Read Chang Naga NYENSANG CHIA 139 Bible Online

NYENSANG CHIA 139 - Chang Naga bible

NYENSANG CHIA 139

¹O BUNYUBOU, nyi ngo takteia hoba nyi ngo ngekei.

²Ngo setjinei hoba ngo lojinei nyi ngekei; tou ka jaüan ngeibü dambü nyi ditenda.

³Nyi ngeibü lam hoba ngo lengan kishang, hoba ngeibü lamnyu pendou ngejeman ki.

⁴Aishanga ngeibü lishanga ngüh che ongkei, O BUNYUBOU, nyi angebü aikei aki.

⁵No kü phainei hoba thedanga kia; hoba kaibü ikei nyi kü to thanglepda.

⁶Ho tegübü songsido kü shanga yongko maangpanglabü, ho yongko suokkei, ho ngei jembou aying.

⁷Ka soushou ka ngo laeto satla? ayingsi ka jungka ngo laeto haula?

⁸Ngo müh aeto angsi no khünei kia; ngei shen Sheola kümalonga khüneikei no kia.

⁹Ngo ngeyang kaak yeman, hoba yungnyu peiko hauan kiasikei;

¹⁰khei khüneikei kaibü ikei ngo leilabü, hoba kaibü mae ikei ngo hatleplabü.

¹¹Maimaitham nakthühei ngo küpleplabü dogo ngei laua longa, kheijinei nangnak kho ngo kaijembo ngesak yeilabü.

¹²Nakthüheikei kaka huan akienda, lausikei nangnak changea tegü ngesakda; nakthüh si ngesak ka thedanga jetei ki.

¹³Aishanga nyi ngo maangkaboua kümbei, nyusema thama nyi ngo kümbei.

¹⁴Ngei ka la nyensang kulabü; aishanga ngo hatlamoklabü che hoba maangpanglabü che kümakei, kaibü kümsilei shuong maangpanglabü; hoba kho ngeibü soushouei tükde maisho ngekei.

¹⁵Ladang ngo huphanga küman kikei, hoba kaodak maangkabouthama yaüenkei, ka ka ngeibü mang huan aki.

¹⁶Kaibü nyekei ngo abenasoubü langkei hapbei; kü shanga lamlekubü chalou shuong, toukei khübü kho che ongkei akijinei; kaibü lea khübü pendou kikei.

¹⁷Tokei kü la kaibü dambü shuong lai namsek ki, O Mühghaü! khübü pendou kho lai yaangkei!

¹⁸Ngei khübü kho weanchühko laua tegükei, khübü kho phetsen tokei juongbou ki; ladang ngo pilaje ngo tokei ka yoa kia.

¹⁹Maimaitham nyi amaibü haitilabü, O Mühghaü! Hibü kü ka bangashi, kan sii yungmang sühbü mütshuong!

²⁰Aishanga haoenei no khulimbo amaiko laueida; hoba kaibü dangbou shuongei kaibü nyen amlanga laueida.

²¹O BUNYUBOU, ka to mangsenbü shuong ngei amangsenda lo? hoba no khulimbo longbü to ngo ngangko aki lo?

²²Tükdebü mangsenbüei ngei haoen mangsenda; haoen ngeibü dangbou dogo ngei lolo weeida.

²³O Mühghaü, kü to lamashi hoba ngeibü maangpon ngeshima; ngo takteiashi hoba ngeibü dambü ngeshima.

²⁴Hobaje kü to lamnyu amaibü denche kialonga chühshima; hoba ponpen thon akibü lamnyua ngo leikaima.