Read Chang Naga JOB 40 Bible Online

JOB 40 - Chang Naga bible

JOB 40

¹Tokei BUNYUBOUei Job to laukei:

²Aoei nyen shada haoei pendou Thükenbou to tokyolep lo? Aoei Mühghaü to pheyophanyoda hao la kho jongaitiashi.

³Hobaje Jobei BUNYUBOU to jongaiko laukei:

⁴Chühashi, ngo ai amu, ngei ka to ai jongaila? Ngei kü sembung küpbho.

⁵Ngei che laua, haü, nyinei sühko, lausikei khüaei, ajongailabü.

⁶Kheijinei BUNYUBOUei Job to yeithu yeinak ka jongaiko laukei.

⁷Hau kibü müt che tegü shembe kaiashi; ngei ka to phelabü hoba nyi kü to jongailabü.

⁸Nyi khei ngeibü ngüh jongaibü aweeilabü si? No matmailabü nyena nyi ngo yuktila se?

⁹Ka la Mühghaüeibü ik tegü yemakei si, hoba nyi haoei tegü langmak yaang maktila thükkei si?

¹⁰Lala, no soumo hatko hele leanchühshima, hoba soneikangko neisimei leanchühshima.

¹¹No khauangbü kho hansho limtishima, hoba aoyou yonglam lilida pendou to chühko haoen yandishi.

¹²Lilisesebü pendou to tangko chühko haoen yantiashi; müt amaibü kho haoen loshang ka nakan yantiashi.

¹³Thama haoen liko küplepashi; haoeneibü thenyek nongbüa küplepashi.

¹⁴Kheijinei ong ngeikei no sanglabü, khei kaibü mai ikei no khümenalonga dogo.

¹⁵Tou kaomaang thunyu meisiau yaangbou kho to chühshi, laobou no tegü ngo kümbei, masu pongsuei tegü haoei sang shauda.

¹⁶Haoeibü hau shenjanga kia, hoba haoeibü sei kho haoeibü shimung phejaka kia.

¹⁷Cedar bu tegü haoeibü mei topeida; haoeibü youshi phejak kho shouloutham kia.

¹⁸Haoeibü lo chisaknam tegü, haoeibü yousi ik namju tegü.

¹⁹Mühghaüei kümbü yoa hao kongnyubou; aoei hao kümbei, haoei hao in nyangko sungbatishi.

²⁰Aieilausi shonghei hao shanga shausiyung longtikuda, khünei meisiau pendou louyoda.

²¹Leilang chipen phanga haan yua, hoba thima hao da.

²²Leilang chipen longei hao yeme koulepda; yungko kabü chipen shuongei hao kailepan kia.

²³Chühashi, shumang che hao deikhang shenko akoulonga hao amokda, Jordan shumang haoeibü deikoushang sühko sopsikei hao maangleman kia.

²⁴Aoei haoeibü nyek thutian, ayingsi namsungei haoeibü kunga paiko sepan lapla?