Read Chang Naga NYENSANG CHIA 105 Bible Online

NYENSANG CHIA 105 - Chang Naga bible

NYENSANG CHIA 105

¹O BUNYUBOU la nyensang kuashi, hoba hao nyena ngaashi; mütshuong yoa haoeibü kümsilei shuong ngetiashi.

²BUNYUBOU la nyensang chia laukushi; haoeibü seikümseilei pendou shangabü lenashi.

³Hao nyena kan soneikangashi; BUNYUBOU lambü shuongeibü maangpon olinko kiashi.

⁴Kanei BUNYUBOU hoba haoeibü hau lamashi; athakko haoeibü thenyek lamashi.

⁵Haoei kümbü haoeibü seikümseilei kümsilei shuong, haoeibü maangpanglabü shuong, hoba haoeibü sembung matjembü damenashi.

⁶Haoei kümbü haoeibü seikümseilei kümsilei shuong, haoei pienbü Jakobeibü shousi shuong.

⁷Seneibü Mühghaü, BUNYUBOU hao ki; haoeibü matjem pendou aenei kia.

⁸Haoei haoeibü thebülanbü laobou ngüh meten hajar che la sakkua kho ponpen damenko kia.

⁹Abraham to haoeibü theletlanletbü, hoba Isak to haoeibü theyolanyobü ponpen kilabü.

¹⁰Hobaje haoei Jakob to ho ngekletbü ngühkhüm, hoba Israel to thonsithak akiko theyolanyobü phokei.

¹¹Ngei kan la Kanan kaodak kaneibü phejan hoba phetphan la kuda dogo laukei.

¹²Ladang haoen lühbak shisho ong kikei, haü, aeibou shisho ong hoba khünei yenla lean kikei.

¹³Ladang haoen phang che ka phang che to hauko longeiko lekei, hoba sangle che ka lubü müt jungto haukei.

¹⁴Haoei müt aolakei haoen la amaibü akümti; haü, haoen shanga haoei Choba shuong to maangsanglabü lenkei.

¹⁵Ngei makenko pienbü shuong to temeiti, hoba ngeibü thuseibü shuong to amaibü teküm.

¹⁶Hobaje kaonyek thükto haoei limsilang ngabakei; haoei shausiyung kibü pendou leilutikukei.

¹⁷Haoei haoen thedang to müt che hautikei; Josef sambü lela hautian kikei.

¹⁸Haoeibü you namlühei haoenei leilutikukei, hoba hao namlühei khühan phokei.

¹⁹Haoeibü ngüh haüthükko alou shongko BUNYUBOUeibü ngühei hao takteikei.

²⁰Chobaei hao hautikei; khei phangshuong thüka songdakbouei hao litikei.

²¹Haoei hao Chobaeibü chema bunyu yeitikei; hoba haoei kibü pendou thüka songdakbou;

²²khei, hao maangleko konglebü shuong lenenla, hoba jaishou shuong la songsido lenla yeitikei.

²³Israel toukei Ijep to loukei; Ham kaodaka Jakob kikei.

²⁴BUNYUBOUei hao mütli juong haatikei, hoba haoeneibü dangbou shuong toje haoen hau kibou yeitikei.

²⁵Haoenei hao mütli mangsentila, hoba hao khangenbü to khüpbolangko kümtila haoei haoeneibü maangpon jaksheitikukei.

²⁶Kheijinei haoei hao khangenbü Mosa, hoba haoei pienbü Aron hautikei.

²⁷Haoei haoeibü tetsida shuong haoen yoa phokukei; hoba Ham kaodaka seikümseilei shuong kümbei.

²⁸Haoei nakthühbü hautikei, hoba kho nakthühtham apbei; lausikei haoenei haoeibü ngüha ale.

²⁹Haoei haoeneibü dei shuong sii la yeitikei; hoba haoeneibü ngau shuong haitikei.

³⁰Haoeneibü kaonyek yukei paklepbei; haoeneibü Chobachem yoan.

³¹Haoei joyokei hoba meishou dan loukei; hoba haoeneibü kaodak pendoua haatsihek paktikei.

³²Lang jeila haoei haoen la senlang kukei; hoba haoeneibü kaoa wanlüh longtikei.

³³Haoei haoeneibü semlühlaak hoba haoeneibü bhuk haitikei, hoba haoeneibü kaodak kabü bunyu shuong leilutikei.

³⁴Haoei joyokei hoba koksüng pühtikei, hoba aweenko khuloujuche kikei;

³⁵hoba haoen kaodaka pikyik pendou shaukhümbei; hoba kaonyua yembü shusiphon khümbo künkei.

³⁶Haoei toukei shaang bukbü pendou, khei haoeneibü shaangbü shou pendou haitikei.

³⁷Kheijinei haoei chandinam si hon yoa Israel leiyenkei.

³⁸Haoen kukjung satjinei Ijepbü olinko kikei; aishanga haoen thüka hatlabüei sühan kiteikei.

³⁹Thangetla shanga haoei sangmei la khuileptikei, hoba naangnak ngesakbü kula shanga wan.

⁴⁰Haoenei hikei hoba haoei auwet sungbakukei; hoba mühka shausiyungei haoei haoen senyüh shemtikei.

⁴¹Haoei laang ngümnyinkei hoba dei koutikei; haoen phetsen kaodaka shumang tegü koutikei.

⁴²Aishanga haoei haoeibü saopobü ngüh hoba hao khangenbou Abraham damenkei.

⁴³Hobaje haoei jembü mütli olinbüei leiyenkei; hoba haoei pienbü shuong chia lauko leiyenkei.

⁴⁴Hobaje haoei haoen la phangshuongeibü kaonyek kukei; mütshuongei mouenbü haoenei lekei.

⁴⁵Khünei haoenei haoeibü sakkubü ngühkhüm pholabü, hoba haoeibü ngühkhüm shuong jungeilabü.