Read Chang Naga JOB 5 Bible Online

JOB 5 - Chang Naga bible

JOB 5

¹Lenan chühshi, ka to jongailabü at ongkei kiasaoje; hoba saopobü shuong laobou jungto no haula?

²Aieilausi ngoubüloubü jakyaü yaübüei haitida. Hobaje ngoubüloubü nyekto shatbüei haitida.

³Ngoubü kho ngei li atbü hapa. Lausikei mangde hao kishang khükei uokeikei.

⁴Haoeibü shousi shuong thusheda kia; Haoen bakhüna nitetda, hoba haoen püetlabü kei ao aki.

⁵Haoeibü langle mühbünoubü shuongei shaukhümbuda. Hobaje shalebü shuongei youman sunglangkuda, hoba deilabü shuongei haoeneibü yungdei ka dei khuda.

⁶Aieilausi thamngu ka khonku alongda, ayingsi kao ka khonsak apakda.

⁷Lausikei wanlüh kuito pijung angbü phatko, müt khonsakla bukkei.

⁸Lausikei ngo habü yingkei laubü tegüje, ngei Mühghaü lamboulabü, hoba kü mat Mühghaü jungto künkkoulabü.

⁹Alam ashokenbü kümsilei yaang haoei kümda; hoba haoeibü seikümseilei wekhümbou aying.

¹⁰Haoei kaodak to lang yantikuda, hoba seka dei lakkuda.

¹¹Phangkabü thua kibü haoei thükaeto tonenkuda; hoba manghaapbü shuong satenshang aeto tonenda.

¹²haoeneibü dambü haoenei asühlabü lele. Maanglimaangsang mütei huon kümbü haoei leilukuda.

¹³Haoei songbüdobü shuong haoen jembü huonayoua lapda, hoba lulimbü dambü lusaktikuda.

¹⁴Changea haoenei nakthüh kühshokda, hoba haoenei chajihboua nangnak tegü youei juko paida.

¹⁵Lausikei haoeneibü sembung inlou ka akainyu shuong, hoba hau kibü ik ka shalebü shuong haoei khümenda.

¹⁶Hibü khoei shalebü shuong maanglem kia, hoba asaopobü shuong sembung khinlepbuda.

¹⁷Chühashi, Mühghaüei aoto hakda kho müt olinbou! Hibü Thükenbouei tangtikubü aweasüngko teki.

¹⁸Aieilausi haoei aktida hoba haoei khühkuda; haoei leilutida hoba haoeibü ikei ong maitikuda.

¹⁹Thushed lak ka haoei no püetlabü; haü, nyetboubüa no ai ayinglabü.

²⁰Mühsinou, haibü ka, hoba wapyoa, ineibü sei ka haoei no angngailabü.

²¹Sembong pipibü ka no senetlabü, hoba hatbümokbü maulabü thushed ka no khümenlabü.

²²Mühsinou hoba maulabü thusheda no nyilabü, ayingsi kaodak meisiau shuong to ühütlabü.

²³Aieilausi seka no laang to thujinglabü, hoba yamkabü meisiau shuong ka to sangmaia kilabü.

²⁴Hobaje kaibü neichem aleiluko kia dogo nyi ngelabü; hoba nyi kaibü kishang pean chühlabü, hoba pendou benkosouko haplabü.

²⁵Kaibü lilabü halabü dogo nyi ngelabü, hoba kaodaka yamsang tegü kaibü shousi shuong kilabü.

²⁶Hangi lian ong khebü phatko, No baushi sinan ong hee to atlabü.

²⁷Ho to chühashi, künei lamenbü kho tükde ki. Künei phanjema, hoba no maila shanga kho ngean phoshi.