Read Chang Naga NYENSANG CHIA 140 Bible Online

NYENSANG CHIA 140 - Chang Naga bible

NYENSANG CHIA 140

¹O BUNYUBOU, müt amaibü ka ngo püetshi; sekbülakbü müt ka ngo khümenshima.

²Aoyouei jembü maangpona huon amaibü takda; athakko haoenei haoen lolo oyophetyo shanga liko yoshaida.

³Pinyu tegü haoenei haoeneibü hauh uda; pinyueibü kom haoeneibü sembunga kia.

⁴O BUNYUBOU, amaibü ik ka ngo khümenan phoshi; sekbülakbü müt ka khümenshima; aoyouei ngeibü younak khokan apbula huon lamda.

⁵Lilisesebüei kü shanga sung hoba lühmong huphanga sankuda; haoenei lamjia sung sankuakei; haoenei kü shanga tak sankuakei.

⁶Ngei BUNYUBOU to laukei, “No ngeibü Mühghaü.” Ngeibü saopobü ngüha nou haangkushi, O BUNYUBOU.

⁷O Mühghaü BUNYUBOU, ngeibü khümenbü shanga hau; lasona nyi ngeibü khu thanglepbuda.

⁸O BUNYUBOU, amaibüei maangdakbü tesakkuma; khei haoen yonglamsi amaibula, haoeneibü huonsiyou thüksimin tehüptima.

⁹Aoyouei ngo küplepda haoeneibü khu tengekti; haoen jembü sembung amaibüei haoen küpleptishima.

¹⁰Haoen thükto wankak yasebü attikushi, haoen wan to jinkushi. Haoen nyibou alongenlabü lele püngkhün haübüa jinkushi.

¹¹Amaibü laubü shuong kaodaka loshang akilabü.

¹²Ngei ngekei wailetbü shuong shanga, hoba shalebüeibü janbü kümsilei shanga BUNYUBOU lokulabü.

¹³Maimaitham ngühmaanglanbüei tükde ka la nyensang kulabü; maanglanbü ka thedanga kilabü.