Read Chang Naga JOB 36 Bible Online

JOB 36 - Chang Naga bible

JOB 36

¹Tokei Elihuei athakko laukei:

²Longche haiteishi, hoba ngei ka la lenkho; aishanga Mühghaü nyena ngei tokei lenlabü at kia.

³Saabü ka ngei ngeibü songsido sungbalabü, hoba ngei ngo kümbou la saopobü kulabü.

⁴Aieilausi maimaitham ngeibü ngüh amlang aying; songadoa benbüsoubü kho ka yoa kia.

⁵Chühashi, Mühghaü hau kibü hoba aokei aweasüngko akida; Hao ditenbüa hau aeibou yaangkei.

⁶Haoei amaibou langkei pyoda; lausikei khonsakbü la haoeibü janbü kuda.

⁷Saopobou ka haoei haoeibü nyek alitida, lausikei Choba setshanga Choba shuong yoa haoei haoen ponpendou kitida, hoba haoen tonenda.

⁸Hobaje haoei haoen thüngdanga phoalonga, hoba haoen khonsak lüha lapalonga.

⁹Kheijinei haoei haoeneibü kümsilei lenda, hoba lilikhuia küma dogo haoenei ngühkhüm lulimbü lenda.

¹⁰Tokei lenbü ditenlabü lele haoei haoeneibü noukhün ipbuda, hoba haoen shabü ka maangpon sepeiashi dogo ngühkhüm kuda.

¹¹Haoenei hao to ngüha lealonga hoba khangenalonga haoeneibü chalou püngbü juongbü hoba haoeneibü po olinbüa danlabü.

¹²Lausikei haoenei ngüha ale longa, haoen inei maulabü, hoba songsido ühüpbo haoen maulabü.

¹³Lausikei aoyouei Mühghaü to ühütda haoeneibü maangpona khauangmaangpok thanda; haoei haoen to khühsi dogokei haoenei thuila angada.

¹⁴Haoen heshoudanga haida, hoba haoeneibü langkei himoua thonda.

¹⁵Haoei khonku khonsakbü shuong haoeneibü khonsak danko khümenda, hoba khonku danko haoeneibü noukhün ipbuda.

¹⁶Haübü thushed ka haoei no senetan, toket thangetbü akishang hopabü kaoen to leian haukhoulabü, hoba no shaubü yungbü khümsoka ai phokuda kho litkei aako yingkhoulabü.

¹⁷Lausikei no amaibü matjembüei shenan kia; Matjembü hoba ngühmaiei no sühakei.

¹⁸Aieilausi khauang longbü ka no suletan nyikubü chela yeibüla maangsangashi; hoba suletbü yaangbüei no ayingbü to tohauti.

¹⁹Khon asakko hoto kaibü nyaksinam jetei yinglep lo? Ayingsi kaibü hau khümboei angeklonga hoto jetei yinglep lo?

²⁰Nangnak kho tewang, ai jihsiphaia phangshuong haoen kishang ka wapan apda.

²¹Maangsangashi, shabü aeto tohau; aieilausi nyi khonsak toje shabü bouje piena.

²²Chühashi, Mühghaü kho haoeibü haua tonenakei, hao tegübü lenbou ao ki?

²³Aoei hao la haoei kümlabü janletkukei? Hobaje aoei, “Nyi shedbü küma” dogo lauenkei?

²⁴Haoeibü kümsilei hangenla tema, Laobou shanga mütei chia lauda.

²⁵Müt pendouei khüto chüha, mütei kho saabü ka hapda.

²⁶Mühghaü kho yaangbü hoba senei hao angekei; Haoeibü po lajuche bakla athük.

²⁷Aieilausi haoei yungnyu ka deimen shependa; haoei khübü kho dangshettian langmen la yeitida.

²⁸Laobou müh ka yantida, hoba müt thükto apsileko attida.

²⁹Haü, sangmei tubü, hoba haoeibü neichem ka langmak maakbü, aoei ditenla thükkei?

³⁰Chühashi, hao kaijembo haoei langpon yantida, hoba yungnyu haübüa khoei yuklepda.

³¹Aieilausi khübü danko haoei phang shuong samda, haoei shausiyung apsileko kuda.

³²Ik jijihamei haoei langpon jungda, hoba chühletnyu phoshang to loutila haoei ngühkhüm kuda.

³³Langmak khoei hao maangpokbü lenda, hoba yeinakei haoeibü khauangbü lenda.