Read Chang Naga JOB 6 Bible Online

JOB 6 - Chang Naga bible

JOB 6

¹Kheijinei Jobei jongaikei:

²“O, ngeibü takbühitbü ho takan chüha tegüje, hoba ngeibü khonku pendou seret hauan chühbü yingma!

³Aieilausi tou yungnyu phetsen toje atsheibou yinglabü; khoei ong ngei ngüh ajemtenko lauan apa.

⁴Aieilausi pendou Thükenboueibü laujin kü to ngetakei; ho kom ngeibü soushouei yungda. Mühghaüeibü hatlamoklabü shuong kükhu limbo ki.

⁵Yamkabü gaduei haoeibü shausiyung kian wiasao? Ayingsi masu pongsuei haoeibü shausiyung phoan wiasao?

⁶Ai shik meiamai kho jem ayoko shauenasao? Ayingsi autei thupaibü ka teibü shauenlepsai?

⁷Ngeibü sembungei khübü to meitimang asühda. Khübü shausiyung kü sembunga meiamai.

⁸O, ngei mangsüh hapena tegüje, hoba haoeibü ik sengan ngo shian apa tegüje. Hobaje ngei haiyeibü Mühghaüei sengkua tegüje!

⁹Hobaje ngo nakleptila Mühghaüei maanganga tegüje, hoba haoeibü ik sengan ngo shian apa tegüje!

¹⁰Kheijinei ong ngei hakso hapbhoulabü. Haü, aphokeibü khonkua ngo olinkhoulabü. Aieilausi saopobü ngüh shuong ngei asungletko aki.

¹¹Ngei haisühlabü lele ngeibü hau lanei ki? Hobaje ngei natena tegükei khonku ho lanei thonla?

¹²Ngo laang tegü hau kiasai? Ayingsi ngeibü phe namkung sai?

¹³kü to lam aikei aki ayinglo? hoba kü ka kümen leienlabü hau satkhüma ayinglo?

¹⁴Aoyouei lulueibü thangbou shanga senetan phoda, Haoenei pendou Thükenbou to hatbü senetan phoda.

¹⁵Shushou tegü hoba kho koushanga maojung haubü tegü, ngeibü jaisinasi shuongei lepbolangko jungeia.

¹⁶Ninthu laangei khübü shushou nakthüngko yeida; hoba khübü thüka ninthu khünda.

¹⁷Lemabü jihaphaia haoen mauan apda; ladang aulaje haoen hak la yeian apda.

¹⁸Wakoubü shuong lam yoongjung satda, haoen yama shoongaian mauda.

¹⁹Temabü wakoubü shuongei dei lamda, Shebabü shuongei maanglem phoda.

²⁰Haoenei dambo kibü ühüpsije haoen himou baukei; haoen khüto loukei hoba mangan apbei.

²¹Kho tegü kü thedanga yeia. kanei hatlamoklabü che hapda hoba hatda.

²²kü la denche labü ayingsi kaneibü nyaksinam ka, jongsak che kushi dogo ngei laukei sai?

²³Ayingsi dangboueibü ik ka ngo khümenshi dogo, ayingsi shieikoebou ik ka ngo angngaishi dogo ngei laukei sai?

²⁴kü la lenbü ngo ngüh üangko kikho, hoba ngei ainei mashikkeije kho ditentiashi.

²⁵Ngühmai ngüh lai hau ki; lausikei kanei hakbüa ai hau ki?

²⁶Laialebü mütei laubü ngüh kho yei tegü dogo dama tegükei, kanei ngühei hakla huongda si?

²⁷Haü, kanei shoushedshou la phaang pakkulabü, hoba thangbou che ka ku shaulabü.

²⁸Hibü tou kü to chühshi, aieilausi tükde ngo kan thedanga ayepeilabü.

²⁹Khüai leshi dogo ngei sudajada, amai teku, haü, kaneibü maangpon jaksheiashi.

³⁰Ngeibü lishanga saopobü kia sai? Ngeije maibü amaibü ashauenlep sai?”