Read Chang Naga NYENSANG CHIA 101 Bible Online

NYENSANG CHIA 101 - Chang Naga bible

NYENSANG CHIA 101

¹Onou hoba ngühmai shanga ngei chia laulabü; O BUNYUBOU, ngei ka la chia laukulabü.

²Ngo lolo songsido kiko tükdebü aeto jungeilabü; Oh, no ladang ong kü jungto loula? küneibü chema ngei maangpon tangbüei pailabü.

³Kü thea ngei aikei amaibü apholabü; aoyou sepeinyu ngaida haoeneibü kümsilei ngei mangsenda; khoei kü to akhapetlabü.

⁴Ngüha alebü sensimaang kü ka banglabü, hoba müt amaibü angelabü.

⁵Aoei jembü lepbü sangmang to huphangshoua nyen shako nyikuda ngei hao mautilabü. Aoeibü maanga yonglam lilisese ki ngei hao üpyolabü.

⁶Ngeibü nyek kaonyeka maangtangbü thüka kilabü; khünei haoenei kü yoa kienlabü. Aoei tükdebü lamnyua paida, haoei ngo khangenlabü.

⁷Aoei khüpsilang kümda ngeibü chema akilabü; aoei yepeijaweko lauda, hao kü thedanga apholabü.

⁸Ngeyang weko kaonyeka amaibü pendou ngei mautilabü; BUNYUBOUeibü sangnyu ka amaibü kümbü pendou wapan aplabü.