Read Chang Naga JOB 34 Bible Online

JOB 34 - Chang Naga bible

JOB 34

¹Tokei Elihuei Athakko laukei:

²Kan songbüdobü shuong ngeibü ngüha leashi; hoba kan songsido kibü shuong ngeibü ngüh ditashi.

³Aieilausi lishangei shik jep anchühbü tegü, nouei ngüh ditanchühda.

⁴Sen shanga ai tükde ki kho senei pienkho; ai maibü kho sen yoa ngean phokho.

⁵Aieilausi Jobei laua, “Ngo saopobü, hoba Mühghaüei ngeibü phejan soa.

⁶Ngo tükde ong kisikei ngo khonkuda; ngei ngühkhüm aleiluko kiasikei, ngeibü mou ashengda!”

⁷Dei tegü nyikubü yungbou Job tegübü ao ki?

⁸Shedbü kümbü to thangbou lambü, hoba tokbüsungbü müt yoa paibü hao tegübü ao ki?

⁹Aieilausi haoei lauda, Mühghaü to paplepbo kilabü kho müt shanga ai ku ki.

¹⁰Hibü kan ditenbü shuong ngeibü ngüh ditashi, Mühghaüei amaibü kümbei dogo se? hoba pendou Thükenbouei shedbü kümlabü dogo kho ladangkei aying.

¹¹Aieilausi müteibü kümsilei thüng hao la pailetbü kuda, hoba haoenei muthüng hapngaida.

¹²Haü, maimaitham Mühghaüei amaibü akümda, hoba pendou Thükenbouei yepeiko mat ajemda.

¹³Aoei haoeibü ik to kaodak kho kukei? ayingsi kaodak pendou on aoei hao la küntikei?

¹⁴Haoei haoeibü soushou jembü jungto longeitimang sühalonga, hoba haoeibü hak jembü jungto leingaimang sühalonga.

¹⁵Phe pendou liko maulabü, hoba müt thamngula ong yeilabü.

¹⁶Hobaje nyi ditenbü kialongaje ho ditashi; ngeibü ngüh ditashi.

¹⁷Aoei ngühmai mangsenda haoei songdakla thüklepsai? Hobaje ngühmaanglanbü hoba hauki yaangkibü nyi yuktilep lo?

¹⁸Aoei Choba to, “No haangalongbü” dogo, hoba yaangenbü to, “Kan amai” dogo lauda?

¹⁹Aoei Chobaeibü shou to theachühda, ayingsi shalebü to aei keibü aweeida, aieilausi haoen pendou haoei kümbü shuong ki.

²⁰Mangde, khei haoen metuphanga haida, keibü shuong to ik atda hoba haoen mauda, hoba hauki yaangkibü shuong müteibü ik ayoko sunglangka.

²¹Aieilausi müt haushang lam pendou to haoei chühda, hoba haoeibü younak pendou haoei hapda.

²²Shedbü kümbü shuong hushang nakthühbü ayingsi metuphang aki.

²³Aieilausi müt che Mühghaü jungto matjemla haula haoei chalou apakkuda.

²⁴Ngüh aphaneiko haoei hauki yaangkibü shuong netla yeitida, hoba haoen jeila lubü phoda.

²⁵Kho tegü haoei haoeneibü kümsilei ngean, hoba nangnak haoen khoknyinkuda hoba ngünnyinda.

²⁶Müt pendouei chühko kian, haoei müt amaibü shuong shieikoeda hoba ngümda.

²⁷Aieilausi haoenei hao phai asem, hoba haoeibü ngühkhüm che ongkei haü dogo aki.

²⁸Khei shalebü shuongei ngekbü hao jungto hautilabü, hoba akialebü shuong lemenbü haoei ditlabü lele.

²⁹Haoei küpjembo phoalonga, aoei hao yuktila? haoei haoeibü thenyek küplepalonga, aoei hao hapla? Phang che to yingasikei, müt che to yingasikei jetei ong.

³⁰Khei Mühghaü to ühütbüei song ataklabü; khei mütli shanga sung akila shanga.

³¹Müt cheei Mühghaü to, “Ngei tükde shed shona, hibü touje nyibou shabü ashonlabü,” dogo thekuko lauasao?

³²Ngei ühüpbü shedbü lenbü; ngei shed shonan kialonga touje kho ngei ashonlabü, dogo mütei lauena sao?

³³Nyi dambü tegü haoei pailetbü kulep lo? Khoei nyi kho asungletda; aieilausi ngei aying, nyi pienjan, hibü nyi ai ngekei kho lenashi.

³⁴Ditenbü müt, khei ngeibü ngüha lebü songbüdobü pendouei kü to laulabü.

³⁵Jobei ai angeko lauda, hoba haoeibü ngüh songbüdobü ngüh tegü aying.

³⁶Jobei thon sühko laua tegüje maikhoulabü; aieilausi haoei amaibü mütei tegütham jongaida.

³⁷Aishanga haoeibü shedbü tokei liman haoei khulimbo meimeida; kün yoa haoei ik ipbo nyikuda, hoba Mühghaü khulimbo ngühshed angda.