Read Chang Naga NYENSANG CHIA 147 Bible Online

NYENSANG CHIA 147 - Chang Naga bible

NYENSANG CHIA 147

¹Kanei BUNYUBOU sangashi! Aishanga seneibü Mühghaü to nyensang chia laula maikei; aishanga hao üeisanou ki, nyensang chia kho hao to papbü ki.

²BUNYUBOUei Jerusalem phonan dangda, haoei nangletan kibü Israel leishaida.

³Haoei maangpon leilubü maitida, hoba haoeneibü mou khühkuda.

⁴Haoei khanshoulitshou weda; Haoei haoen pendou la nyen kuda.

⁵Seneibü BUNYUBOU yaangenbü ki, hoba seisihau yaang kia.

⁶BUNYUBOUei naklepbü tonenda, haoei amaibü kao to yantida.

⁷BUNYUBOU la nyensang kuko chia lauashi; Kongkinei seneibü Mühghaü to chia lauashi.

⁸Aoei sangmei yuklepbuda, aoei kaodak to lang yantida; aoei shongha sang yemtida.

⁹Haoei meisiau la shausiyung kuda, hoba aulu shoushou la haoen wiyojinei shausiyung okda.

¹⁰Wapyobü kolieibü haua hao aolinda, maangkangbü sepai hau to hao aolinda.

¹¹BUNYUBOUei hao to soumo hatbü shuong to haoeibü sanoudambü maanglem kibü shuong to olinda.

¹²BUNYUBOU sangashi, O Jerusalem! Kaibü Mühghaü sangashi, O Zion!

¹³Aishanga haoei kaibü bakhün thangtet hau kitikei; haoei kaibü shousi shuong ka la haükukei.

¹⁴Kaibü leilanga haoei sangmai kümda, haoei no youshou maibouei senyühshemtida.

¹⁵Kaodak thükto haoei sakkubü hautida; haoeibü ngüh panteiko hauda.

¹⁶Wi tegü haoei ninlaang kuda, tap tegü haoei tapnin phinkuda.

¹⁷Wentek onbü tegü senlaang attikuda; aoei haoeibü ninlenbü thedanga loenda?

¹⁸Haoei ngühkhüm kuda hoba haoen tühnyintida; haoei haoeibü yei souan litida hoba dei koutida.

¹⁹Haoei haoeibü ngüh Jakob la hoba haoeibü sakkubü ngühkhüm hoba haoeibü matjem Israel la lenda.

²⁰Ai phang tokei haoei kho tegü aküm; hoba haoeibü matjem shanga haoenei khübü kho angekei. Kanei BUNYUBOU sangashi.