Read Chang Naga NYENSANG CHIA 144 Bible Online

NYENSANG CHIA 144 - Chang Naga bible

NYENSANG CHIA 144

¹BUNYUBOU, ngeibü laang haübou yingshi; aoei lason shanga ngeibü ik, hoba wapyola shanga ngeibü ikjishou jungeida.

²Ngeibü Mühghaü, hoba ngeibü lapheishon; ngeibü hau kibü laangchem hoba ngo khümenbou; ngeibü aih hoba hao to ngei satenshang lamda. Haoei kü phanga kibü phangshuong nakan yantikei.

³BUNYUBOU, nyi khunakshousi ngelabü lele ai ki? ayingsi nyi müteibü shou weeilabü lele ai ki?

⁴Müt kho hak che ong phatko kia; haoeibü chalou shuong kho, shoongjung satbü yeme che phatko kia.

⁵O BUNYUBOU, kaibü müh shuong khüpetashi hoba kaiyena; shongh shuong to meitiashi, hoba haoen wankhük anglabü.

⁶Langpon pontiashi hoba haoen lintiashi; kaibü laujin kipashi, hoba haoen pheilangeitiashi.

⁷Thükae ka kaibü ik yantiashi, dei yaangbü ka; küksithang ik ka ngo senetashi hoba ngo püetashi.

⁸Haoenei sembungei amlang lauda, hoba haoeneibü mae ik lepbülangbü ik ki.

⁹O Mühghaü, ngei ka la chia haanbü che laukulabü; haulüh an thonbü tuokjinei ngei ka la nyensang chia laukulabü.

¹⁰Choba la thükbü kubü kho hao ki, haoei hao khangenbou Dawid leilulabü ka khümenda.

¹¹Küksithang shuong ik ka ngo senetashi, hoba ngo püetshi; aishanga haoeneibü sembungei amlang lauda, hoba haoeneibü mae ik lepbülangbü ik ki.

¹²Küneibü bousu shousi shuong haoen heshoua lakenbü bu phatko, küneibü nouyangshousi shuong Chobaeibü chem hangentibü khamthung phatko yeitishi.

¹³Buhekdeihek den juongei küneibü bung shentishi; küneibü sanlon yama hajar longtishima.

¹⁴Küneibü shatsinam shia künjinei suan üptiko haatiyaangtishi. küneibü khonga oyolemen maangto shatbü ngühlang tekiti!

¹⁵Kho tegü haülabü hapbü shuong haübou; laobou mütlieibü Mühghäu BUNYUBOU ki khoei haüa!