Read Chang Naga NYENSANG CHIA 119 Bible Online

NYENSANG CHIA 119 - Chang Naga bible

NYENSANG CHIA 119

¹Aoyoueibü lamnyu shedbü aki, aoyouei BUNYUBOUeibü ngühkhüma paida haoen haübou.

²Aoyouei haoeibü ngühkhüm shuong jungeida, aoyouei maangpon khümboei kho lamda, haoen haübou.

³Haü, haoenei asaopobü akümda; haoenei haoeibü lamnyua paida.

⁴Nyi kaibü ngühkhüm shuong, künei haujembo jungeila kün la sakkukei.

⁵Oh, kaibü sakkubü ngühkhüm shuong jungeila ngeibü lamnyu shuong kaangkhühtham küman kikei yingma!

⁶Ladang kaibü sakkubü pendoua ngei souhatko kilaje kheijinei ngo himauko akilabü.

⁷Ladang kaibü saopobü matjem ngei ditletlaje, ngei ka la shedbü akibü maangponei nyensang kulabü.

⁸Ngei kaibü ngühkhüm shuong jungeilabü, O ngo lemailela tenangletma!

⁹Heshou cheei haoeibü lam lai hinseian phoenla? Kaibü ngühkhüm to ngühalebü danko.

¹⁰Ngeibü maangpon khümboei no lama, O kaibü sakkubü ngühkhüm ka ngo teshoongaiti.

¹¹Ngei kakhu limbo shabü ashonla ka ngüh kü maangpona thanakei.

¹²Kaibü nyen haübou, O BUNYUBOU, kü la kaibü ngühkhüm shuong lenbüma.

¹³Kaibü sembung kabü kaibü song pendou, ngei kü sembungei phinthonda.

¹⁴Ngo ka ngühkhüm shuonga, nyakanama olinbü tetche olinangko kida.

¹⁵Ngei kaibü ngühkhüm damanchühda, hoba kaibü lamnyua souhatda.

¹⁶Ngei ngo lolo kaibü sakkubü ngühkhüma olinda; ngei kaibü ngüh amalabü.

¹⁷Kaibü khangenbü yoa, ngo langkei kienlabü lele onou lenko jungeishima.

¹⁸Kaibü ngühkhüm ka maangpanglabü peisilei shuong ngei hapenlabü lele nyi ngeibü nyek ipbushima.

¹⁹Kaodaka ngo yenbou che ki, kaibü sakkubü shuong kü ka tehuma.

²⁰Ngei kaibü song ngühkhüm jih pendoua maangdakbüei lamda.

²¹Lilibü shedsikhau bauan kibü shuong aoyouei kaibü sakkubü ka bangjung satda, haoen to nyi hakda.

²²Kü ka himou hoba nyikubü sungngaishima, aishanga ngei kaibü ngühkhüm shuong jungeia.

²³Tokei leiyeibü shuongei ngo khulimbo huon lambo setasikei, kaibü khangenbouei kaibü sakkubü ngühkhüm shanga damanchühlabü.

²⁴Kaibü ngühkhüm shuong tokei ngeibü olinbü hoba ngeibü damanchühbü shuong ki.

²⁵Ngeibü soushou kaoa senetakei; kaibü ngüh tegü ngo sisiktiashi.

²⁶Ngei kaibü lamnyu shuong ngetikei hoba nyi kü to jongaikei; nyi kü la kaibü lamnyu shuong lenbüma.

²⁷Kü la kaibü ngühkhüm shuong lamnyu ditenlabü lele yeitishima; hibü khoei ngei kaibü maangpanglabü kümsilei shuong shanga damanchühlabü.

²⁸Maangto shatbüei ngo thopjung ngaian kia, kaibü ngüh tegü ngo phonkaima.

²⁹Amlangbü lam shuong kü ka lounyu bangtiashi; hoba sanouko kaibü ngühkhüm kü la sakbüma.

³⁰Maanglembü lamnyu ngei piena; kü thedanga ngei kaibü song ngühkhüm jungakei.

³¹Kaibü ngühkhüm shuong to ngei hatlepda; O BUNYUBOU, ngo himouko tephokuma.

³²Ladang nyi ngeibü maangpon yaangtilaje, ngo kaibü sakkubü lam to laanglabü.

³³O BUNYUBOU, kaibü sakkubü ngühkhüm kü la lenbüma; hoba kho ngei thon sühko jungeilabü.

³⁴Kü la ditenbü labü, hoba ngei kaibü ngühkhüm jungeilabü, haü, ngei ngeibü maangponei kho jungeilabü.

³⁵Kaibü ngühkhüm lamnyua ngo hautishi; aishanga khünei ngo olinda.

³⁶Kaibü ngühkhüm shuong ae ngeibü maangpon yeitishi, hoba ailamaiphop ae aying.

³⁷Jim akibü to chühbü ka ngeibü nyek sepeitishi; hoba kaibü lam shuonga ngo pitilemtiashi.

³⁸No khangenbü shanga kaibü thebülanbü kaangaitiashi; laobou ka to souhatbü shuong shanga ki.

³⁹Himou laobou ngei hatda, kü ka kuktiashi; aishanga kaibü ngühkhüm deikhüm maibü ki.

⁴⁰Chühashi, kaibü ngühkhüm shanga ngei chüheida, kaibü saopobüa ngo kümetkushi.

⁴¹O BUNYUBOU, tokei kaibü üeisanou, khei kaibü khümenbü kaibü ngüh tegü kü jungto loutishima.

⁴²Hibü kü la nyikubü la jongaibü che kuenlabü; aishanga ngei kaibü ngüha maanglemda.

⁴³Kü sembung ka ngühmai ngüh lemailela telangma; aishanga kaibü ngühkhüma ngei maanglembo kikei.

⁴⁴Hibü ngei athakko kaibü ngühkhüm ponpen thon akiko jungeilabü.

⁴⁵Hobaje ngo atoknokko kuilabü; aishanga ngei kaibü ngühkhüm shuong lambei.

⁴⁶Tokei ngei Choba shuong yoa kaibü ngühkhüm shuong joyolabü, hoba himouko akilabü.

⁴⁷Hobaje ngo lolo kaibü sakkubü shuong laobou ngei sanouda, khonei olinlabü.

⁴⁸Hobaje kaibü sakkubü ngühkhüm shuong laobou ngei sanouko ki, tokei ngeibü ik tuoklabü; hoba kaibü sakkubü ngühkhüma ngei daman chühlabü.

⁴⁹No khangenbou la ngühmai damentiashi, aieilausi nyi kü la maanglem kitikei.

⁵⁰Ngeibü khonsak ka ho ngeibü hakso ki; aieilausi kaibü ngühei ngo sinngaitikei.

⁵¹Yonglam lilibü shuongei ngo aeibou awealau; khei yingasikei ngo sepeinyu angai.

⁵²Shangiednyua ngei kaibü ngühkhüm shuong damenko kia, O BUNYUBOU, hoba ngo lolo haksokei.

⁵³Amaibü shuongei kaibü ngühkhüm wailetbü haangjung Ngo wansak angko khau lotda.

⁵⁴Ngo saopobü wakoubü chema, kaibü sakkubü ngühkhüm shuong kü yoa kia.

⁵⁵O BUNYUBOU, ngei kaibü nyen nangnak damenkei, hoba kaibü ngühkhüm shuong jungeia.

⁵⁶Ngei kaibü ngühkhüm shuong jungeibüei ho ngeibü ki.

⁵⁷BUNYUBOU kho ngeibü phejan, ngei kaibü ngühshuong jungeilabü dogo ngei lena.

⁵⁸Ngei maangpon pendouei ka to sudajada, kaibü ngüh tegü kü to onoukaima.

⁵⁹Ngei ngeibü lam daman chühkei, hoba kaibü ngühkhüm aeto ngeibü you sepeikei.

⁶⁰Kaibü sakkubü jungeila ngo panteikei hoba aphai.

⁶¹Amaibüeibü lühei ngo kailepbei; lausikei ngei kaibü ngüh amaa.

⁶²Kaibü saopobü ngühkhüm song shanga ngei ka la nyensang kula metuphanga lakseplabü.

⁶³Aoyouei ka to souhatda hoba aoyouei kaibü ngühkhüm jungeida, haoen pendoueibü jenabou kho ngo ki.

⁶⁴O BUNYUBOU, kaodak kaibü üeisanouei shenakei; kü la kaibü sakkubü ngühkhüm shuong lenbüma.

⁶⁵O BUNYUBOU, kaibü ngüh tegütham, nyi kaibü khangenbü to maian jungeia.

⁶⁶Janenbü maibü hoba hapbüngebü songsido kü la lenbüma; aishanga kaibü sakkubü ngühkhüma ngei mailemda.

⁶⁷Ngo khonsak to ütjinei ngei mashikan satkei, lausikei touje ngei kaibü ngüh jungeida.

⁶⁸No maibü ki hoba maibü kümda; kü la kaibü sakkubü ngühkhüm shuong lenbüma.

⁶⁹Yonglam lilibü shuongei ngo khulimbo amlangbü laua; ngeibü maangpon khümboei ngei kaibü ngühkhüm jungeilabü.

⁷⁰Haoeneibü maangpon haabü tegü shanshantham, lausikei ngo kaibü ngühkhüma olinda.

⁷¹Kaibü sakkubü ngühkhüm shuong ngei ditletlabü lele, ngo khonkutibü kho kü shanga maibü ki.

⁷²Hon si chandinam hajar juong toje ka sembung kabü ngühkhüm kü junga maibou ki.

⁷³Kaibü ikei ngo kümbei hoba ngo yeitikei; kaibü sakkubü ngühkhüm ngei ditletlabü lele kü la ditenbü labü.

⁷⁴Aoyouei ka to souhatda haoenei ngo haplabü hoba olinko kilabü; aieilausi kaibü ngüha ngei maanglembei.

⁷⁵Ngei ngekei, O BUNYUBOU, khei kaibü matjem ngühmai ki, hoba khei maibü shanga nyi ngo khonsaktikei.

⁷⁶Ngei ka to sudajada, khangenbou to kaibü ngüh tegütham, kaibü üeisanou ngeibü hakso shanga yingshima.

⁷⁷Ngo langkei kienla kaibü üeisanou maibü kü jungto loutishima; aishanga kaibü ngühkhüm ngeibü olin shanga ki.

⁷⁸Yonglambü lilibü himoutiashi; aishanga haoenei ngo shedtiko jungeilabü; lausikei kaibü ngühkhüma ngei daman chühlabü.

⁷⁹Ka to souhatbü shuong kü jungto sepeitishima, hoba haoenei kaibü ngühkhüm shuong ngelabü.

⁸⁰Kaibü sakkubü ngühkhüma ngeibü maangpon tükde kitishima; khünei ngo himouko akilabü.

⁸¹Kaibü khümenbü shanga ngeibü soushou semthetda, lausikei kaibü thekubüa ngei maanglemda.

⁸²Kaibü theletbü to chühko ngeibü nyek mangda. Nyi ngo ladang haksotila?

⁸³Aishanga ngo wankhükeibü phekhon shongmok tegü yeiakei; khei yingasikei ngei kaibü sakkubü ngükhüm amaada.

⁸⁴No khangenbouei ladüngnyet natenla? ngo shieinangeibü la nyi ladang matjem kula?

⁸⁵Yonglam lilibüei kü shanga püngkhün thukuakei; haoen kaibü ngühkhüma akida.

⁸⁶Kaibü sakkubü ngühkhüm pendou tükde ki; haoenei mashikan ngo shieikoeda; nyi kü to thuikaima.

⁸⁷Haoenei ngo kaonyua mautilabü lele ong kia; lausikei kaibü ngühkhüm ngei ainlet.

⁸⁸Kaibü üeisanou thüng ngo haansang yeitishima; khünei kaibü ngühkhüm ngei damenlabü.

⁸⁹O BUNYUBOU, ponpen thon akibü, kaibü ngüh khuthüka kaangkhühtham loan kia.

⁹⁰Kaibü maanglemenbü thekubü meten pendou to ki; nyi kaodak yaüda hoba kho kaangkhühtham loan kida.

⁹¹Kaibü songle ngühkhüm tegütham haoen tat loan kia; aishanga pendou no khangenbü shuong ki.

⁹²Kaibü ngühkhüm kho ngo olinlabü lele aki tegüje ngo ngeibü khonkua mauan kikhoulabü.

⁹³Ngei kaibü ngühkhüm ladangkei amaalabü, aishanga khübü khoei ngo angngaikei.

⁹⁴Ngo kaibü ki, ngo khümenshima; aishanga ngei kaibü ngühkhüm lambei.

⁹⁵Amaibü shuong ngo mautila haiyeiko kikei; lausikei ngei kaibü ngühkhüm shuong damanchühlabü.

⁹⁶Kümsilei pendou shanga thonbü cheje ngei hapda; lausikei kaibü sakkubü ngühkhüm shuongje yongko hopatham ki.

⁹⁷Oh, ngei kaibü ngühkhüm lai sanouda! chalou sünga ho ngei damanchühbü.

⁹⁸Kaibü sakkubü ngühkhüm shuongei, ngeibü dangbou shuong tokei ngo aei songsido kitida; aishanga khübü kho ponpen kü yoa kia.

⁹⁹Ngeibü lenbou pendou tokei ngo aei ditenbou ki, aishanga kaibü ngühkhüm shuong kho ngeibü daman chühbü ki.

¹⁰⁰Jaishou shuong tokei ngei ditenbou, aishanga ngei kaibü ngühkhüm shuong jungeikei.

¹⁰¹Kaibü ngüh jungeienla shanga ngei ngeibü you amaibü lam ka sungngaikei.

¹⁰²Kaibü songle ngühkhüm ka ngo asepei; aishanga nyi kü la lenkei.

¹⁰³Kaibü ngüh shuong kü sembunga lai teikei; haü, kü sembunga naodei tokei teibou.

¹⁰⁴Kaibü ngühkhüm shuong danko ngei ditenbü hapda.

¹⁰⁵Kaibü ngüh ngeibü you shanga hantin, hoba ngeibü lam shanga ngesakbü ki.

¹⁰⁶Kaibü saopobü songle ngühkhüm jungeila ngei thealana hoba kho ngei kümlabü.

¹⁰⁷Ngo aeibou khonkuda, O BUNYUBOU, kaibü ngüh tegütham ngo phongaishi.

¹⁰⁸O BUNYUBOU, kü sembung ka maangmai lembüsabü sungletshima, ngei ka to sudajada. hoba kaibü matjembü kü la lenshima.

¹⁰⁹Ngeibü soushou athakko kü ika kia; khei yingsikei ngei kaibü ngühkhüm amaada.

¹¹⁰Amaibü shuongei kü shanga sung che sankuakei, khei yingasikei kaibü ngühkhüm ka ngo ayingbü to ohou.

¹¹¹Kaibü ngühkhüm shuong ponpen shanga ngei phet phanakei; aishanga khübü kho ngeibü maangpon olinbü ki.

¹¹²Kaibü sakkubü ngühkhüm jungeila kü maangpon lamlean kia, haü, ponpen khei thon sühko.

¹¹³Ngei maangpon penyi yembü mangsenda; lausikei kaibü ngühkhüm ngei sanouda.

¹¹⁴No ngo satenshang hoba ngeibü aih ki; ngo kaibü theletbüa maanglemda.

¹¹⁵Kü ka kukashi, kan amaibü shuong; khünei ngei ngeibü Mühghaüeibü sakkubü ngühkhüm jungeienlabü.

¹¹⁶Kaibü ngüh tegütham ngo tonenashi, khünei ngo langkei kienlabü; hoba ngeibü maangpon shanga ngo himouko tüpyoma.

¹¹⁷Nyi ngo yaüenashi, hoba ngo khümenashi, hoba athakko kaibü sakkubü ngühkhüm shanga soumo hatlabü.

¹¹⁸Kaibü sakkubü ngühkhüm ka satbü pendou nyi kongkong aptikei; aishanga haoeneibü khüpbülangbü kho lejim aki.

¹¹⁹Kaodak amaibü pendou, odsinot tegü nyi thonan aptida; khoei ngei kaibü ngühkhüm shuong sanouda.

¹²⁰Ka to souhatbü ka, ngeibü phe lühda; hoba ngei kaibü ngühkhüm to hatda.

¹²¹Ngei ngühmai hoba tükde küma; ngo khonkutibü la ngo tephokuma.

¹²²Kü la kaibü ngüh ponpen shanga linjinkushi, yonglam lilibüei ngo khon tekutima.

¹²³Kaibü khümenbü shanga hoba kaibü saopobü thekubü shanga, ngeibü nyekei chühla athükko apda.

¹²⁴Kaibü üeisanou thüngei no khangenbou to kümshima, hoba kaibü sakkubü ngühkhüm kü la lenbüma.

¹²⁵Ngo kaibü khangenbou ki, kü la shokenbü labü; khünei ngei kaibü sakkubü hapla thüklabü.

¹²⁶BUNYUBOU, ho ka shanga kümlaleilabü jih ki, aishanga haoenei kaibü ngühkhüm lulima.

¹²⁷Khei yingbü khoei ngei kaibü sakkubü ngühkhüm sanouda; hon tokei, haü, hon maibü tokei aei sanouda.

¹²⁸Khoei ajanjan pendoua kaibü sakkubü ngühkhüm pendou janbü dogo ngei weeida; hoba amlangbü lamnyu pendou ngei mangsenda.

¹²⁹Kaibü sakkubü ngühkhüm shuong maangpanglabü ki; hibü ngei khübü kho jungeilabü.

¹³⁰Kaibü ngühshuong ipbüei ngesakbü kuda; khoei maanglanbü shuong la ditenbü kuda.

¹³¹Ngei hakhin thonko hakouan haiteiko kikei; aishanga ngei kaibü sakkubü ngühkhüm shuong haiyeiko kikei.

¹³²Kaibü nyen sanoubü to nyi kümbü tegü, no kü jungto sepeiashi hoba kü to sanou dambaima.

¹³³Kaibü ngüha ngeibü you younak kümbushi; hoba kü thüka shedbü shabü hau tekitima.

¹³⁴Mütei khonkutibü ka ngo angthetshima; hibü ngei kaibü sakkubü ngühkhüm shuong jungeilabü.

¹³⁵No khangenbou thükto kaibü thenyek hautikushima; hoba kaibü sakkubü ngühkhüm kü la lenbüma.

¹³⁶Ngeibü nyek ka nyeksi shumang tegü kouda; aieilausi haoenei ka ngühkhüm ajungeida.

¹³⁷O BUNYUBOU, no saopobü ki, hoba kaibü matjem ngühmai ki.

¹³⁸Saopobüa hoba maanglembü pendoua nyi kaibü aukabü shuong sakkua.

¹³⁹Ngeibü maangdakei kü to wanei tegü juokda, aieilausi ngo khulimbü shuongei kaibü ngüh shuong maan apbei.

¹⁴⁰Kaibü thekubü shuong takteia hoba maimaithambü; hibü no khangenbüei kho sanouda.

¹⁴¹Ngo hanbü hoba aweasüngbü langkei; khei yingasikei kaibü ngühkhüm shuong amaada.

¹⁴²Kaibü saopobü ponpen thon akiko saopobü; hoba kaibü ngühkhüm shuong kho maimaitham ki.

¹⁴³Khonsak thushedei kü to sühkei, khei yingsikei kaibü sakkubü ngühkhüm ngeibü olin ki.

¹⁴⁴Kaibü sakkubü ngühkhüm shuong ponpen thonbü akiko saopobü, kü la ditenbü labü hoba ngo lang kilabü.

¹⁴⁵Ngei ngeibü maangpon pendouei ngekda; kü to jongaikei, O BUNYUBOU! Ngei kaibü sakkubü ngühkhüm jungeilabü.

¹⁴⁶Ngei ka to ngekda, ngo khümenashima, hoba ngei kaibü sakkubü ngühkhüm jungeilabü.

¹⁴⁷Ngo lang angetoua pida, hoba thuibü shanga ngekda; ngei kaibü ngüha maanglemda.

¹⁴⁸Kaibü ngüha ngei daman chühla shanga ngeibü nyek nangnak pietlemetnyu kida.

¹⁴⁹Kaibü üeisanou thüng ngeibü ngüh ditshima; O BUNYUBOU, kaibü ngühmai thüng kü langkei püetangetan phokushi.

¹⁵⁰Amaibü phai to sembü shuong nyangko louda, lausikei kaibü ngühkhüm ka haoen lounyu bangakei.

¹⁵¹No nyangko kia, O BUNYUBOU, hoba kaibü sakkubü ngühkhüm shuong maimaitham kia.

¹⁵²Shangieda kaibü sakkubü ngühkhüm shuong ponpen shanga nyi kümbei dogo ngei ngekei.

¹⁵³Ngeibü khonku damanchühshi, hoba ngo khümenashi; aishanga ngei kaibü ngühkhüm amaada.

¹⁵⁴Kü la yingkushi hoba ngo püetshi, kaibü thekubü tegü ngo püetangetshi.

¹⁵⁵Amaibü shuong ka khümenbü kho lounyu hean kia, aishanga haoenei kaibü sakkubü ngühkhüm alam.

¹⁵⁶Kaibü sanoudambü yaang kia, O BUNYUBOU; kaibü ngühmai thüng ngo püetangetshi.

¹⁵⁷Ngo shieikoebü hoba ngeibü dangbou juong kia; khei yingasikei ngo kaibü aukabü shuong ka abang.

¹⁵⁸Khüpbolangko jungeibü shuong ngei hapbei hoba maangto shatko kikei; aieilausi haoenei kaibü ngüh ajungei.

¹⁵⁹Ngei kaibü ngüh lai sanouda damanchühshi, O BUNYUBOU, hibü kaibü üeisanou thüng nyi ngo püetangetshi.

¹⁶⁰Kaibü ngüh khümbo kho tükde, hoba kaibü ngühmai matjem kho penpen kida.

¹⁶¹Ai ayingnyu khuleibü shuongei ngo shieikoekei; lausikei ngeibü maangpon kaibü ngüh to hatko loda.

¹⁶²Soletbü peisilei hapbü müt tegütham ngo ka ngüha olinangko kida.

¹⁶³Ngei yepeijawebü hoba lepbü langbü mangsenda; lausikei ngei kaibü ngüh sanouda.

¹⁶⁴Chalou chenei ngei nyetnei ka nyen sangda; aieilausi kaibü ngühmai matjem ki.

¹⁶⁵Kaibü ngühkhüm sanoubü shuong shanga hakso yaang kia, hoba haoen phaiyetlabü ai aki.

¹⁶⁶O BUNYUBOU, ngei kaibü khümenbü shanga maanglembei; hoba ngei sakkubü küma.

¹⁶⁷Ngeibü soushouei kaibü sakkubü ngühkhüm jungeia, hoba khübü kho aeibou sanouda.

¹⁶⁸Ngei kaibü ngühkhüm hoba sakkubü ngühkhüm jungeia; aishanga ngeibü lamnyu pendou ka junga kia.

¹⁶⁹O BUNYUBOU, ngei ngekbü ka jungto nyangko loutishi; kaibü ngüh tegütham kü la ditenbü labü.

¹⁷⁰ngeibü sembung ka nyensang longtiashi; aishanga nyi kaibü sakkubü ngühkhüm kü la lenda.

¹⁷¹Ngeibü subüjabü ka jungto loutishi; kaibü ngüh tegütham ngo khümenshima.

¹⁷²Ngeibü lishangei kaibü ngüh shanga chia lautiashi; aishanga nyi sakkubü pendou saopobü ki.

¹⁷³Kü to thuila kaibü ik lamlean kishima, aishanga ngei kaibü sakkubü ngühkhüm piena.

¹⁷⁴O BUNYUBOU, kaibü khümenbü shanga ngei haiyeiko kikei; hoba kaibü ngühkhüm ngeibü olinbü ki.

¹⁷⁵Ngeibü soushou lang kitiashi hoba khoei ka nyen sanglabü; hoba kaibü matjemei kü to thuikaima.

¹⁷⁶Maubü san tegü ngo ayinglam to haua; kaibü khangenbou lamshima; aishanga kaibü sakkubü ngühkhüm shuong ngei amaada.