Read Chang Naga JOB 7 Bible Online

JOB 7 - Chang Naga bible

JOB 7

¹Kaodaka müt shanga wapyo akisai? Haoeibü langkei kho chale eikmu koubü phatkei aying lo?

²Sambüei yemekoubü mangsühko haiyeibü tegü, hoba chale eikmu koubüei mu ong haiyeibü hima.

³Ngo lit lita kongkong ong kitida, hoba kü shanga nangnak watlelabü janletkuakei.

⁴Ladang ngo shena lengda, ngei lauda, “Ngo ladang pila?” Lausikei langyang louakei, hoba ngeyang langesaoko ngei ngeibü mang sepeidang leda.

⁵Ngeibü mang yangpem si makei thangthang shenan kia; ngeibü khon kaangkhühtham yeida, hoba kho phaia simok senda.

⁶Kü langkei neitakbüeibü leitujin tokei sobou hauda; hoba maanglem akiko apda.

⁷O ngeibü langkei ho khei yei tegü damenashi; ngeibü nyekei touje maibüje ühüplabü.

⁸Aoeibü nyekei ngo lomda haoei touje ngo ühüplabü;. kaibü nyekei ngo lamlabü lausikei ngoje akilabü.

⁹Sangmei ühüpbo maubü hima, Ao hee to atlaje touje hao alonglabü.

¹⁰Touje haoen chem to angailabü; ayingsi hao kishangeikei angelabü.

¹¹Hibü ngeikei ngeibü sembung akhinlabü, ngei ngeibü soushou khonkubü shanga ngei laulabü. Hobaje ngeibü soushou khauekbü shanga ngo nyamnyamlabü.

¹²Lombü la lomtilabü lele, ngo yungnyu ayingsi yungnyu haübü kabü meisiau sai?

¹³Ngeibü shenei ngo haksotilabü, kü yepshangei ngeibü khonku hansho maitikulabü dogo ngei lauda.

¹⁴Kheijinei manglibüei nyi ngo moktida; hoba mangsang danko ngo hattida.

¹⁵Hibü ngeibü soushouei nyathetnyu ong haimang sühnyu, hoba ngo khonsakbü toje hai bouje haimangsühda.

¹⁶Ngo ngeibü langkeiei oa; ngo ponpenje akilabü. Ngo khei ong apyoshi aieilausi kü langkei hak kong.

¹⁷Ngo yaangentilabü lele, hoba nyi hao to maang kulabü lele müt kei ai?

¹⁸Hobaje ngeyang weko nyi peanchühlabü lele, hoba jih weko takteilabü lele mütkei ai?

¹⁹Lalokche no küae thenyek ayeila? Ayingsi ngei lit lengbü ühaienla?

²⁰Ngei shabü shonkei yingalonga, O no müt thüngbou, ngei ka to ai kümla? Ngei ngo lolo onat künlabü lele, aila nyi ngo nyek theshang yeitikei?

²¹Hobaje ngei ngühkhüm leilubü shedbü aila üpbuda, hoba ngeibü shabü aila alangda? Aieilausi tou ngo thamngua yeplabü. hoba nyi ngo waangko lamlabü.