.

¹⁸Haoeibü soushou püngkhün ka sungenla shanga, hoba haoeibü langkei insiaubu khümenla shanga.

¹⁹Haoeibü yepshanga shat longbü danko hao thepetla hoba haoeibü lo to takbü athakda.

²⁰Hibü haoei shauayunga ameitida, hoba sembunga shaukeiyungkei ateikuda.

²¹Haoeibü phe lemailela linda, hoba haoeibü lo tangto loushedda.

²²Haoeibü soushou heekhün nyangko, hoba haitibou jungto hauda.

²³To ai tükde ki kho müt la lenla shanga, hao yoa khuthük hangangbü che, youkobou che, hajar yoa che kialonga.

²⁴Hobaje haoei hao to onouko lauda, “Püngkhün to ayantiko hao litiashi, ngei hao shanga angthetbou che hapa.”

²⁵Haoeibü phe toukei nashou la yeingaida, hoba hao nashouabü jihsiphai to ngaida.

²⁶Haoei Mühghaü to welauda hoba haoei hao to sangu lenda; haoei Mühghaü thenyek olinbüei hapda; hoba haoei mütla saopobü ngaitikuda.

²⁷Haoei müt thedanga chia lauda, hoba lauda, “Ngei shed shona, hoba tangan kibü komtida, lausikei haoei ngeibü shedbü thüng ashiakoe.

²⁸Haoei ngeibü soushou yemkhün to atlabü ka khümenkei, hoba ngeibü soushouei ngesakbü kho haplabü.”

²⁹Chühashi, khübü pendou Mühghaüei kümda.

³⁰Khei haoeibü soushou püngkhün ka leingaila shanga hoba langkei ngesakbü hapla shanga.

³¹O Job, maangkuashi, ngeibü ngüha leashi, ngei lenlepbü, ngüh tüang.

³²Nyi lenlabü at ongkei kialonga, kü la lenbü. Aieilausi ngei no tangtimang sühda.

³³Khei ayinglonga nyi ngeibü ngüha leashi, no semetham kiashi, hoba ngei ka la songsido ngüh lenlabü.