Read Chang Naga NYENSANG CHIA 116 Bible Online

NYENSANG CHIA 116 - Chang Naga bible

NYENSANG CHIA 116

¹Ngei BUNYUBOU to sanouda, aishanga haoei kü ngüh hoba ngeibü subüjabü ditkuda.

²Aieilausi haoei kü jungto haoeibü nou sepeikuda; khoei lalokche langkei kilaje khülokche ngei hao to ngalabü.

³Haibü lühei ngo jenlepa hoba Sheol khonkuei kü to süha; ngei khonku hoba maangshat hapa.

⁴Kheijinei ngei BUNYUBOU nyena ngakei; O BUNYUBOU, ngei ka to sudajada, ngeibü langkei khümenshima.

⁵BUNYUBOU onoubü ki hoba saopobü ki; haü, seneibü Mühghaü sanoudambü ki.

⁶BUNYUBOUei maanglanbü shuong kaplepnyu phoda; ngo nakan yantian kikei hoba haoei ngo khümenkei.

⁷O ngeibü soushou, kaibü haksoshang to ngaiashi; aishanga BUNYUBOUei ka to maian jungeia.

⁸Aishanga haibü ka ngeibü langkei, hoba nyeksi angbü ka ngeibü nyek, hoba tuongbü ka ngeibü you nyi khümenkei.

⁹Ngo BUNYUBOU thedanga langkei kibü kaodaka pailabü.

¹⁰Ngei mailemda, hibü ngei joyoda; ngo aibou khonkuko kikei.

¹¹Ngei ngo kongbüa lauda, müt pendou yepeijawebü shuong ki.

¹²Ngei BUNYUBOU la kü to maibü pendou shanga ai kula?

¹³Ngei khümenbü thung tonenlabü; hoba BUNYUBOUeibü nyena ngalabü.

¹⁴Ngei BUNYUBOU la ngeibü theletbü kulabü; haü, haoeibü mütli pendou thedanga.

¹⁵BUNYUBOU thedanga haoeibü saopobü shuong haibü namsek ki.

¹⁶O BUNYUBOU, maimaitham ngo no khangenbou ki; Ngo kaibü khangenbou, kaibü sambüsaoeibü bousushou ki; nyi ngeibü aaothu ka sengkua.

¹⁷Ngei ka la nyensangbü lembü kulabü, hoba BUNYUBOU nyena ngalabü.

¹⁸Ngei BUNYUBOU la ngeibü thebülanbü kulabü, haü, haoeibü mütli pendou thedanga;

¹⁹BUNYUBOUeibü chemsophanga, O Jerusalem, kaibü chemyaaka. Kanei BUNYUBOU sangashi!