Read Chang Naga NYENSANG CHIA 148 Bible Online

NYENSANG CHIA 148 - Chang Naga bible

NYENSANG CHIA 148

¹Kanei BUNYUBOU sangashi! Mühshuong ka kanei BUNYUBOU sangashi; thükaenei kibü danei hao nyen sangashi.

²Kanei hao sangashi haoeibü hangangbü pendou; kanei hao sangashi, haoeibü lakjaibü dan pendou.

³Kanei hao sangashi, chanyu si litnyu; hao sangashi, kan ngesakbü khanshoulitshou shuong.

⁴Hao sangashi, kan müh shuong thüka müh, hoba mühshuong thüka kibü yungnyu shuong.

⁵Haoenei BUNYUBOU nyen sangtiashi, aishanga haoei sakkukei hoba haoen pakenkei; haoei ngühkhüm che kümbei laobou adanlabü.

⁶Haoei tokei haoen ponpen shanga kümbei, haoei ngühkhüm che kümbei laobou adanlabü.

⁷Kaodak ka BUNYUBOU sangashi, kan dragon shuong hoba haübü pendou.

⁸Langpon si senlaang, ninthu hoba deihak, yeithuyeinak, haoeibü ngüh haüthüktiko sangashi.

⁹Thükkabou hoba kaonop pendouei, Buhek hekbü bulong shuong hoba cedar bulong pendou;

¹⁰meisiau hoba samkeisamuk pendou, paibü yangsikok hoba seengeibü ausiyuk shuong.

¹¹Kaodak Choba shuong hoba müt pendou leiyeibü shuong hoba kaodak matjembü pendou;

¹²heshou shuong hoba medei shuong ham, baushi hoba nashousi.

¹³Haoen la BUNYUBOU sangtiashi, aishanga hao nyen lansan yaangenan ki; haoeibü soneikangbü kaodaka müh thüka kia.

¹⁴Haoei jembü mütlieibü laang tonenan ki, nyensang kho hao saopobü shuong pendou shanga kia; khei Israel shousi shuong, hao nyangko kibü mütli che. Kanei BUNYUBOU sangashi!