Read Chang Naga NYENSANG CHIA 137 Bible Online

NYENSANG CHIA 137 - Chang Naga bible

NYENSANG CHIA 137

¹Ladang künei Zion damenkei, Babilon shumang nyangko kün setkei, haü, kün haapbei.

²Willo bulong yoa küneibü kongkin antian phokei.

³Aishanga khünei haoenei kün to chia laula phekei, hoba kün shieikoebüei kün to, “Olinyoshi” dogo, hoba “Kün la Zion chia lauan lenbü,” dogo laukei.

⁴Küksithang kaoa künei ailai BUNYUBOUeibü chia lauenla?

⁵O Jerusalem, ngei no maan apalonga, ngeibü mae ik kongkin alauenlabü lele thoptishi.

⁶Ngei no adamenlonga; ngei Jerusalem ngeibü olinbü thükkabou to khaibou dogo adamlonga; ngeibü lishang ngeibü ngeia thiptiashi!

⁷O BUNYUBOU, Edom shousi shuong khulimbo, Jerusalem tuongbü chaloua aoyouei, “Ho chemshang lemailela apashi,” dogo laukei kho damenashi.

⁸O Babilon nouyangshou, no lusaklabü; nyi kün to kümbü tegü aoei ka to jungeilaje hao olinbou;

⁹aoei kaibü hanbü shuong soan sunglaje, hoba laanga phetetilaje hao olinbou.