Read Chang Naga NYENSANG CHIA 135 Bible Online

NYENSANG CHIA 135 - Chang Naga bible

NYENSANG CHIA 135

¹BUNYUBOU sangashi! Kanei BUNYUBOU nyen sangashi; hao sangashi, kan BUNYUBOU khangenbü shuong;

²kan BUNYUBOUeibü khangenbü shuong, seneibü Mühghaüeibü chemsophanga lobü shuong.

³Kanei BUNYUBOU sangashi, aishanga hao maibü ki; haoeibü nyensang chia lauashi; aishanga hao onoubü ki.

⁴Aishanga haoei Jakob hao shangabü tegü, hoba Israel jembü nyaksinam tegü pienakei.

⁵Aishanga BUNYUBOU yaangbü, hoba seneibü BUNYUBOU Mühghaü pendou thüka thükkabou ki dogo ngei ngekei.

⁶Khuthüka yingsikei kaodaka yingsikei, deia hoba haübü pendoua BUNYUBOUei ai ong maangangda kho haoei kümda.

⁷Kaodak thonbü ka haoei sangmei yeinak tuan angtida; langh shanga haoei langpon pontida; haoeibü thanshang ka haoei yei sungbatida.

⁸Haoei Ijepbü shaang bukbü, müt hoba meisiau ham haitikei.

⁹O Ijep, haoei ka jungto Farao thükto hoba hao khangenbü pendou thükto tetsida hoba seikümseilei hautikei.

¹⁰Haoei phang juong ngüman yeptikei, hoba hau yaangbü Choba shuong haitikei.

¹¹Amorbü Choba Sihon, hoba Bashanbü Choba hoba Kanan Choba sangle pendou.

¹²Hobaje haoen kaodak phetphanla shanga, haoeibü mütli Israel shanga phetphan che yingla kukei.

¹³O BUNYUBOU, kaibü nyen ponpen kia, O BUNYUBOU, meten pendou onlangko, no damenbü ponpen kilabü.

¹⁴Aishanga BUNYUBOUei jembü mütli la ngühmaanglanbü kulabü.

¹⁵Phangshuongeibü heangsho shuong kho, müteibü ikei kümbü kümsilei hon hoba chandinam ki.

¹⁶Haoen la sembung yemakei lausikei haoenei ngüh alauda; haoen la nyek yetakei lausikei haoenei ühüpda.

¹⁷Haoen la nou yemakei, lausikei haoenei aditda; ayingsi haoeneibü sembunga hak ai aki.

¹⁸Mütpem weko aoei haoen to maanglemlaje, aoyouei haoen kümbei haoen phatko yeilabü.

¹⁹O Israel chemdang, kanei BUNYUBOU haükushi; O Aron chemdang, kanei BUNYUBOU haükushi.

²⁰O Levi chemdang, kan BUNYUBOU to hatbü shuong kanei BUNYUBOU sangashi.

²¹Zion ka BUNYUBOU sangashi, hoba Jerusalema kibou sangashi. Kanei BUNYUBOU sangashi!