Read Chang Naga NYENSANG CHIA 104 Bible Online

NYENSANG CHIA 104 - Chang Naga bible

NYENSANG CHIA 104

¹O kü soushou, BUNYUBOU sangashi! O BUNYUBOU, ngeibü Mühghaü, no aeibou yaangkei! Nyi nyenhang hoba yaangenbü hele leakei;

²aoei ngesakbüei neisimei tegü no lolo lean ki; aoei neichem tegü müh shuong janglangan phokuda.

³Aoei jembüeibü thükkabou shemjang chayou deithüka phokuda; aoei sangmei shuong jembü kailong la yeitida; ao yeieibü kaak thüka paida.

⁴Aoei yeishuong haoeibü ngühlang künbü shuong yeitida. hao khangenbü shuong wanlong longbü wan la yeitida.

⁵Haoei kaodak kho thaonyu thüka kümbei; khünei kho ponpen atopeila shanga.

⁶Nyi kho neisimei tegü molodeiei yuklepbei; yungnyu shuong kho shongh thüka lokei.

⁷Nyi haksi haoen linkei; kaibü langmakei haoen tongde maukei.

⁸Shongh shuong longkei hoba yomang yankei; nyi haoen kümshang lambei.

⁹Haoen danjung asatla nyi leilang jakukei; khünei nyibou haoenei kaodak nyibou aküplepbei.

¹⁰Haoei shushou shuong yomang to koutida; shongh kanglanga haoen kouda.

¹¹Yamkabü meisiau pendou la haoenei dei yungtida; yamkabü gadu shuong senyühshemda.

¹²Haoen nyangko mühkabü aushuong haoeneibü kishang kia; bubhek shuong yoa haoenei chia lauda.

¹³Haoeibü thükkabou shemjang ka haoei shongh shuongla dei kuda; kaodak kaibü kümsilei shuong buhekei shenakei.

¹⁴Samkeisamuk shuong shanga sang, hoba müt shanga haoei kesiong longtikuda; khünei haoei shausiyung longtida.

¹⁵Hobaje müteibü maangpon olintila ih, hoba haoeibü thesak angtila onang; hoba müteibü maangpon hau kitila wentek.

¹⁶BUNYUBOUeibü bunyu shuong senyühshembo kia, Lebanon cedar bunyu shuong laobou haoei kekei.

¹⁷Khünei au shuongei hap huongda; Stork auei jembü hap fir bulonga kia.

¹⁸Shongh suokbü shuong kho yao shanga ki; hoba laanglip laangpob shuong kho sanshou shuong hushang ki.

¹⁹Haoei lit jihsiphai takletbü lenla shanga kümbei; chanyuei hao nepbü jihsiphai ngeda.

²⁰Nyi nakthühbü kümda hoba kho nangnak yeida, laoboua yamkabü meisiau pendou shoongaida.

²¹Molosaonyu paangshouei haitilabü meisiau lambo louda; hoba Mühghaüei kubü haoeneibü shausiyung lamda.

²²Ladang chanyu angda, haoen ngaida hoba laangpoba lengda.

²³Müt lulu kümtoleito hauda; hoba nang anakshongko kümdaleida.

²⁴O BUNYUBOU, kaibü kümsilei shuong lai juong ki! Haoen pendou nyi kaibü songsido maangli maangsangei kümbei; kaibü kümsileiei kaodak shenko kia.

²⁵Khünei yungnyu kia, yaangbü hoba phangayanga; lanei topeibü meisiau shuong wesi awekhümbo meisiau hanbü si yaangbü ham ki.

²⁶Khünei long shuong hauda; khünei nyi kümbü molojisang shuong shoongaiyoda.

²⁷Khübü pendouei, nyi haoen la jih tükdea haoen la shusiyung kula haiyeiko kida.

²⁸Nyi haoen la kubü haoenei yoshaida; nyi kaibü ik sengda hoba haoen maibüei phottida.

²⁹Nyi kaibü thenyek huanapjinei haoen khonkuda; ladang nyi haoeneibü shausiyung sunglangda haoen haida, hoba nyibou kao la yeida.

³⁰Ladang nyi kaibü hak yantilaje haoen pakenda; hoba nyi kaodak thenyek haanbü la yeitida.

³¹BUNYUBOU soneikangbü ponpen kitishima! BUNYUBOUei haoeibü kümaleia olinangko kishima.

³²Haoei kaodak to chühda hoba kho nyaakeida; haoei shongh shuong to meitida hoba haoenei wankhük angtida!

³³Ngo langkei ki shongko BUNYUBOU la ngei chia atkulabü; ngo langkei salang lalokche kilaje, ngei haoeibü nyen sanglabü.

³⁴Ngei damanchühbü hao junga sungletenlabü lele yingshima; ngo BUNYUBOUa olinangko kilabü.

³⁵Shabü shuong kaodak ka mautiashi; hoba amaibü touje tekiti. BUNYUBOU sangashi, kü soushou! Kanei BUNYUBOU sangashi!