Read Chang Naga NYENSANG CHIA 10 Bible Online

NYENSANG CHIA 10 - Chang Naga bible

NYENSANG CHIA 10

¹O BUNYUBOU, aila no saabüa loan kida, khonsak khonku jihsiphaia no aila huan apda?

²Amaibou lilibüa shalebü khap lapan shieida; haoeneibü lamthena haoen laptiashi.

³Aieilausi amaibouei jembü maangponei mangsühbü shanga yonglamda. Hobaje aeilam aeiphopbüei BUNYUBOU asungletda hoba nyikuda.

⁴Amaibouei lilibü thenyek yeman lauda, haoei Mühghaü alamlabü. Haoei dambü pendouei Mühghaü aki dogo lauda.

⁵Haoeibü kümsileije ponpen shoulobü, kaibü matjem haoei ühüpbo saabüa kia. Khei haoei haoeibü theshoubou to nyikuko lauda.

⁶Haoei jembü maangpona lauda, “Ngo atopeilabü; meten pendoua ngei khonku akühshoklabü.”

⁷Khüksiuok hoba khüpbülangbü hoba shieikoeei haoeibü sembung shenakei; amaibü hoba shedbü shabü haoeibü lishanga kia.

⁸Haoei sangnyua thoan haiteida; ühüpshanga haoei shedbü akibü haitida; thuibü akibü shuong khulimbo haoei nyekjok phanga semda.

⁹Molosaonyuei ühüptiko thobü tegü haoei thoda; shalebü lapla haoei haiteida; Ladang shalebü haoeibü sunga minlaje haoei hao lapda.

¹⁰Haoei thopjung ngaida, hao khüpetda; hoba thuibü akibü shuong, haoeneibü hau kibü mütshuong thedanga tuongetda.

¹¹Haoei haoeibü maangpona lauda, “Mühghaüei maan apa! Haoei jembü thenyek huda, haoei kho ladangkei ühüplabü!”

¹²Meimeiashi, O BUNYUBOU, O Mühghaü, kaibü ik shingashi, khonkubü tema.

¹³“Nyi kho aphelabü” dogo aila jembü maangpona lauko, aila amaibüei Mühghaü la nyikuda?

¹⁴Nyi ho hapda, haü, amaibü hoba maangalanbü kaibü ika hatlepla nyi hapda. Thuibü akibü shuong ka phangto lotda; bou akibü shuong shanga no haoeneibü thuibou.

¹⁵Amaibü hoba shabü jungeibü phem nyi leilukushi; khümbo alamen shongko nyi haoeneibü amaibü kho lamenashi.

¹⁶BUNYUBOU ponpen thon akiko Choba kia; phangshuong haoeneibü kao ka maulabü.

¹⁷BUNYUBOU, nyi ea aoabü shuongei mangsühbü ditlabü, bou akibü si naklepbü shuong matjemla shanga. Kaodaka kibü mütei touje khonsak akulabü lele.

¹⁸Nyi haoeneibü maangpon hau kitila nyi kaibü nou haangkulabü.