Read Chang Naga JOB 42 Bible Online

JOB 42 - Chang Naga bible

JOB 42

¹Kheijinei Jobei BUNYUBOU to jongaikei:

²Nyi pendou kümenkei dogo, hoba kaibü dambü aikei senetan aphoen dogo ngei ngekei.

³Songsido akibü ngühei Mühghaüeibü dambü küplepan phobou kho ao? Hibü ngei aditenko laua, hoba ngei aditenko maangpanglabü shanga laua.

⁴Sanoutambo ditashi, hoba ngei laukho; ngei phekho kü la lenbü.

⁵Ngeibü nouei ong ngei ka shanga ditkei, lausikei touje ngeibü nyekei no hapda.

⁶Khoei, ngeibü laubü sheda dogo theletda, hoba thamngu si tap thüka setan ngo maangpon sepeida.

⁷Hobaje ho tegü longkei, BUNYUBOUei Job to joyokhüman phaia, BUNYUBOUei Teman bou Elifaz to laukei, no khulimbo hoba ka thangbou kasiham khulimbo ngo khauangda, aieilausi Jobei laubü tegü kü shanga ai janbü ki, kho kasiei alau.

⁸Hobaje tou, masu pongsu nyet hoba lon paang nyet jungan ngeibü sambü Job jungto hauashi, hoba kan shanga juokbü lembü lemashi, hoba ngeibü sambü Jobei kan shanga welautiashi; aieilausi ngei kan to kanei kümbü hima aonouko ajungeilabü lele ngei haoeibü welau sungletlabü; aieilausi ngeibü sambü Job tegü kü shanga ai janbü ki kho kanei alau.

⁹Hobaje Teman bou Elifas si Shuhai bou Bildad hoba Namat bou Zofar hauan BUNYUBOUei laubü tegü kümbei. Hobaje BUNYUBOUei Job sungletkei.

¹⁰Hobaje haoei thangbou shanga welaukujinei BUNYUBOUei Jobeibü thu jaksheikukei, hoba BUNYUBOUei Job la shaangla kibü to phejan nyiei aei kuyokei.

¹¹Hobaje haoeibü jaisina pendou hoba nousina hoba shaangbü ngeyobü thangbou pendou loukei hoba haoeibü chema hao yoa lem likei, hoba haoenei hao yoa haoeibü onat janyokei hoba BUNYUBOUei hao to amaibü sühtikubü pendou shanga maangpon haksotikei, hoba haoen mütpem wekoei nam shibang hoba honeibü ikjikhap che che kukei.

¹²Hobaje BUNYUBOUei Jobeibü langkei shaangbü toje phaila aei haükukei, hoba kho tegü sanlon hajar anthüklei, ut hajar lak, sek shapbü masu pongsu dang hajar che, hoba gadu pi saoen hajar che dogo haoeibü yeikei.

¹³Hobaje haoei bousu shou nyet hoba yaksa shou sem kikei.

¹⁴Hobaje haoei noushounyu nyen Jemima nyenkei, mütaonyu Kezia nyenkei, hoba napeinyu Kerren-happuk dogo nyenkei.

¹⁵Hobaje Jobeibü yaksa shou tegü kaodaka hemaisaomai yaksa aokei akitei; hoba haoeneibü bouei haoeneibü jaisi shuong to liko phet kukei.

¹⁶Kho phaia Job po saonyet salang kikei, hoba meten lei sühko hoba shiho sühko hapbei.

¹⁷Hobaje Job chalou benbüa baushi sinan haikei.