Read Chang Naga NYENSANG CHIA 115 Bible Online

NYENSANG CHIA 115 - Chang Naga bible

NYENSANG CHIA 115

¹Kün shanga aying, O BUNYUBOU, kün shanga aying, lausikei ka nyen shanga soneikangbü kushi; kaibü sangle shanga hoba kaibü mailemenbü shanga.

²Aila phangshuongei, “Tou kaneibü Mühghaü lanei ki,” dogo phetila?

³Lausikei seneibü Mühghaü je mühshuong yoa kia; haoei ai ong maangangkei haoei küma.

⁴Haoeibü heangsho shuong chandinam si hon, müteibü ikei kümbü kümsilei ki.

⁵Haoen la sembung kia lausikei haoenei ajoyoda, haoen la nyek kia lausikei haoenei ühüpda.

⁶Haoen la nou yemakei lausikei haoenei aditda; Haoen la kung kia lausikei haoenei lüm ajemda.

⁷Haoen la ik yemakei lausikei haoenei akümaleida; haoen la you yemakei lausikei haoen apaida; ayingsi haoeneibü sanglou ka ngüh alongda.

⁸Aoyouei haoen kümbei, hoba mütpem weko aoyouei haoen to maanglemda, haoen kho phatko yeilabü.

⁹O Israel, nyi BUNYUBOU to maanglemshi; hao haoeneibü thuibü hoba haoeneibü aih ki.

¹⁰O Aron chung, kanei BUNYUBOU to maanglemashi; hao haoeneibü thuibü hoba aih ki.

¹¹Kan BUNYUBOU to hatbü shuong BUNYUBOU to maang lemashi; hao haoeneibü thuibü hoba haoeneibü aih ki.

¹²BUNYUBOUei sen shanga dambuda hoba haoei sen haükuda; haoei Israel chemdang haükulabü, haoei Aron chemdang haükulabü.

¹³Haoei BUNYUBOU to hatbü shuong hanbü si yaangbü ham haükulabü.

¹⁴BUNYUBOUei no hoba kaibü shisishousi shuong ponpen haati yaangtishi.

¹⁵Müh si kao kümbou BUNYUBOUei kan haükushi.

¹⁶Müh shuong kho BUNYUBOUeibü mühshuong ki; lausikei kaodak kho müteibü shousi shuong la kukei.

¹⁷Haibüei BUNYUBOU asangda, ayingsi ao yemsang to kouda haoei asangda.

¹⁸Lausikei kün langkeibüei BUNYUBOU la ho chalou ka ponpen thon akiko nyensang kulabü. Kanei BUNYUBOU sangashi!