Read Chang Naga JOB 37 Bible Online

JOB 37 - Chang Naga bible

JOB 37

¹Haoeikei ngeibü maangpon lühda, hoba ho kaoen ka tomjung satda.

²Haoei ngüh longbü hoba haoeibü sembung ka longbü ngühlang kanei ditshi.

³Mühnyuphang pendou aeto haoei kho hautida, hoba kaodak thon sühko haoei langpon hautida.

⁴Kho phaia haoei ngühda hoba langh yaangbüei haoei langmak makda; hoba haoei langpon shuong kho asenetda. Haoeibü sembung ka haoeibü ngühlang ditda.

⁵Mühghaüei haoeibü ngühei maangpanglabü che langmak maktida; senei ditenla athükbü kümsilei yaang haoei kümda.

⁶Aieilausi haoei ninthu to, kaodaka atashi, tokei yeitoklangtok to atashi dogo lauda.

⁷Mütshuongei haoeibü kümsilei ngelabü lele, haoei mütpem wekoeibü ik hatlepbuda.

⁸Kheijinei meisiau juong yepshang to ngaida, hoba haoeneibü thüngshanga shaida.

⁹Yungthang ka yeinak louda, hoba yungkük ka shakbü libü souda.

¹⁰Mühghaüeibü hakei ninthu yeitida, hoba yungnyu yosiyaang kho ontolou aptida.

¹¹Haü, haoei sangmei shangtüngbü kho nemtida, hoba sangmeiei haoeibü langpon pontida.

¹²Hobaje müt kibü kaoa haoei ai ong sakkulaje haoei kümla shanga, kho hitoche, hoba thito che, dogo haoei lolo leiyeiko kaitida.

¹³Mühghaüei kaodak to lang kho mütshuong shieikoela ayingsi haoen to maangshikbü lenla yantida.

¹⁴O Job, ho ditashi; atopeiko loashi, hoba Mühghaüeibü maangpanglabü kümsilei damanchühashi.

¹⁵Mühghaüei ailai küman haoeibü kümsilei janda, hoba sangmei ngesak lai hauda nyi ngekeilao?

¹⁶Müha sangmei lai tetyoyo iman ki, hoba Mühghaüei maangpanglabü kümbei ngekeilao?

¹⁷Yungthang yeiei kaodak sangsembo hatlepnyu kijinei kaneibü neisimei lai lematham ki?

¹⁸Thükaenei müh mangchüh tegü lenglengtham kibü kho pintila no hao yoa yoasao?

¹⁹Senei hao to ai laula kho kü la lenshi; aieilausi sen to abenasou kisije senei seneibü ngüh ngühthenyenko akuen.

²⁰Ngei laulabü dogo hao to laulepsai? Ayingsi ngo suian apashi dogo müt cheei lauasao?

²¹Hobaje tou mütshuongei müh shuong ngesakbü kho shangashatko ühüp, lausikei yeiei sousi khübü kho souan sattida.

²²Yungkük aeka shaüshaüponpon ngesakbü louda; Mühghaü to hatlamoklabü son kia.

²³Pendou Thükenbou senei hao alamen, dei hoba matjembüa hao hau yaangbü; hoba saopobüei shenan kisije haoei shedbü mat ajemda.

²⁴Hibü khoei mütshuongei hao to hatda; aoeibü maangpona songbüdobü dogo damda haoei weko aki.