Read Chang Naga NYENSANG CHIA 18 Bible Online

NYENSANG CHIA 18 - Chang Naga bible

NYENSANG CHIA 18

¹Ngei ka to sanouda, O BUNYUBOU, ngeibü hau.

²BUNYUBOU ngeibü laangnyu, hoba ngeibü lapheishon hoba ngo khümenbou. Ngeibü Mühghaü, ngeibü laang, ngo hao to satetlangkho. Ngeibü aih ngo khümenbou teklaang, ngeibü lapheishon suokbü.

³Ngeibü BUNYUBOU to ngakho, nyensangla mubü. Hibü ngo ngeibü dangbou ka khümenan kilabü.

⁴Haibü lühei ngo kailepbei; hoba Mühghaü to ühütbü yungsenei ngo hattikei.

⁵Sheol lühei ngo komlepbei; haibü sung kü jungto loukei.

⁶Ngeibü khonsaka ngei BUNYUBOU to ngakei, hoba ngeibü Mühghaü to ngekkei; haoei haoeibü lembüchem ka ngeibü ngüh ditkei. Hobaje ngei hao to ngekbü haoeibü nou to atkei.

⁷Kheijinei kaodak nyaakkei hoba lühkei; shongh tenshangkei nyaakeikei. Hobaje kaodak teneikei, aieilausi hao khauangko kikei.

⁸Haoeibü kungkhün ka wankhük longkei. Hobaje haoeibü sembung ka wan longkei. khoei wankak yasetham aptikei.

⁹Haoei müh shuongkei bühyankei; hoba haoeibü you phanga nakthühbü kho kikei.

¹⁰Hobaje kaakyembü kherabim che thüka setan pijung satkei; haü, haoei yeieibü kaak thüka setan angkei.

¹¹Haoei nakthühbü kho hao hushang yeitikei; hao kailepbü chem kho lang khinbü sangmei nakthühbü yeitikei.

¹²Hao thedanga kibü soneikangbü junga hao sangmei danko senlaang hoba yasetham kibü wankak longkei.

¹³BUNYUBOUei tokei müha langmak maaktikei; hoba thükkabouei ngüh longkei, senlaang hoba longan kibü wankak.

¹⁴Hobaje haoei haoeibü laujinei kipbei, hoba khübü kho lintikei, hoba langpon pontikei hoba haoen mangtikei.

¹⁵Kheijinei haoei haksi, O BUNYUBOU, Kaibü kungkhünei hakhin si yungnyu maangkabou hapbei. Hobaje kaodak tenshang kongkong apbei.

¹⁶Haoei saabü ka ik shingkei haoei kü to hatlepbei, Haoei ngo yungnyu haübü ka senenkei.

¹⁷Haoei ngeibü hau kibü dangbou ka, hoba kü to mangsenbü shuong ka ngo khümenkei; aishanga kü shanga haoen kho yongko hau kibü kikei.

¹⁸Ngo thushed jihsiphaia haoen ngo khulimbo loukei; lausikei BUNYUBOU ngeibü thuibou kikei.

¹⁹Haoei tokei, ngo hopabü kaoen che to leiyenkei; haoei ngo püetkei aieilausi haoei kü to maangshikkei.

²⁰BUNYUBOUei ngo saopobü thüng kü la jongsak kukei; ngeibü ik saopobü thüng haoei kü la kungailabü.

²¹Aishanga ngei BUNYUBOUeibü lamnyu phoa, hoba amaibü kümbo ngeibü Mühghaü ka abang.

²²Aishanga haoeibü matjem pendou kü thedanga kikei; hoba haoeibü ngühkhüm kü jungka akukti.

²³Ngo tokei hao junga ashedko kikei; hoba ngei ngeibü shedbü ka ngo lolo bangenan kikei.

²⁴Hibü BUNYUBOUei ngeibü saopobü thüng, hao thea ngeibü ik saopoan kibü thüng, kü la kungaikei.

²⁵Üeisanou kibü müt to nyi no lolo üeisanou lenda, shedbü akibü to nyi no lolo shedbü akiko lenda.

²⁶Hinseibü müt to nyi no lolo henseian lenda, Hobaje kombünongbü müt to nyi no lolo koman nongan lenda.

²⁷Aishanga nyi khonkua kibü shuong khümenda, lausikei lilisesebü nyek nyi senyankulabü.

²⁸Hobaje nyi ngeibü wanthung sapbuda; BUNYUBOU ngeibü Mühghaüei ngeibü nakthüh ngesaktikuda.

²⁹Aishanga no danko sekbülakbü tan che thükenkei; hoba kü Mühghaü danko ngo sangnyu ba che to saüjung angenkei.

³⁰Mühghaüeibü kümsileije benbüsoubü ki; BUNYUBOUei thekubü tükde ki. Aoyouei hao to satenda haoen pendou shanga hao aih ki.

³¹Aieilausi BUNYUBOU to liman ao Mühghaü ki, hoba seneibü Mühghaü to liman ao laangnyu ki?

³²Haoei shembe hau kü la kaikuda; hoba ngeibü lamnyu bentisoutida.

³³Haoei ngeibü you meishieibü you tegü yeitida; hoba shonghnyua ngo lotida.

³⁴Ngeibü phemei chinameibü lau bühenlabü lele, haoei ngeibü ikei wapyola lenda.

³⁵Nyi kü la khümenbü aih kua, hoba kaibü mae ikei ngo senetda, hoba kaibü ea aoabüei ngo yaang yeitia.

³⁶Nyi kü phanga ngeibü youyaü hopatham yeitikua, hoba ngeibü you ashek.

³⁷Ngei ngeibü dangbou shuong shikei hoba haoen laphetkei; hoba haoen ashemti shongko ngo nyibou asepei.

³⁸Haoen apienlabü lele ngei haoen to sukei, hao ngeibü you phanga tuongkei.

³⁹Aieilausi lason shanga nyi kü la shembe kaangko shenkukei.

⁴⁰Nyi kü to mangsenbü shuong sepeijung ngaitia hoba ngei ngeibü labou shuong shemtia.

⁴¹Haoenei ngekkei, lausikei püetlabü ao aki; BUNYUBOU to ngekkei lausikei haoei haoen to ajongai.

⁴²Kheijinei ngei haoen to yeia kibü thamngu tegü netla yeiko ngümbei, ngei haoen khonga thim tegü kangan apbei.

⁴³Nyi ngo mütshuong wapyobü ka khümena, nyi ngo phangshuong thüka khu yeitia, phang laobou ngei ange haoenei ngo khangena.

⁴⁴Haoenei kü shangabü ditbüyam haoenei kü to ngüha lelabü; küksithang shuongei kü to ea aoa hehoat kilabü.

⁴⁵Küksithang shuong maang aplabü, hoba haoen lapheishon ka lühjilühko longlabü.

⁴⁶BUNYUBOU lang kida! Ngeibü laangnyu haübou yingshi; hoba Mühghaü aoei kü shanga phok lambuda;

⁴⁷Hobaje mütshuong kü phanga thepetan phokuda. Hao ngo khümenbou Mühghaü, hao yaangentiashi!

⁴⁸Haoei ngo ngeibü dangbou shuong ka khümenda, haü aoyouei kükhu limbo meimeida haoen thüka nyi ngo thungeijangeida; nyi ngo sekbülakbü müt ka khümenda.

⁴⁹Hibü O BUNYUBOU, phangshuong yoa ngei no sangkho, hoba kaibü nyena nyensang chia laukho.

⁵⁰Haoeibü Choba la haoei khümenbü yaang kuda, hoba haoei pienbü Dawid hoba haoeibü lilabü la thon akiko haoei üeisanou lenda.