Read Chang Naga NYENSANG CHIA 107 Bible Online

NYENSANG CHIA 107 - Chang Naga bible

NYENSANG CHIA 107

¹“BUNYUBOU la nyensang kuashi, aieilausi hao maibü ki; haoeibü sanou thon aki!”

²BUNYUBOUei angthetbü shuongei khei laushi. Haoei kan kaneibü dangbou labou ik ka angthetkei,

³hoba kaonyek shuong ka leishaikei, chaangbou aeka hoba chanep ka yungkük ka hoba yungthang ka leishaikei.

⁴Haoen yama sangliphanga nongeikei; haoenei müt kibü sangnyu ühüp.

⁵Mühei haiko hoba deilako, haoeneibü soushou haoen to semthetnyu apbei.

⁶Kheijinei haoen khonkua haoenei BUNYUBOU to ngekei, hoba haoei haoen khonsak ka khümenkei.

⁷Haoen müt kibü sangnyu to atlabü lele, haoei tokei haoen tangbü to leikei.

⁸Haoei maibü shanga hoba mütshuong to haoeibü maangpanglabü kümsilei shanga, mütshuongei BUNYUBOU nyen sangashi.

⁹Aishanga dei lako kibü soushou haoei deilamang maitida, hoba müei haiko kibü soushou haoei maibüei shentida.

¹⁰Müt at nakthühbüa hoba haibü yemkaoa, khonku khonsak hoba namlühei khühan setan kida.

¹¹Aieilausi haoenei Mühghaü ngüh khulimbo meimeikei; hoba thükkabou song maibü aweasüng.

¹²Haoeneibü maangpon kümsilei sekbü kümbüei maang khüntian kikei.

¹³Kheijinei haoen khonsaka haoenei BUNYUBOU to ngekkei, hoba haoei haoeneibü maangshat ka haoen khümenkei.

¹⁴Haoei haoen nakthüh ka hoba haibü yemkao ka leiyenkei, hoba haoeneibü khühbü thettikei.

¹⁵Haoei maibü shanga hoba müteibü shousi shuong la haoeibü maangpanglabü kümsilei shanga BUNYUBOU nyen sangtiashi.

¹⁶Aishanga haoei chinam bakhün leilutikei, hoba nameibü thangtet wapthetkukei.

¹⁷Haoeneibü kümsilei amaibü haangjung, hoba haoenei shedshonbü haangjung nyangko loukei.

¹⁸Shausiyung phang pendou haoenei mangsühkei, hoba haoen haibü bakhün nyangko loukei.

¹⁹Kheijinei haoen khonsaka haoenei BUNYUBOU to ngekkei; hoba haoei haoen maangshat ka khümenkei.

²⁰Haoei haoeibü ngüh hautikei hoba haoen maitikei hoba haoen maulabü ka püetkei.

²¹Haoei maibü shanga, hoba müteibü shousi shuong to haoeibü maangpanglabü kümsilei shanga, mütshuong la BUNYUBOU sangtiashi.

²²Haoen la nyensangkubü lembü kutiashi, hoba haoeibü kümsilei shuong chia lauko sangtiashi.

²³Aoyou longchema yungnyua phongda, khei dei yaangbüa namyak namseida,

²⁴khübü khokei BUNYUBOUeibü kümsilei shuong, hoba haoeibü maangpanglabü shuong yungnyua hapda.

²⁵Aishanga haoei sakkuda hoba yeithu yeinak longtida, laobouei khüka deishou longtida.

²⁶Haoen müh to angda nyibou haoen yungnyu haübü to yanda, khonkubü haangjung haoeneibü soushou tühnyinda.

²⁷Jiji to haoen kaiyoda hoba ihei jakbü shuong tegü ngomeida. hoba haoenei aiongkei akümda.

²⁸Kheijinei haoen khonsaka haoenei BUNYUBOU to ngekda; hoba haoei haoen ngangbü ka leiyenkei.

²⁹Haoei yeinak sangsemtida, hibü kho deishou atopeiko ki.

³⁰Kheijinei haoen olinyokei aieilausi haoen sangsembo kikei; hibü haoei haoenei chüheibü satenshang to leian loukei.

³¹Haoei maibü shanga hoba müteibü shousishuong la haoeibü maangpanglabü kümsilei shuong shanga, mütshuongei BUNYUBOU nyen sangtiashi.

³²Mütshuong kambüa tokei haoenei hao yaangtishi; hoba khuleibü shuong shaishanga hao nyen sangtiashi.

³³Haoei shumang shuong phetsen kao la yeitida, hoba koubü dei ulangtham aptida.

³⁴Haabü kibü kaoei jem kao yeitida, aishanga khünei aoyou ki haoeneibü kümsilei amaibü haangjung ki.

³⁵Haoei yama deiei sii yeitikei, hoba kaolinei deishumang yeitida.

³⁶Hobaje haoei khünei mühei haiko kibü shuong kitida, khünei haoenei kishang sangnyu kümda.

³⁷Hobaje seka lilabü phinda hoba semlüh keda, laobouei hek hekkuda.

³⁸Haoei tokei haoen la haükuda, khoei haoen juong haatida; hoba haoei haoeneibü samkeisamuk shatsinam haatikuda.

³⁹Nyibou khonku khonsak hoba maangshat danko, haoen shibou hoba thopjung ngaian kia.

⁴⁰Haoei konglebü shuong la awealaubü khüpan jinkuda; hoba lanei lamnyu aki khünei haoen shoongtida.

⁴¹Khei yingsikei shalebü shuong khonku khonsak ka haoei thükaeto tonenkuda, hoba san shuong tegü hao chempen shuong haatida.

⁴²Maanglanbüei kho haplabü hoba olinko kilabü; hoba amaibü pendouei jembü sembung khinlabü.

⁴³Aoyou songsihon ki khübü kümaleia maangkuashi; hoba haoenei BUNYUBOU sanoudambü shangabü daman chühashi.