Read Chang Naga NYENSANG CHIA 145 Bible Online

NYENSANG CHIA 145 - Chang Naga bible

NYENSANG CHIA 145

¹Ngei no yaangentilabü, O BUNYUBOU, Mühghaü, hoba Choba; ngei ka nyen ponpen thonsithak akiko sanglabü.

²Chalou angbou ngei no haükulabü; hoba ngei ka nyen ponpen thonsithak akiko sanglabü.

³BUNYUBOU kho yaangbü ki hoba aeibou sanglabü ki; hoba hao yaangbü kho thon aki.

⁴Kaibü kümsilei shuong meten phaia metenei sanglabü; hoba kaibü kümsilei yaangbü ngetilabü.

⁵Kaibü soneikangbü soumo yaangbü kaibü nyenhang shanga, hoba kaibü maangpanglabü kümsilei shuong ngei daman chühlabü.

⁶Hobaje mütshuongei kaibü maangpanglabü kümsilei kümbü hau shanga laueilabü; hoba no yaangenbü ngetilabü.

⁷Haoenei nyi aeibou maibü nyensang lauyolabü.

⁸BUNYUBOU kho onou hoba üeisanou ki; khauangla aso hoba üeisanou yaang ki.

⁹BUNYUBOUei pendou to maida, hoba haoeibü üeisanou haoeibü kümsilei pendou thüka kia.

¹⁰Kaibü kümsilei pendouei ka la nyensang kulabü, O BUNYUBOU, hoba kaibü saopobü shuongei no haukulabü.

¹¹Haoenei kaibü sangle soneikangbü shanga laulabü, hoba kaibü sei shanga laulabü.

¹²Haoeibü kümsilei yaangbü khunakshousi shuong la ngetilabü, hoba haoeibü sangle soumo yaangbü soneikangbü shanga ngetilabü.

¹³Kaibü sangle ponpen thon akibü Choba sangle ki, hoba kaibü songdak sangle meten pendou onlangko ki.

¹⁴Aoyou tuongda pendou BUNYUBOUei tonenda, hoba khüpetan kibü pendou haoei senan lotida.

¹⁵Pendouei ka to nyek shean chühda, hoba jih tükdebüa nyi haoen la shausiyung kuda.

¹⁶Nyi jembü ik sengda, hoba langkei kibü wekoei maangdakbü nyi senyühshemtida.

¹⁷BUNYUBOU hao jembü lam pendoua ngühmai ki; hoba haoeibü kümsilei pendoua onouda.

¹⁸Aoyouei BUNYUBOU to ngada haoen pendou to hao nyangko kia; maimaitham aoyouei ngada pendou to hao nyangko kia.

¹⁹Aoyouei hao to soumo hatda haoen maangdakbü haoei haüthüktikulabü; haoei tokei haoenei ngekbü ditlabü hoba haoen khümenlabü.

²⁰Aoyou haoei sanouda haoen pendou BUNYUBOUei bamlepda; lausikei amaibü pendou maulabü.

²¹Kü sembungei BUNYUBOU nyensang laulabü; hoba khunakshousi pendouei haoeibü saopobü nyen ponpen thon akiko haükushi.