Read Chang Naga JOB 41 Bible Online

JOB 41 - Chang Naga bible

JOB 41

¹Nyi ngau yaüjinei molojisang senenlep lo, ayingsi haoeibü lishang janglühei phenan yantileplo?

²Nyi haoeibü kunga jolüh lean jinkuenlep lo, ayingsi ngau yaüjinei haoeibü kaoshang sepyetkuenlep lo?

³Haoei ka to annebenko sulepjalep lo, ayingsi ka to ngüh inyaibü laulep lo?

⁴Nyi hao ponpen shanga kaibü sambü la leashi dogo, haoei ka yoa theyolanyoulep lo?

⁵Au che to louyobü tegütham nyi hao to louyolep lo, ayingsi kaibü sambüsao shuong shanga phenan pholep lo?

⁶Ngaulapbü shuongei haoeibü namton kho noyolep lo, namyaknamseibü yoa haoenei hao wapnyinan yaklep lo?

⁷Namju simbüei nyi haoeibü khon sepyetenlep lo ayingsi haoeibü khu ngausepjinei sepyetenlep lo?

⁸Nyi hao to meitian ong chühshi; hoba latetche wapyoenlaje damanchühshi; nyi hao to nyibou akümenlabü.

⁹Chühashi, hao to meitibü maanglem aki; hao to chüh ong chühbüeikei hatda.

¹⁰Hao to aoeikei ameitienlabü lele hao aeibou sekbülakbü; kholonga aoei hao thedanga loenla?

¹¹Ngei shemngailabü lele aoei kü to tokyokei? Nühnyu phanga kibü ajanjan pendou kho ngeibü.

¹²Haoeibü yousi ik haoeibü hau yaangbü, ayingsi hao süngsilop maibü shanga ngei alauko akilabü.

¹³Aoei haoeibü tangnei hangletkula thükkei? Haoeibü khon shangbü nyangko aoei loenkei?

¹⁴Aoei haoeibü sembung koukhün shuong ipla thükkei? haoeibü hau kaijembo hatlamoklabü kia.

¹⁵Haoeibü shenjang aih tegü shangtüngbüei, kaangkhühtham nitshokan kia.

¹⁶Kaanglang to yei hansho ongkei ütlabü lele, cheei che to nityoan kia.

¹⁷Khübü kho cheei che to shenyoan kia, abangnyinlabü lele khübü kho phopyoan kia.

¹⁸Haoei haatji shijinei wanlong longda, hoba haoeibü nyek kho ngeiyangbü chanyu saklangbü tegü.

¹⁹Haoeibü sembung ka wan longda, hoba wanlüh pakda.

²⁰Wanmanga nyakchak tühjung longbü tegü,

²¹Haoei hakhinjinei wankaka wan metenda, hoba haoeibü sembunga wanlüh longda.

²²Haoeibü hau haoeibü ngüma kia, hoba hao thedanga hatbüei tomda.

²³Haoeibü phe phejak shuong chela yeiko khangyoakei Khübü kho kaangkhühtham aleilulabü lele kia.

²⁴Haoeibü maangpon laang tegü kaangbü; haü, inulaang tegü kaangbü.

²⁵Hao meimeijinei hauki yaangkibü shuong hatda; Hatbülühbüei haoen maangngouda.

²⁶inei hao to wapsikei ütda, ayingsi aupueikei, laojineikei hoba namju simbüeikei ai ayingda.

²⁷Haoei namju kho youho tegü, hoba chinam kho busha hima weeida.

²⁸Laojinei hao shian asattienda, laang shuongkei jutho hima yeida.

²⁹Injuei subü kho youkung hima weeida; hoba aupuei sujinei nyikuda.

³⁰Haoeibü shimung maangaenei akbü laang tegü kia, thima haoeibü yepshang kho kolei kümbü tegü lin lin kia.

³¹Haülangbü khünei haoei chak che tegü tühjung longdida; haoei yungnyu kho onang hima yeitida.

³²Haülangbou kho ashentibü tegütham, hao phainei haoei lamnyu kho soneikangtiko longtida.

³³Kaodaka aitokei ühütbü, hao tegübü meisiau aikei küman aki.

³⁴Yaangenbü pendouei hao to hatda, lilisesebü pendou thüka hao Choba.