Read Chang Naga NYENSANG CHIA 103 Bible Online

NYENSANG CHIA 103 - Chang Naga bible

NYENSANG CHIA 103

¹O kü soushou, BUNYUBOU haükushi! Hobaje kü to kibü pendouei hao saopobü nyen haükushi!

²O kü soushou, BUNYUBOU haükushi; hoba haoeibü thuibü shuong tema.

³Haoei kaibü shabü pendou apbuda; haoei kaibü shat pendou maitida.

⁴Haoei kaibü langkei püngkhün ka angthetda; haoei sanou hoba onouei ka la khun hankuda.

⁵Haoei maibüei no senyüh shemtida; khoei aulu tegü kaibü mütao hau haansang sinngaitida.

⁶BUNYUBOUei shieikoeko kibü pendou to saopobü kümsilei hoba ngühmai kümda.

⁷Haoei Mosa la haoeibü lamthen hoba Israel shousi shuong to haoeibü kümsilei kümbü ngetida.

⁸BUNYUBOU sanoudambü hoba onouei shenakei; khauangla maangyangsho hoba üeisanoua apsileko ki.

⁹Haoei ponpenje ühaklabü ayingsi hao khau angyoyoje akilabü.

¹⁰Seneibü shabü thüng haoei sen to ajungeida, ayingsi seneibü shedbü thüng sen la angaingouda.

¹¹Aishanga kaodak thükaenei saabüa müh kibü tegütham hao to souhatbü shuong to haoeibü üeisanou ki.

¹²Hobaje chanyu angbou ka chanyu nepbü sühko lai saan ki, khülokche heeko senei ngühkhüm lulimbü shedbü sen ka haoei sunglangkuda.

¹³Bouei jembü shousi shuong to sanoubü tegü, BUNYUBOUei hao to hatbü shuong to onouda.

¹⁴Aishanga sen aiei kümbei haoei ngeakei, sen thamngu ong dogo damenda.

¹⁵Müt shangaje haoeibü chalou shuong kho sang tegü ki; yama chipen tegü hao pungda.

¹⁶Aishanga kho thükto yei soujung danda hoba kho akiko apda; hoba kho kishang kho touje angelabü.

¹⁷Lausikei aoyouei haoeibü theyolanyobü jungeida, hoba aoyouei haoei sakkubü shuong jungeila damendaje

¹⁸BUNYUBOUeibü üeisanou hao to souhatbü shuong thüka ponpen thon akiko kida. hoba haoeibü ngühmai meten sünga kida.

¹⁹BUNYUBOUei haoeibü setshang mühshuonga kümakei; hoba hao sangle pendou thüka yaangenlabü.

²⁰BUNYUBOU haükushi, kan haoeibü khuthük hangangbü shuong; haoeibü ngüha nou haangashi, haoeibü ngüh ditbü kan hau yaangbü dan.

²¹BUNYUBOU sangashi, haoeibü lakjaibü dan pendou; hao khangenbü shuong aoyouei haoei maangangbü kümda!

²²BUNYUBOU sangashi, haoei songdakbü sangle pendou kabü khunak shousi shuong. BUNYUBOU sangashi, O kü soushou!