Read Chang Naga JOB 4 Bible Online

JOB 4 - Chang Naga bible

JOB 4

¹Kheijinei Teman bou Elifasei laukei:

²“Müt cheei ka to joyokho lausi nyi natenasao? Lausikei aoei ajoyoko kienla?

³Chühashi, nyi juong lenena, hoba hau akibü nyi thuia.

⁴Tuongan kibü kaibü ngühei phona, hoba khokjepjep hau kitia.

⁵Lausikei ho ka to sühsi no maangkhu yuida; haoei ka to meitisi nyi anatda.

⁶Nyi Mühghaü to souhatbüei maanglemda yingkaoba lo? Hobaje tükde lobüa maanglem kidaoba lo?

⁷Ho damenashi dogo ngei ka to sudajada; shed akibü aoyou maukei? Ayingsi maangtangbü shuong lanei ong tekan apbei?

⁸Ngei hapjung loubüeije aoyouei shabü sek mouda, hoba amaibü lilabü wenda haoenei kho latda.

⁹Mühghaüeibü hakei haoen mauda; hoba haoeibü khauang hakei haoen suian apda.

¹⁰Molosaonyu ngühbü, sekbülakbü molosaonyu langh; lausikei Mühghaüei paangnyu nguinyueibü hauh leilukuda.

¹¹Phe shaula ühüpbü haangjung molosaonyueibü huon kho mauda. Hobaje molosaonyu nyunyuei shoushou lubüa aatida.

¹²Jih chenei kü jungto hakphangshoua ngüh che loukei, hoba ngeibü nouei kho hangsho japan sungkei.

¹³Nangnak mangshetko, nyeketlouko yepan kijinei.

¹⁴Hatbü lühbü kü jungto loukei, laobouei ngeibü lo pendou nyakeitikei.

¹⁵Kheijinei kü thedang ka sou che tankei, ngo sangwijaangko longkei.

¹⁶Kho atopeiko lokei lausikei hao laibü yingkeije ngei maisho ashen. Kü thea denche phatko hapbei; hoba ngei ngüh hanbü che ditkei.

¹⁷Mühghaü thedanga chale langkei müt hinseian kienlep lo? Jembü kümbou thedanga müt saopoan kienlep lo?

¹⁸Chühashi, jembü sambü to haoei maang alemda; hoba haoei haoeibü khuthük hangangbü ka ongkei shed lapda.

¹⁹Khülonga thamsak chema kibü, aoyoueibü chemshang thamngu thüka ki; laobou phetyangei shauda haoen lai weeila?

²⁰Müt che ngeyang lang kila thükkei, lausikei nang anaktoua netlaphoula yeida, aoeikei haü dogo akiko haoen mauda.

²¹haoeneibü neichem kabü janglüh senan sunga longa haoen haida aying lo? Hobaje khokei hapbüngebü songsido akiko haida aying lo?”