Read Chang Naga NYENSANG CHIA 109 Bible Online

NYENSANG CHIA 109 - Chang Naga bible

NYENSANG CHIA 109

¹Ngei sangbü Mühghaü, no semetham tekima!

²Aishanga ngo khulimbo amaiboueibü sembung hoba lepbülangbü sembung haoenei ipa; haoenei yepeijawebü lishangei joyoa.

³Mangsenbü ngühei haoenei ngo kailepa; hoba ai ayingnyu ngo khulimbo ik atda.

⁴Ngeibü sanou jeiko haoen ngeibü dangbou shuong yeia; lausikei ngei haoen shanga welauda.

⁵Haoenei kü la maibü jeiko amaibü, hoba sanou jeiko mangsenbü kuda.

⁶Nyi hao thea müt amaibü che phokuashi, hoba hao aenei dangbou che lotikuashi.

⁷Ladang haoeibü matjemlaje haoeibü shedbü longtiashi; haoeibü welau shabü yeitishi.

⁸Haoeibü salang tuisho ong yeitishi; lubüei haoeibü setshang sotiashi.

⁹Haoeibü shousi shuong bou akibü la yeitiashi. hoba hao yak latnyu yeitiashi.

¹⁰Haoeibü shousishuong kishang akibü yeitishi, hoba hishau hiyungtiashi; hoba kishang akiko shiang lamtiashi.

¹¹Soshau soyungbüei haoei kibü pendou letiashi; hoba haoei kean ongenbü küksithangei makjung sattiashi.

¹²Hao to sanoudambü lenla ao tekiti; ayingsi haoen bou akibü shousishuong to aoeikei sanou tekiti.

¹³Haoeibü lilabü wapan aptiashi; loulabü metena haoeneibü nyen haman aptiashi.

¹⁴Haoeibü bousi shuongeibü shedbü BUNYUBOUei damentishi; hoba haonyueibü shabü haman tüpti.

¹⁵Khübü kho BUNYUBOU thea athakko kitishi; khünei haoei kaodak ka haoen amako kibü wapan apbula thükkei.

¹⁶Aieilausi haoei sanoudambü lenla adamen; lausikei shalebü hoba khambü müt, hoba maangpon leilubü müt, haoen wapettila haoei lambei.

¹⁷Haü, haoei khüksiuok sanoukei hoba kho hao thük to loukei; hoba haülabüa hao aolin, hoba kho hao jungka lounyu heean kikei.

¹⁸Khüksiuok kho haoei neisimei tegü lekei; hoba kho dei tegü hao to lotkei; hoba onang tegü haoeibü lo to atkei.

¹⁹Kho hao shanga hao lolo hao küplepbü neisimei tegü yeitiashi; hoba kaiyoyo khüpbü haoeibü shembe tegü yeitishi.

²⁰BUNYUBOU ka ho ngeibü dangbou shuong thük to yingtishi; hoba ngeibü langkei khulimbo amaibü laubü shuong shangabü pailetbü ki.

²¹Lausikei, O Mühghaü BUNYUBOU, ka nyen laüa, nyi kü shanga kümshima; aieilausi kaibü üeisanou maibü ki; nyi ngo khümenashima.

²²Aishanga ngo shalebü hoba akialebü müt, hoba ngeibü maangpon maangkabou leiluakei.

²³Chasembü mangh sünglou tegü ngo danjung hauda, koksüng tegü ngo angko yanko seengeida.

²⁴Mühei nyengbüei ngeibü youkük hau aki; hoba ngeibü phe nyaületda.

²⁵Tokei ngo haoen thedanga aweasünglabü yeitiakei; ladang haoenei ngo haplaje haoenei haoeneibü khu ngomeida.

²⁶Kü to thuikai, O BUNYUBOU, ngeibü Mühghaü! Kaibü üeisanou thüng ngo khümenshima.

²⁷Khünei haoenei ho kaibü ik dogo ngelabü; khei no BUNYUBOUei ho kümbei dogo ngelabü.

²⁸Haoenei khükla okla thükkei lausikei nyije haükushi; ladang no lakseplaje haoen himousele kilabü, lausikei no khangenbouje olinangko kilabü.

²⁹Ngeibü dangbou shuong himouei yukleptiashi; hoba haoen lolo haoen jembü himouei hele lebü tegü lelepbushi.

³⁰Ngei BUNYUBOU la kü sembungei nyensang yaang kulabü; haü, shuong yoa ngei hao sanglabü;

³¹aishanga aoei hao yuktila khübü ka hao khümenlabü; hao shalebüeibü mae aenei lokuda.