Read Chang Naga NYENSANG CHIA 106 Bible Online

NYENSANG CHIA 106 - Chang Naga bible

NYENSANG CHIA 106

¹Kanei BUNYUBOU sangashi! O BUNYUBOU to olinbü lenashi; aishanga hao maibü ki; haoeibü üeisanou ponpen kida.

²Aoei BUNYUBOUeibü kümsilei yaangbü shanga lenenla; ayingsi haoeibü nyenhang pendou aoei phinthonenla?

³Aoyouei ngühmai jungeida, aoyouei jih pendoua tükde kümda haoen haübou.

⁴Kaibü mütli ae kaibü sangle lenjinei ngo damenshima; O BUNYUBOU, O kaibü khümenbüei ngo peanchühshima.

⁵Khünei kaibü pienbü shuong naangmaibü ngei hapenlabü, khünei kaibü phang olinbüa ngo olinko kienlabü; khünei kaibü phetphan yoa ngo soneikangko kienlabü.

⁶Küneibü pisibouei tegü künei shabü jungeia, künei shabü shedbü shona hoba künei amaibü küma.

⁷Küneibü pisibouei Ijepa kaibü seikümseilei shuong aditen; haoenei kaibü üeisanou juong adamen lausikei yungnyua, khei saklangbü yungnyua khulimbo meimeikei.

⁸Khei yingsikei haoei haoeibü hau yaangbü ngetikei; haoeibü nyen shanga haoei haoen khümenkei.

⁹Haoei toukei saklangbü yungnyu to hakkei, hoba kho ulangtham apbei; hibü yungnyu danko khongthua tegü haoei haoen leian haukei.

¹⁰Haoen to aoei mangsenkei haoeibü ik ka haoei haoen khümenkei; hoba dangboueibü ik ka haoen angthetkei.

¹¹Lausikei deiei haoen khulimbü shuong nyembei; haoen che ongkei ajou.

¹²Kheijinei ong haoenei haoeibü ngüh mailembei; haoenei haoeibü nyensang chia laukei.

¹³Haoenei tongde haoeibü kümsilei shuong maan apbei; haoenei haoeibü songsido maibü haiteiko aki.

¹⁴Lausikei yama haoenei dühko yeikei; hoba phetsen kaodaka Mühghaü takteikei.

¹⁵Hobaje haoenei subüjabü haoei haoen la kukei; hoba haoen thük to shatsinyat hautikei.

¹⁶Haoenei toukei sühshanga Mosa si Aron, BUNYUBOUeibü saopobü to nyek to shatkei.

¹⁷Kao kho paknyinkei hoba Dathan suian apbei, hoba Abiram eikshuong küplepbei.

¹⁸Hobaje haoen shuong yoa wan longkei, hoba wanlong khoei amaibü dan juoketkei.

¹⁹Haoenei masu paangshou che Horeba kümbei, hoba tühnyinan kümbü heangsho noksa lembei.

²⁰Kho tegü haoenei Mühghaü soneikangbü kho sangshaubü masu noksa to jeiyokei.

²¹Haoen khümenbou, haoeneibü Mühghaü aoei Ijepa kümsilei yaangbü kümbei hao maakei.

²²Aoei Ham kaodaka seikümseilei shuong hoba saklangbü yungnyua hatlamoklabü kümsilei shuong kümbei, hao maan apbei.

²³Khoei haoei haoen shemtilabü dogo laukei; haoei pienbü Mosaei haoen haoei shemtibula dogo hao khauangbü ka sepeitila hao junga kaanglanga lokei.

²⁴Haü, haoenei kaodak maibü to nyikukei, haoenei haoeibü ngüh to maialem.

²⁵Lausikei haoenei neichema nyamnyambei, hoba BUNYUBOUeibü ngüha ale.

²⁶Khoei yama haoen mautila haoei haoen thükto ik shingkei;

²⁷hoba khei phangshuong yoa haoei haoeneibü shousi shuong lintilabü, hoba kaonyua haoen phinnyintila tetkukei.

²⁸Haoen lolo Peorbü Baal to yokei, hoba haibü to lembü sabüa haitibü shaukei.

²⁹Kho tegü haoenei jembü kümsileiei hao khauangtikei; hoba haoen thükto shatlim loukei.

³⁰Kheijinei Finehas lokei, hoba matjem kayang kukei; hoba lim kho lothetkei.

³¹Hobaje ponpen shanga meten meten lauko haoen shanga kho saopobü danko kümbei dogo weeikei.

³²Tokei haoenei hao Meriba deia khau angtikei, hoba haoen haangjung Mosa shedbüla yeitikei.

³³Aieilausi haoenei haoeibü Soushou khauektham aptikei; hoba Mosaei damanachühko ngüh laukei.

³⁴BUNYUBOUei haoen la sakkubü tegü, haoenei mütshuong ashemti;

³⁵lausikei haoen lolo phang shuong to souyokei; hoba haoeneibü kümsilei shuong ditletkei.

³⁶Hobaje haoenei haoeneibü heangsho khangenkei; laobou haoen shanga sung che yeikei.

³⁷Haü, haoenei haoeneibü jayang nouyangshou shuong shabü mühghaü la lembü kukei.

³⁸Hobaje shedbü akibü haoeneibü jayang nouyang shuongeibü sii phinkei hoba Kananbü heangsho la lembü kukei; hoba kho tegü kümbü siiei kaonyu dotnyinkei.

³⁹Haoeneibü kümsileiei haoen shaanapbei; hoba haoenei kümbüleibüei haoen lolo Mühghaü junga alanko yeikei.

⁴⁰Hibü hao mütshuong to Mühghaü khauangkei hoba jembü phetsihek to the shoukei.

⁴¹Haoei haoen phangshuong la kuan apbei hoba haoeneibü dangbouei haoen thüka songdakkei.

⁴²Dangbou shuongei haoen khonkutikei hoba haoeneibü ikmaang to senan jinkei.

⁴³Annebenko haoei haoen püetkei, lausikei haoenei tukosekko ngüm kaangkei hoba shabüa aei aei nyembei.

⁴⁴Khei yingasikei, BUNYUBOUei haoenei ngekbü ditkei; hoba haoei haoeneibü khonku chühkei.

⁴⁵Haoen laüa haoei haoeibü thesilan damenkei, hoba haoeibü sanou yaangbü danko haoei maangpon senetkei.

⁴⁶Haoen langsenbü phangshuong pendou la haoei haoen to sanoutikei.

⁴⁷Kün khümenashi, O BUNYUBOU, küneibü Mühghaü, hoba kün olinlabü hoba kaibü saopobü nyen sanglabü lele, phangshuong yo ka kün leiyenkai.

⁴⁸BUNYUBOU, Israel Mühghaü sangashi; tou hoba ponpen thonsithak akiko hao sangshi! Müt pendouei “Amen!” dogo laushi.