Read Chang Naga NYENSANG CHIA 143 Bible Online

NYENSANG CHIA 143 - Chang Naga bible

NYENSANG CHIA 143

¹Ngeibü welaubü ditshi, O BUNYUBOU; saopobüa nou haangbüma; kaibü maanglemenbüa hoba kaibü saopobüa kü to jongaishima.

²No khangenbou to mat tejemma, aishanga ka junga langkei kibü aokei mat amailabü.

³Aishanga dangbouei ngeibü soushou shieikoekei; haoei ngeibü langkei kaoa sühko louyenan ngümbei. Aoyou haian lounyu kikei, khübü tegü, haoenei ngo nakthüh phanga phokukei.

⁴Hibü ngeibü soushou maangaenei semthetda; ngeibü maangpon maanga yuia.

⁵Shangiedbü chalou shuong ngei damenda; nyi kümbü pendou shanga ngei damanchühda.

⁶Ngei ka jungto ngeibü ik tuokda, kaolinei tegü ngeibü soushouei ka shanga deilada.

⁷Kü to jongaila panteishima, BUNYUBOU! ngeibü soushou semthetda. Kü thedang ka kaibü the tehuma; khei ayinglonga yemkhün to atbü dan phatko ngo kilabü.

⁸Ngeyang kaibü üeisanou kü la dittiashi; aishanga ngei ka to mailemda. Ngo ainei paijan kü la ngetishima; aishanga ngei subüjabü ka jungto louda.

⁹Ngeibü dangbou shuong ka, O BUNYUBOU, ngo khümenshima; ngo hutila ngo ka jungto satjung louda.

¹⁰Nyi maangangbü kümla kü la lenbüma, aishanga no ngeibü Mühghaü ki; kaibü soushou maibüei pholi lama ngo leitishima.

¹¹Kaibü nyen laüa, O BUNYUBOU, ngeibü langkei khümenshima; kaibü saopobüei ngeibü soushou khonsak ka leiyenshima!

¹²Hobaje kaibü üeisanouei ngeibü dangbou shuong wapan apshima, hoba ngeibü soushou khonsaktibü pendou mautishi; aishanga ngo kaibü khangenbou ki.