Read Chang Naga NYENSANG CHIA 118 Bible Online

NYENSANG CHIA 118 - Chang Naga bible

NYENSANG CHIA 118

¹O BUNYUBOU la nyensang kuashi, aishanga hao maibü ki, aishanga haoeibü üeisanou ponpen thon akiko kida.

²Tou Israelei “Haoeibü üeisanou ponpen thon aki,” dogo lauashi.

³Tou Aron chemdangei “Haoeibü üeisanou ponpen thon aki,” dogo lauashi.

⁴Tou BUNYUBOU to soumo hatbü shuongei “Haoeibü üeisanou ponpen thon aki,” dogo lauashi.

⁵Ngeibü maangshat ka ngei BUNYUBOU to ngakei; BUNYUBOUei kü to jongaikei hoba ngo ongabü kaoena phokukei.

⁶BUNYUBOU kü aenei kia, ngo ühütlabü; mütei kü la ai kümbula?

⁷BUNYUBOU kü aenei kü to thuila kia, khei yingsije aoyouei kü to mangsenda haoen thükto thüksimina ngei chühlabü.

⁸Müt to maanglembü toje BUNYUBOU to maanglembü maibou.

⁹Kongnyu shuong to maanglembü toje BUNYUBOU to maanglembü maibou ki.

¹⁰Phang pendouei ngo kailepa; BUNYUBOUeibü nyena haoen pendou ngei wapan aplabü.

¹¹Haoenei ngo kailepkei, haü, komlepsikei BUNYUBOU nyena ngei haoen mautilabü.

¹²Naoei tegü haoenei ngo joplepbei, sang jikan apbü wan tegü haoen longda; BUNYUBOUeibü nyena ngei haoen mautilabü.

¹³Ngo tuonglabü lele kaang jaangkei; lausikei BUNYUBOUei kü to thuikei.

¹⁴BUNYUBOU ngeibü hau hoba ngeibü chia ki; hao ngeibü khümenbou la yeiakei.

¹⁵Saopobü shuongeibü neichema uihinbü hoba khümenbü ngühlang kia; “BUNYUBOUeibü mae ikei thüktimintia.

¹⁶BUNYUBOUeibü mae ik tonenakei; BUNYUBOUeibü mae ikei thüktimintia.”

¹⁷Ngo hailabü jeiko, lang kilabü; hoba BUNYUBOUeibü kümsilei shuong phinthonlabü.

¹⁸BUNYUBOUei kü to aeibou hakkei; lausikei haoei ngo haibü la aku.

¹⁹Saopobü bakhün kü la ipbushima; khüto ngo atlabü hoba ngei BUNYUBOU la nyensang kulabü.

²⁰Ho BUNYUBOUeibü bakhün ki; saopobü shuong ong khüto atlabü.

²¹Ngei ka la nyensang kulabü, aishanga nyi kü to jongaikei, hoba ngeibü khümenbü la yeiakei.

²²Chemdangbü shuongei laobou laang ale, chemnyeka kongnyu la yeiakei.

²³Ho BUNYUBOUei kümbü kümsilei ki; sen thea ho maangpanglabü.

²⁴BUNYUBOUei kümbü chalou kho ho ki; sen olinyolabü hoba khonei sen olinko kilabü.

²⁵Tou khümenashi, künei ka to sudajada, O BUNYUBOU, O BUNYUBOU, künei ka to sudajada; tou thüksimin hautibüma.

²⁶BUNYUBOUeibü nyena ao louda, hao haübou yingshi; BUNYUBOUeibü chem ka künei no haükulabü.

²⁷BUNYUBOU kho Mühghaü ki, hoba haoei sen la ngesakbü kuakei. Lem lilabü kho bhek yoan thepshaiashi, haü, lemshon kabü laanga khühashi.

²⁸No ngeibü Mühghaü ki, hoba ngei ka la nyensang kulabü; no ngeibü Mühghaü ki, ngei no tonenlabü.

²⁹O BUNYUBOU la nyensang kuashi, aishanga hao maibü ki; aishanga haoeibü üeisanou thon akiko kida.