Read Chang Naga JOB 38 Bible Online

JOB 38 - Chang Naga bible

JOB 38

¹Kheijinei yeinak ka BUNYUBOUei Job to jongaikei:

²Ai angebü ngühei Mühghaüeibü dambü küplepkubü kho ao?

³Sekokbü müt che tegü nyi tou shembe kaiashi, hoba ngei ka to phelabü hoba nyi kü la lenbü.

⁴Ngei kaodak yaüjinei no lanei kikei? nyi ngean kialonga lenshima?

⁵Nyi ngekeilonga aoei ho takletbü lamlekei? Ayingsi aoei ho thüka lüh jenkei?

⁶Hoeibü thaonyu shuong kho lanei kekei? Ayingsi ho chemnyek laang aoei kekei?

⁷Ladang ngeyang khanshoulitshou shuongei liko chia laukei, hoba Mühghaüeibü shousi shuongei olinbüa ngekkei?

⁸Ayingsi yungnyu kümjinei, ladang kao kho paknyinkei kheijinei no lanei kikei?

⁹Ladang ho shanga ngei sangmei nei kümbukei, hoba sholepbü nasaknei sangmeishangtüngbü kümbei.

¹⁰Hobaje kho shanga leilang jakei, hoba koukap si thangtet kümbei.

¹¹Hobaje laukei, “Han sühko no louenkei, lausikei ho sühko ong hoba no lili yonglambü hanei nanglabü dogo laujinei no lanei kikei?”

¹²Buknyet ka tat sühko nyi chalou ka ngeyang yeila ngühkhüm kuan chühakei sai? Ayingsi laobou jiha oshenngela kho nyi hao la lenalo?

¹³Khei khoei kaodak pendou seilepla shanga, hoba kho ka amaibou kho wenan aplabü lele.

¹⁴Bungümei ipsi shungkung kao mo lean jaksheibü tegü, hoba paa nei hambü tegü yeida.

¹⁵Hobaje amaibou ka ngesakbü kho senetan phoda, hoba liliseseboueibü phem kho leiluda.

¹⁶Yungnyu pakshang to no louakaoba lo? Ayingsi kokloka paiakao lo?

¹⁷Haibü bakou shuong ka la lenakaoba lo? Ayingsi haibü yemkao koukhün lombouei no hapakaoba lo?

¹⁸Nyi kaodak takletbü ngean phoakaoba lo? Nyi kho pendou ngealonga lenshima.

¹⁹Nyi ngesakbü loushang ngekeilao? Ayingsi nakthühbü pakshang lanei ki?

²⁰Haoen lalokche hauan ki nyi lenla thükasao? nyi haoen kishang lam ngekeilao?

²¹Kheijinei no bukakeibü nyi ngean kilabü, aieilausi no aeibou baushi!

²²No ninthu thanshang to atan chühakaoba lo? Ayingsi senlaang bung hapakaoba lo?

²³Laobou no khonsak chalou hoba wapyo, hoba lason chalou shanga lamlean phokei.

²⁴Yei janyinshang hoba kaodaka chaangbou yei phinshang lamnyu kho lae ae?

²⁵Lang loula shanga lam aoei shemyetkei ayingsi langmak langpon shanga lam aoei jimyetkei?

²⁶Müt akishang, hoba sangliphang to lang loutila shanga.

²⁷Kaolong kao nembo nyaütila shanga hoba kaolina sangnyem yemtila shanga.

²⁸Langeibü bou kilao? Khülonga nangnak nindei aoei attida?

²⁹Aoeibü shimung ka ninthu laang longkei? Hobaje müh ka deihakei aoei senlaang paktida?

³⁰Dei kho laang la yeida, hoba yungnyu haübou kho shenda.

³¹Pleiades khanshoulitshou kho nyi khühla, ayingsi Orion lüh kho nyi sengla thükkeilao?

³²Nyi Mazzarot kho haoeibü jihsiphaia longtila, ayingsi nyi Sap kho shoushou thonan leiyeila thükkei lao?

³³Nyi mühkabü ngühkhüm shuong ngekeilao? kaodaka ngühkhüm kho nyi kümbei lo?

³⁴Lang juong loutila shanga nyi sangmei to ngüh kaangko ngekda sai?

³⁵Nyi langpon to hauashi dogo sengkuda sai, hoba haoenei ka to, “Kün hanei kia dogo lauda sai?”

³⁶Aoei maangkaboua songsido jinkukei? Ayingsi aoei maangpona ditenbü kukei?

³⁷Songeidoei aoei sangmei kho wela thükkei, ayingsi aoei mühkabü thungdou ka yeian jinkula thükkei?

³⁸Tham kho kaangkhütham apjinei, tham on kho khangyu khümda lo?

³⁹Molosaonyu nyunyu hoba molosaonyu meiloushou haoen thüngshanga hoba tokei kolama thoan kijinei.

⁴⁰Nyi nyunyu shanga shausiyung lambulep sai, ayingsi meiloushoueibü shi shentikulep lo?

⁴¹Shoushou shuongei kü to wiyojinei, hoba shausiyung akiko mühei haijinei, aukhumakmak la aoei haoeibü shausiyung kuda?